ភ្លៀងធ្លាក់ឥត​ឈប់ឈរ ដែល​បានវាយប្រហារតំបន់ជាច្រើននៃរដ្ឋធានីបាងកក​របស់ប្រទេសថៃ កាលពីថ្ងៃសៅរ៍ (ទី ២៦ ខែកញ្ញា ឆ្នាំ​២០២៦) បានបង្ក​ឱ្យមាន​ទឹក​ជំនន់​ជន់លិច ដោយបាន​រំខានដល់ការ​ធ្វើ​ចរាចរណ៍ និងជំរុញ​ឱ្យមាន​ការ​ជម្លៀស​មនុស្សរាប់ពាន់នាក់ ខណៈដែលអាជ្ញាធរបានប្រកាសទីក្រុងនេះជាតំបន់គ្រោះមហន្តរាយ។

ជាមួយ​គ្នានេះ នាយកដ្ឋានឧតុនិយមថៃ បានព្រមានថា ភ្លៀងធ្លាក់ខ្លាំងដែលបានចាប់ផ្តើមតាំងពីរសៀលថ្ងៃព្រហស្បតិ៍មកនោះ នឹងបន្តធ្លាក់នៅតំបន់ភាគច្រើននៃប្រទេសរហូតដល់ថ្ងៃអាទិត្យនេះ​។ មន្ត្រីបានឱ្យដឹងថា បរិមាណទឹកភ្លៀងសរុប នៅតំបន់ជាច្រើននៃទីក្រុងបាងកក ចាប់តាំងពីថ្ងៃព្រហស្បតិ៍មក បានកើនឡើងលើសពី ៣០សង់ទីម៉ែត្រ។ ទឹកជំនន់បានលិចពាស​ពេញទីក្រុង ជាពិសេសនៅតំបន់កណ្តាល និងភាគខាងកើត ដោយបានធ្វើ​ឱ្យ​ផ្លូវត្រូវ​បិទ​ និងស្ទះ​ចរាចរណ៍។

ទោះបីជាមិនមែនគ្រប់ផ្នែកនៃទីក្រុងបាងកកត្រូវបានជន់លិចក៏ដោយ ក៏ទីក្រុងនេះបានប្រកាសតំបន់​ទាំង ៥០ របស់ខ្លួនជាតំបន់គ្រោះមហន្តរាយទឹកជំនន់ ដើម្បីឱ្យអាជ្ញាធរអាចឆ្លើយតបបានយ៉ាងឆាប់រហ័ស។ គិតត្រឹមថ្ងៃសៅរ៍ មនុស្សជាង ៨៤.០០០នាក់ នៅក្នុងខេត្តចំនួន ២១ ទូទាំងប្រទេស បានរងផលប៉ះពាល់ដោយសារទឹកជំនន់ ជាពិសេសនៅតំបន់ភាគកណ្តាល។ អាជ្ញាធរបានឱ្យដឹងថា សេវាកម្មរថយន្តក្រុងមួយចំនួនពីទីក្រុងបាងកកទៅកាន់ខេត្តភាគខាងកើត ត្រូវបានផ្អាក។

មាន​សេចក្ដី​រាយការណ៍ថា មនុស្សយ៉ាងហោចណាស់ ២នាក់ បានបាត់បង់ជីវិត​ និងម្នាក់ទៀតត្រូវបានគេសង្ស័យថា ស្លាប់នៅក្នុងហេតុការណ៍ទាក់ទងនឹងទឹកជំនន់ នៅទូទាំងប្រទេសថៃ។ ករណីស្លាប់ទាំង ២នាក់ត្រូវ បានរាយការណ៍នៅក្នុងខេត្ត Chanthaburi ភាគខាងកើតថៃ។ នាយកដ្ឋានបង្ការ និងកាត់បន្ថយគ្រោះមហន្តរាយថៃ (DDPM) បានឱ្យដឹងថា ព្រះសង្ឃ ១អង្គ បានសុគតដោយសារបំណាក់​ដី ខណៈដែលមនុស្សម្នាក់ទៀតស្លាប់ បន្ទាប់ពីទូកនេសាទ ១គ្រឿងបានលិច។ ហើយ​យោងតាមសារព័ត៌មាន​ថៃ Matichon បាន​ឱ្យដឹង​ថា មនុស្សម្នាក់ទៀតក៏បានបាត់បង់ជីវិត​ដែរ នៅទីក្រុងបាងកក៕