ស្រីលង្កា៖ លោកនាយករដ្ឋមន្ត្រីទើបតែងតាំងថ្មីរបស់ប្រទេសស្រីលង្កាបាននិយាយថា ប្រទេសកោះដែលញាំញីដោយសារវិបត្តិមួយនេះបានអស់ប្រេងឥន្ធនៈពីស្តុកហើយ ខណៈលោកនិយាយថា ប្រទេសនេះត្រូវការប្រាក់ចំនួន ៧៥លានដុល្លារជាចាំបាច់ក្នុងអត្រាប្ដូរប្រាក់បរទេស ក្នុងរយៈពេលប៉ុន្មានថ្ងៃខាងមុខដើម្បីទូទាត់ការនាំចូលសំខាន់ៗ រួមទាំងថ្នាំពេទ្យផងដែរ។
លោកនាយករដ្ឋមន្ត្រីថ្មី Ranil Wickremesinghe បាននិយាយកាលពីថ្ងៃចន្ទក្នុងសុន្ទរកថាទៅកាន់ប្រជាជាតិ ខណៈប្រទេសនេះរងគ្រោះដោយសារកង្វះប្រេងឥន្ធនៈ និងថ្នាំពេទ្យថា យើងជិតអស់ប្រេងឥន្ធនៈហើយ នៅពេលនេះយើងមានប្រេងនៅក្នុងស្តុកសម្រាប់តែរយៈពេល ១ថ្ងៃទៀតប៉ុណ្ណោះ។ លោកបាននិយាយថា រដ្ឋាភិបាលក៏មិនអាចបង្កើនការចំណាយជាប្រាក់ដុល្លារដើម្បីបង់ថ្លៃដឹកជញ្ជូនប្រេងចំនួន ៣វគ្គបានដែរ ដោយនាវាកំពុងរង់ចាំនៅខាងក្រៅកំពង់ផែកូឡុំបូ សម្រាប់ការទូទាត់មុនពេលបញ្ចេញទំនិញរបស់ពួកគេ។ លោកស្រី Minelle Fernandez អ្នកឆ្លើយឆ្លងព័ត៌មានរបស់សារព័ត៌មាន Al Jazeera ប្រចាំរដ្ឋធានីកូឡុំបូបានរាយការណ៍ពីរដ្ឋធានីកូឡុំបូថា ប៉ុន្មានខែខាងមុខនេះនឹងក្លាយជាប្រទេសដ៏លំបាកបំផុតដែលមិនធ្លាប់ឆ្លងកាត់។
ជាក់ស្តែងវាប៉ះពាល់ដល់គ្រប់កត្តានៃជីវភាពរស់នៅ មិនត្រឹមតែវិស័យឧស្សាហកម្ម និងវិស័យផលិតទេ ហើយក៏ប៉ះពាល់ជីវភាពប្រចាំថ្ងៃរបស់ប្រជាពលរដ្ឋ និងកូនៗទៅសាលារៀនផងដែរ។ វិបត្តិនេះបាននាំឲ្យមានការតវ៉ាទូទាំងប្រទេសប្រឆាំងនឹងលោកប្រធានាធិបតី Rajapaksa និងគ្រួសាររបស់លោកដោយទាមទារឲ្យលោកចុះចេញពីតំណែង ខណៈលោកនាយករដ្ឋមន្ត្រីស្រីលង្កាបានលាលែងពីតំណែងកាលពីសប្ដាហ៍មុន ក្រោយផ្ទុះការតវ៉ាដោយហិង្សារហូតបណ្ដាលឲ្យមនុស្ស ៨នាក់ស្លាប់ និងជាង ២០០នាក់រងរបួស៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
