នាព្រឹកថ្ងៃចន្ទ ទី២១ ខែកញ្ញា ឆ្នាំ២០២៦ ក្រសួងមុខងារសាធារណៈ បាន​អនុវត្ត​របប​កិច្ច​ប្រជុំ​របស់​ខ្លួន ដើម្បីពិនិត្យតាមដានវឌ្ឍនាភាពការងារនូវសមិទ្ធផលសម្រេចបាន បញ្ហាប្រឈម ប្រចាំ​នព្វ​មាស ​ឆ្នាំ២០២៦ និងលើកទិសដៅការងារខែបន្ត។ កិច្ចប្រជុំដឹកនាំដោយ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ នៅគណៈកម្មការ​កែ​ទម្រង់​រដ្ឋបាល​សាធារណៈ ដោយមានការអញ្ជើញចូលរួមពី ថ្នាក់ដឹកនាំ និងមន្រ្តីជំនាញ ព្រមទាំង​មន្ទីរ​មុខងារ​សាធារណៈ​រាជ​ធានី-ខេត្តទាំង២៥ តាមប្រព័ន្ធអនឡាញ ជាច្រើនរូប។

សម្រាប់រយៈពេល៩ខែ​កន្លងមកនេះ តាមរយៈរបាយការណ៍ ឯកឧត្តមអគ្គលេខាធិការ សៀត វិចិត្រ គឺក្រសួង​បាន​សម្រេចនូ​វ​សមិទ្ធផល​សំខាន់ៗ​យ៉ាង​ច្រើន​ទៅ​លើ​ការ​អនុវត្ត​កិច្ច​ការងារ​ស្នូល​របស់​ក្រសួង​ដូចជាការគ្រប់គ្រងទិន្នន័យមន្រ្តី វត្តមានមន្រ្តី បៀវត្សមន្រ្តី និងការអភិវឌ្ឍ​សមត្ថភាព​មន្រ្តី​ជា​ដើម​។ ជាមួយគ្នានេះ អ្វីដែលកាន់តែពិសេស​គឺ​ការ​អនុវត្ត​ការងារ​កែ​ទម្រង់​រដ្ឋ​បាល​សាធារណៈ​ គឺក្រសួងបានរៀបចំ​ការ​ប្រឡង​ជ្រើស​រើស​មន្រ្តី​ឱ្យ​ចូល​បម្រើ​ការងារ​ក្រប​ខ័ណ្ឌក្រ​សួង​ចំនួ​ន​៤ បានរៀបចំដាក់ចេញអនុក្រឹត្យស្តីពីការរៀបចំនិងការប្រព្រឹត្តទៅរបស់ក្រសួង ស្ថាប័ន​ចំនួន​៦​បន្ថែម ​បានសម្រេចយុទ្ធនាការចុះធ្វើជំរឿនមន្រ្តីជាក់ស្តែងបានចំនួន២៣ក្រសួង-ស្ថាប័ន និង​នៅ​ខេត្ត​ព្រៃវែង សម្រាប់គ្រឹះស្ថានសិក្សាសាធារណៈក្នុងភូមិសាស្រ្តក្រុង-ស្រុកបានចំនួន១០ និង​សម្រាប់​អង្គភាពសុខាភិបាលមូលដ្ឋានក្នុងភូមិសាស្រ្តស្រុកបានចំនួន១២ បានប្រកាស​ជា​ផ្លូវ​ការ​បណ្តាញ​អគ្គលេខាធិការក្រសួង-ស្ថាប័ន និងបានចុះផ្សព្វ​ផ្សាយ​ការ​វាយ​តម្លៃ​សមិទ្ធកម្ម​ការ​ងារ​របស់​មន្រ្តីផ្អែក​លើ​កិច្ចព្រម​ព្រៀងកា​រងារ​សម្រាប់​វិស័យ​អប់រំ និង​សុខាភិបាល​នៅ​តាម​ ៤តំប​ន់​នៃ​រដ្ឋបាល​ថ្នាក់ក្រោមជាតិ។ល។

ផ្អែកលើសមិទ្ធផលដែលសម្រេចបានយ៉ាងច្រើន និងគួរជាទីមោទនៈ ឯកឧត្តមឧបនាយករដ្ឋមន្រ្តី ហ៊ុន ម៉ានី បានសាទរនិងថ្លែងអំណរគុណចំពោះមន្រ្តីរាជការរបស់ក្រសួងគ្រប់ជាន់ថ្នាក់ ទាំង​ថ្នាក់​ជាតិ និងថ្នាក់ក្រោមជាតិ ដែលបានប្រឹងប្រែងយកកម្លាំងកាយចិត្តខិតខំ​ប្រឹងប្រែង​សម្រេច​បាន​សមិទ្ធផល​ទាំង​អស់នេះ។ ទន្ទឹមនេះ ឯកឧត្តមឧបនាយករដ្ឋមន្រ្តី ក៏បានស្នើការយកចិត្តទុក​ដាក់​បន្ថែម​ទៅ​លើបញ្ហាប្រឈមនានា បើទោះបីជាយើងសម្រេចបានសមិទ្ធផលជាច្រើន ចំពោះបញ្ហា​ប្រឈ​ម​ក៏យើងមិនបង្អង់ក្នុងការដោះស្រាយឱ្យទាន់ពេលវេលានោះដែរ គឺទាមទារការ​ពិគ្រោះ​យោបល់ និងការពិភាក្សាផ្លាស់ប្តូរគំនិតដែលជាមូលដ្ឋានគ្រឹះចាំបាច់ ដើម្បីស្វែង​រក​ចំណុច​ប្រសព្វ​រួម​គ្នា ​និងចូលរួមដោះស្រាយបញ្ហាជារួម៕