ក្រសួងព័ត៌មាន សហការ​ជាមួយគ​ណៈ​កម្មការ​ចំពោះ​កិច្ច​ប្រយុទ្ធ​ប្រឆាំង​ការ​ឆបោក​តាម​ប្រព័ន្ធ​បច្ចេក​វិទ្យា និ​ងស្ថាប័នពាក់ព័ន្ធមួយចំនួនទៀត ដឹកនាំអ្នកសារព័ត៌មានជាតិ និងអន្តរជាតិ សរុប​ចំនួន ៣៩​ស្ថាប័ន ចុះផលិតព័ត៌មាន នៅអតីតទីតាំង online scams នៅតាម​ទីតាំង​មួយ​ចំនួន​នៅ​ក្នុង​ខេ​ត្តព្រៃវែង និងខេត្តស្វាយរៀង។

ក្នុង​បេសកកម្មបង្ហាញការ​ខិតខំប្រឹងប្រែង​បបង្ក្រាបបទល្មើសនេះ ទីតាំងដំបូង ក្រុម​អ្នក​ព័ត៌មាន​ជាតិ ​អន្តរជាតិបានចុះទៅដល់ទីតាំងដំបូង មានឈ្មោះថា មជ្ឈមណ្ឌលពាណិជ្ជកម្មម៉ឺនជ័យ ឬ ៨ park ស្ថិតនៅតំបន់ច្រកទ្វាអន្តរជាតិម៉ឺនជ័យក្នុងស្រុកកំចាយមារ ខេត្តព្រៃវែង។ ទីតាងនេះ ជា​អតីតទីតាំង online scams ដែលត្រូវបានគណៈបញ្ជាការឯកភាពខេត្តព្រៃវែង បាន​ចុះ​ប្រតិបត្តិ​ការ​បង្ក្រាប ​នៅដើមខែកុម្ភៈ និងបានបង្ក្រាបរួចរាល់នៅពាក់កណ្តាលខែកុម្ភៈ។ បន្ទាប់មក នៅ​ថ្ងៃ​ទី៣ ខែមេសា ឆ្នាំ២០២៦ ចៅក្រមស៊ើបអង្កេតបានចុះអនុវត្តដីការឆែកឆេរ និងបាន​បិទ​ទីតាំង​ទាំង​ស្រុង​។

បន្ទាប់មកក្រុមការងារ​បានបន្តចុះទៅដល់​ទីតាំង 8 park ត្រូវសាងសង់នៅឆ្នាំ២០២៣ ហើយ​នៅ​២០២៤ មានវត្តមានជនបរទេសចូលមកបម្រើការងារ ដែលមានប្រមាណ ៧ពាន់នាក់ នៅ​ឆ្នាំ​២០២៥ កើនឡើងជិត ២ម៉ឺននាក់ ក្នុងនោះមានជនជាតិចិន ប៉ាគីស្ថាន ឥណ្ឌា និងនេ​ប៉ាល់​ជា​ដើម​។ នៅខែតុលា ឆ្នាំ២០២៥ សមត្ថកិច្ចបានធ្វើការស៊ើបអង្កេតលើបុគ្គល ចេន ហ្សី រហូត​ដក​សញ្ជាតិ​បុគ្គល ចេន ហ្សី បញ្ជូនទៅកាន់ប្រទេសចិនវិញ។ ​បន្ទាប់មកនៅទីតាំង 8 park មានជន​បរទេស​ចាក​ចេញជាបន្តបន្ទាប់ តាមរយៈការស្រាវជ្រាវរបស់សមត្ថកិច្ចជំនាញ ត្រូវបាន​រក​ឃើញ​ថា​ទីតាំង​នេះជារបស់ក្រុមហ៊ុន ព្រីន គ្រុប។

