(ទីក្រុងវៀងចន្ទន៍ ប្រទេសឡាវ) ថ្ងៃទី១៤ ខែកញ្ញា ឆ្នាំ២០២៦ — ក្នុងឱកាសអញ្ជើញ​ចូល​រួម​កិច្ច​ប្រជុំ​ត្រួត​ពិនិត្យឡើងវិញលើកទី៣ នៃអនុសញ្ញាស្តីពីគ្រាប់បែកចង្កោម (CCM) ឯកឧត្តមបណ្ឌិត លី ធុជ ទេសរដ្ឋមន្ត្រី និងជាអនុប្រធានទី១ អាជ្ញាធរមីន បានទទួលជួបពិភាក្សាការងារជាមួយ លោក Jürg Lauber អនុប្រធានគណៈកម្មាធិការកាកបាទក្រហមអន្តរជាតិ (ICRC)។

ក្នុង​ជំនួបនេះ ភាគីទាំងពីរបានពិភាក្សាអំពីកិច្ចសហប្រតិបត្តិការរវាងកម្ពុជា និង ICRC ក្នុង​វិស័យ​សកម្ម​ភាព​មីន និងសំណល់ជាតិផ្ទុះពីសង្គ្រាម ព្រមទាំងការ​បន្ត​ពង្រឹង​កិច្ច​សហការ​ដើម្បី​កាត់​បន្ថយ​ផល​ប៉ះពាល់ពីគ្រាប់មីន និងសំណល់ជាតិផ្ទុះ ការពារអាយុជីវិត និងលើកកម្ពស់​សុវត្ថិភាព​សម្រាប់​ប្រជាពលរដ្ឋ និងសហគមន៍ដែលរងផលប៉ះពាល់។

លោក Jürg Lauber បានកោតសរសើរចំពោះការរួមចំណែករបស់កម្ពុជា ក្នុងការដោះស្រាយ​បញ្ហា​គ្រាប់​បែកចង្កោម និងការគាំទ្រយ៉ាង​សកម្ម​ចំពោះ​គោល​ដៅ​មនុស្ស​ធម៌​នៃ​អនុសញ្ញា​​ស្តីពី​គ្រាប់​បែកចង្កោម ទោះបីកម្ពុជាមិនទាន់ជារដ្ឋភាគីនៃអនុសញ្ញានេះក៏ដោយ។

ពាក់ព័ន្ធនឹងប្រជាពលរដ្ឋដែលបានភៀសសឹកដោយសារជម្លោះព្រំដែនកម្ពុជា-ថៃ ក្នុងឆ្នាំ២០២៥ លោក Jürg Lauber បានបញ្ជាក់ថា ICRC បាននិងកំពុងធ្វើការយ៉ាងជិតស្និទ្ធជាមួយកាកបាទក្រហមកម្ពុជា ដើម្បីរួមចំណែកផ្តល់ការគាំទ្រដល់ប្រជាពលរដ្ឋដែលរងផលប៉ះពាល់។

ជាការឆ្លើយតប ឯកឧត្តមបណ្ឌិត លី ធុជ បានថ្លែងអំណរគុណចំពោះ ICRC ចំពោះការចូលរួម និងការគាំទ្រដល់វិស័យសកម្មភាពមីននៅកម្ពុជា និងបានបញ្ជាក់ពីការប្តេជ្ញាចិត្តរបស់កម្ពុជា ក្នុងការបន្តគាំទ្រគោលដៅមនុស្សធម៌នៃអនុសញ្ញាស្តីពីគ្រាប់បែកចង្កោម ក្នុងនាមជារដ្ឋអង្កេតការណ៍ និងជាប្រទេសស្រឡាញ់សន្តិភាព។

ឯកឧត្តមបណ្ឌិត លី ធុជ ក៏បានថ្លែងអំណរគុណចំពោះ ICRC ចំពោះការចូលរួមសម្របសម្រួលក្នុងការដោះលែងនាយទាហានកម្ពុជាចំនួន ១៨រូប ដែលត្រូវបានចាប់ខ្លួនដោយយោធាថៃ កាលពីឆ្នាំ២០២៥។ជាមួយគ្នានេះ ឯកឧត្តមទេសរដ្ឋមន្ត្រី បានលើកឡើងអំពីបញ្ហាប្រឈមថ្មីរបស់កម្ពុជា ពាក់ព័ន្ធនឹងយុទ្ធភណ្ឌគ្រឿងផ្ទុះដែលបន្សល់ទុកពីជម្លោះព្រំដែនកម្ពុជា-ថៃ ឆ្នាំ២០២៥ ដែលបានបង្កើតជាបន្ទុកមនុស្សធម៌ថ្មី និងបន្ថែមលើមរតកសង្គ្រាមដែលកម្ពុជាកំពុងបន្តដោះស្រាយ។

តាងនាមរាជរដ្ឋាភិបាលកម្ពុជា ឯកឧត្តមបណ្ឌិត លី ធុជ បានស្នើឱ្យ ICRC បន្តពង្រឹងកិច្ចសហប្រតិបត្តិការ និងចូលរួមគាំទ្រកម្ពុជាក្នុងការឆ្លើយតប និងដោះស្រាយបញ្ហាប្រឈមថ្មីនេះ ដើម្បីកាត់បន្ថយហានិភ័យ និងផលប៉ះពាល់មនុស្សធម៌ចំពោះប្រជាពលរដ្ឋ។

ជាចុងក្រោយ ភាគីទាំងពីរបានបង្ហាញការប្តេជ្ញាចិត្តរួម ក្នុងការបន្តពង្រឹងកិច្ចសហប្រតិបត្តិការ និងភាពជាដៃគូ ដើម្បីរួមចំណែកដល់ការងារមនុស្សធម៌ ការពារប្រជាពលរដ្ឋ និងកសាងសហគមន៍ប្រកបដោយសុវត្ថិភាពពីគ្រាប់មីន និងសំណល់ជាតិផ្ទុះពីសង្គ្រាម៕