ក្រុងឌីលី: ធនាគារជាតិនៃកម្ពុជា និងធនាគារកណ្តាលទីម័រឡេស្តេ ចុះអនុស្សរណៈយោគយល់ ដើម្បីបង្កើតក្របខណ្ឌបន្ថែម ក្នុងការ ពង្រឹងកិច្ចសហប្រតិបត្តិការលើការទូទាត់ឌីជីថល នវានុវត្តន៍ផ្នែកហិរញ្ញវត្ថុ និងការពង្រឹងការតភ្ជាប់ផ្នែកហិរញ្ញវត្ថុ តាមរយៈការតភ្ជាប់ ប្រព័ន្ធទូទាត់ឆ្លងដែន។

លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា នៅថ្ងៃទី១២ ខែកញ្ញា ឆ្នាំ២០២៦ កន្លងមកនេះ បានចុះ អនុស្សរណៈយោគយល់ ស្តីពីការលើកកម្ពស់កិច្ចសហប្រតិបត្តិការ ទ្វេភាគីលើប្រព័ន្ធទូទាត់ឌីជីថល និងការតភ្ជាប់ប្រព័ន្ធទូទាត់ឆ្លងដែន ជាមួយ ឯកឧត្តម Helder Lopes ទេសាភិបាលធនាគារកណ្តាលទីម័រឡេស្តេ ក្រោមអធិបតីភាព ឯកឧត្តម José Ramos-Horta ប្រធានាធិបតីនៃសាធារណរដ្ឋប្រជាធិតេយ្យទីម័រឡេស្តេ និងឯកឧត្តម Kay Rala Xanana Gusmão នាយករដ្ឋមន្រ្តី នៃសាធារណរដ្ឋ ប្រជាធិតេយ្យទីម័រឡេស្តេ។

គោលបំណងនៃអនុស្សរណៈយោគយល់នេះ ដើម្បីបង្កើតក្របខណ្ឌបន្ថែមទៀត ក្នុងការពង្រឹងកិច្ចសហប្រតិបត្តិការលើការ ទូទាត់ឌីជីថល នវានុវត្តន៍ផ្នែកហិរញ្ញវត្ថុ និងការពង្រឹងការតភ្ជាប់ផ្នែកហិរញ្ញវត្ថុ។ តាមរយៈក្របខណ្ឌនេះ ភាគីទាំងពីរនឹងផ្លាស់ប្តូរ ព័ត៌មាន ​ចំណេះដឹង និងបទពិសោធន៍ ព្រមទាំងសហការលើការស្រាវជ្រាវ ក៏ដូចជាការបណ្តុះបណ្តាលនានា។ កិច្ចសហប្រតិបត្តិការ នេះក៏មានគោលបំណងលើកកម្ពស់ការទូទាត់ជារូបិយវត្ថុក្នុងស្រុក ដើម្បីគាំទ្រសកម្មភាពពាណិជ្ជកម្ម និងការវិនិយោគរវាងប្រទេស ទាំងពីរ។

សូមបញ្ជាក់ថា ជុំវិញកិច្ចសហប្រតិបត្តិការនេះ នៅក្នុងឆ្នាំ២០២៤ កន្លងមក ធនាគារជាតិនៃកម្ពុជា និងធនាគារកណ្តាលទីម័រឡេស្តេ បានចុះហត្ថលេខាលើអនុស្សរណៈយោគយល់លើកដំបូង រវាងធនាគារទាំងពីរ នៅរាជធានីភ្នំពេញ មានគោលបំណងពង្រឹងកិច្ច សហការរួមមាន៖ ប្រតិបត្តិការធនាគារកណ្តាល, ការតភ្ជាប់ការទូទាត់សងប្រាក់, នវានុវត្តន៍ហិរញ្ញវត្ថុឌីជីថល, ការត្រួតពិនិត្យធនាគារ, បរិយាបន្នហិរញ្ញវត្ថុ និងការអភិវឌ្ឍធនធានមនុស្ស ហើយតាមរយៈអនុស្សរណៈយោគយល់នោះដែរ បានបង្ហាញពីការចាប់ផ្តើមនៃ កិច្ចសហប្រតិបត្តិការ និងចំណងមិត្តភាពយ៉ាងជិតស្និទ្ធ ក្នុងគោលដៅរួមចំណែកអភិវឌ្ឍវិស័យធនាគារ នៃប្រទេសទាំងពីរឱ្យកាន់តែរីក ចម្រើនថែមទៀត៕ អត្ថបទ៖ សុន រ៉ាឌី