ចំពោះ​អ្នកអភិវឌ្ឍទីតាំង 8park មានបុគ្គល ៣រូបគប់គិតគ្នា ដែលក្នុងនោះ​រួមមាន៖ ជនជាតិចិ​នចំ​នួន​ពីរ​រូប​ជាម្ចាស់កម្មសិទ្ធិករ កំពុងរត់គេចខ្លួន និងត្រូវបាន​សមត្ថ​កិច្ចក​ម្ពុជា​សហ​ការ​ជាមួយ​សមត្ថ​កិច្ចអ​ន្តរជាតិ ដើម្បីតាមចាប់ខ្លួនយកមកផ្តន្ទាទោសតាមច្បាប់ និងម្នាក់ទៀតជាជនជាតិខ្មែរ ឈ្មោះ អៀង សុខលីម ជាអ្នកឈរឈ្មោះ ដែល​បច្ចុប្បន្ន​ត្រូវ​បាន​តុលាការ​សម្រេច​ឃុំ​ខ្លួន​នៅពន្ធនាគាររាជធានី ភ្នំពេញ (PJ) ។

បន្ទាប់​មក នៅរសៀលថ្ងៃទី២១ ខែកញ្ញាដដែលនេះ ក្រុមអ្នកព័ត៌មានជាតិ អន្តរជាតិ បាន​ចុះ​ទៅ​ដល់​ខេត្តស្វាយរៀង ដើម្បីពិនិត្យមើលអតីតទីតាំង​បទសល្មើសជាក់ស្ដែង​, ក្នុងឱកាសនោះ ឯកឧត្តម ប៉េង ពោធិ៍សា អភិបាលខេត្តស្វាយរៀង បាន​ធ្វើ​បទ​បង្ហាញ​ពី​ការ​បង្រ្កាប​បទ​ល្មើស​អន​ឡាញ​នៅទី​តាំងការស៊ីណូ Golden galaxy ដល់អ្នកសារព័ត៌មានជាតិ និងអន្តរជាតិ សរុបចំនួន​៣៩ ​អង្គភាព។ ទីតាំងការស៊ីណូនេះ ស្ថិតនៅសង្កាត់បាវិត ក្រុងបាវិត ខេត្តស្វាយរៀង។

គួរ​បញ្ជាក់ដែរថា គិតចាប់ពីខែកក្កដា ឆ្នាំ២០២៥ ដល់ខែសីហា ឆ្នាំ២០២៦ អាជ្ញាធរ​មាន​សមត្ថ​កិច្ច​កម្ពុជា​ បានបើកប្រតិបត្តិការស៊ើបអង្កេតលើទីតាំងសង្ស័យបានជាង ៨៣០កន្លែង និងបាន​ចុះ​ប​​ង្ក្រាបជាក់ស្តែងចំនួន ៦៦៣ទីតាំង ក្នុងនោះបានគ្រប់គ្រង និងកម្ទេចទីតាំង online scams ទ្រង់​ទ្រាយ​ធំបានជាង៨០កន្លែង និងបានបណ្តេញចេញមុខសញ្ញាជនសង្ស័យជាជនបរទេសជាង ២ម៉ឺនាក់។

សូមជម្រាបថា កម្ពុជានឹង​ធ្វើជាម្ចាស់ផ្ទះរៀបចំសន្និសីទ​អន្តរជាតិ​ស្តីពី​ការ​ប្រយុទ្ធ​ប្រឆាំង​ការ​ឆបោក​តាម​ប្រព័ន្ធ​បច្ចេកវិទ្យា(ICCOS) ក្រោមប្រធានបទ៖ «រួមគ្នាឆ្ពោះទៅកាត់ផ្តាច់ច្រវាក់ និងបញ្ចប់​ការ​ឆបោកតាមប្រព័ន្ធបច្ចេកវិទ្យា» ចាប់ពីថ្ងៃទី២៣-២៤ ខែកញ្ញា ឆ្នាំ២០២៦ នៅរាជ​ធានី​ភ្នំពេញ។​ សន្និសីទនេះ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

គួរបញ្ជាក់ដែរថា ការឆបោកតាមប្រព័ន្ធបច្ចេកវិទ្យា ជាឧក្រិដ្ឋកម្មឆ្លងដែន និងជាវិបត្តិសកលលោក ដែល​កម្ពុជាខិតខំប្រយុទ្ធប្រឆាំងយ៉ាងសកម្ម ដើម្បីបោសសម្អាតវាឱ្យអស់ពីប្រទេស និងដើម្បី​រួម​ចំណែកដ​ល់​កិច្ចខិតខំជាសកល ក្នុងការទប់ទល់នឹង Online Scams៕ សោភ័ណ