ភ្នំពេញ៖ ក្នុងមួយឆ្នាំ ជាមធម្យមយ៉ាងហោចមានអន្ទាក់ជាង ៤ ម៉ឺន ត្រូវបានដោះចេញពីតំបន់ការពារធម្មជាតិ។ នេះបើតាមឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន បានលើកឡើងនៅក្នុងពិធីបើកយុទ្ធ នាការអន្ទាក់សូន្យនៅក្នុងខេត្តព្រះវិហារ នាថ្ងៃទី១៦ ខែឧសភា ឆ្នាំ២០២២។

ឯកឧត្ដមបន្តថា នៅឆ្នាំ២០២១ កន្លងទៅនេះអន្ទាក់ចំនួន ៦១៦១១ អន្ទាក់ និងកាំភ្លើងកែច្នៃចំនួន ៧៥៨ ដើមត្រូវបានដោះ និងដកហូតចេញពីតំបន់ការពារធម្មជាតិ នៅកម្ពុជាពោលគឺជាមធ្យមនៅរៀងរាល់ឆ្នាំ អន្ទាក់ចំនួនជាង៤ម៉ឺន ត្រូវបានដោះចេញដែលបានជួយសង្គ្រោះសត្វព្រៃជាច្រើនប្រភេទកុំឱ្យបាត់បង់ជីវិត។ 

អន្ទាក់ជាឃាតកលាក់មុខសម្លាប់សត្វព្រៃកម្ពុជា និងគំរាមកំហែងដល់សុវត្ថិភាពរបស់បងប្អូនប្រ ជាសហគមន៍តំបន់ការពារធម្មជាតិ និងសហគមន៍ទេសចរណ៍ធម្មជាតិ ដែលចូលព្រៃរកអនុផលព្រៃឈើចិញ្ចឹមជីវិត។ កាលពីឆ្នាំ២០២១ កន្លងទៅនេះផងដែរ ក្រុមសង្គ្រោះសត្វព្រៃបន្ទាន់ដែលជាអង្គភាពចម្រុះ បានចុះប្រតិបត្តិការក្នុងការបង្ក្រាបការជួញដូរសត្វព្រៃ ចំនួន ៦២៥លើក សង្គ្រោះសត្វព្រៃបាន ១២៧១ក្បាល រឹបអូសសត្វព្រៃងាប់ចំនួន ៣៦០៩ក្បាល និងរឹបអូសសាច់សត្វព្រៃគ្រប់ប្រភេទចំនួន ៣៥៤ គីឡូក្រាម បញ្ជូនសំណុំរឿងចំនួន ១១ ទៅតុលាការ និងបានដោះលែងសត្វព្រៃចូលទៅព្រៃធម្មជាតិវិញបានចំនួន ៨៦៤ ក្បាល។

នេះគឺជាយុទ្ធនាការទី៣ក្នុងចំណោម«យុទ្ធនាការអន្ទាក់សូន្យ»ចំនួន ៨ ដែលយុទ្ធនាការទី១ បានរៀបចំឡើងដោយក្រសួងបរិស្ថាននៅរាជធានីភ្នំពេញកាលពីថ្ងៃទី៣ ខែមីនាកន្លងទៅ និងយុទ្ធនាការទី២ រៀបចំឡើងនៅខេត្តស្ទឹងត្រែង ដោយអង្គការ WWF សហការជាមួយមន្ទីរបរិស្ថានខេត្តស្ទឹងត្រែង អង្គការ CI អង្គការ WEA និងគម្រោងព្រៃឡង់បៃតងកាលពីដើមខែមេសាកន្លងទៅ។

យុទ្ធនាការអន្ទាក់សូន្យនេះអំពាវនាវឱ្យមានការដាក់ចេញនូវវិធានការបន្ទាន់នានា ដើម្បីបង្កើនការពង្រឹ ងការអនុវត្តច្បាប់ និងពិនិត្យមើលបទបញ្ញត្តិពាក់ព័ន្ធក្នុងគោលបំណងទប់ស្កាត់ការបរបាញ់សត្វព្រៃខុ សច្បាប់ និងបញ្ចប់វិបត្តិអន្ទាក់ដែលកំពុងគំរាមកំហែងដល់ជីវិតសត្វព្រៃនៅកម្ពុជាកាន់តែខ្លាំងឡើង។

លោកបណ្ឌិត កែន សេរីរដ្ឋា នាយកអង្គការ WCS បានថ្លែងថា ការទប់ស្កាត់សកម្មភាពដាក់អន្ទាក់នៅក្នុងប្រទេសកម្ពុជា នឹងមិនអាចទទួលបានជោគជ័យទេ ប្រសិនបើគ្មានការចូលរួមពីសាធារណជន។

យុទ្ធនាការនេះ គឺជាយន្តការមួយប្រកបដោយប្រសិទ្ធភាពសម្រាប់យើងទាំងអស់គ្នាក្នុងការផ្សព្វផ្សាយសារបន្ទាន់ទៅកាន់សាធារណជន ដើម្បីបញ្ឈប់ការប្រើប្រាស់ផលិតផលសត្វព្រៃ ឱ្យបានទាន់ពេលវេលា។ 

លោកបន្ថែមថា អង្គការ WCS សូមទទូចស្នើសុំឱ្យអ្នកពាក់ព័ន្ធទាំងអស់ចូលរួមអនុវត្តតាមការអំ ពាវនាវនេះ ទាំងអ្នកដែលបង្កើតឱ្យមានតម្រូវការប្រើប្រាស់ផលិតផលសត្វព្រៃ និងទាំងអ្នកជួញដូរសា ច់សត្វព្រៃ។ សត្វព្រៃ គឺជាផ្នែកដ៏សំខាន់មួយនៃប្រព័ន្ធអេកូឡូស៊ី។ ការចូលរួមរបស់លោកអ្នកថ្ងៃនេះ នឹងធានាដល់ការរស់រានរបស់សត្វព្រៃនាពេលអនាគត។

លោកបណ្ឌិត Jackson Frechette នាយកកម្មវិធីនៃមហាតំបន់មេគង្គនៃអង្គការ CI បានថ្លែងថា ចំណុចសំខាន់ដែលនាំឱ្យយុទ្ធនាការនេះទទួលជោគជ័យ គឺគេត្រូវទទួលស្គាល់ថា ការទិញ និងបរិភោគសាច់សត្វព្រៃគឺជាបុព្វហេតុដែលនាំឱ្យមានទីផ្សារជួញដូរសត្វព្រៃ ដែលនាំឱ្យមានការបំផ្លិចបំផ្លាញព្រៃឈើ និងបង្កឱ្យឆ្លងជំងឺផ្សេងៗពីសត្វព្រៃ៕ ដោយ៖ គង់ ឌិន