ភ្នំពេញ៖ ប្រជាពលរដ្ឋជិត ៤ពាន់គ្រួសារត្រូវបានជម្លៀសពីតំបន់ដែលរងគ្រោះ ទៅកាន់​ទីទួល​សុវត្ថិភាព​ និងដំណាំជិត ៥ម៉ឺនហិកតាបានរងផលប៉ះពាល់ដោយសារគ្រោះទឹកជំនន់ គិត​ត្រឹម​ថ្ងៃ​ទី​២៧ ខែកញ្ញា ឆ្នាំ២០២៦ ដែលមានខេត្តចំនួន១០ បានរងផលប៉ះពាល់នេះ។ នេះបើ​យោង​តាម​របាយការណ៍​របស់គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងនៅថ្ងៃទី២៨ ខែកញ្ញា ឆ្នាំ២០២៦។

របាយការណ៍បង្ហាញថា ស្ថានភាពគ្រោះទឹកជំនន់ គិតពី​ថ្ងៃទី៨ ដល់ថ្ងៃទី២៧ ខែកញ្ញា ឆ្នាំ​២០២៦ ​ត្រឹមម៉ោង ០៥៖០០នាទីល្ងាច គឺមានផលប៉ះពាល់ចំនួន ១០ខេត្ត ដូចជា ខេត្តបាត់ដំបង​ បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំ ប៉ៃលិន ពោធិ៍សាត់ ព្រះវិហារ និងខេត្តឧត្តរមានជ័យ ស្មើនឹង ៥២ក្រុង-ស្រុក ប៉ះពាល់ប្រជាពលរដ្ឋ ៤៤,៨៨៩ គ្រួសារ ផ្ទះ ៤០,៣៨៤ ខ្នង ជម្លៀសប្រជាពលរដ្ឋ ៣,៦៨៥ គ្រួសារទៅកាន់ទីទួលសុវត្ថិភាព និង​ប៉ះ​ពាល់​ដំណាំ​ស្រូ​វ ៤៩,៩២៥ ហិកតា។

ចំពោះការអន្តរាគមន៍ គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា ថ្នាក់ដឹកនាំ និង​មន្ត្រីបច្ចេកទេសគណៈកម្មាធិការជាតិគ្រប់គ្រងគ្រោះមហន្តរាយ បានបន្ត​ចុះ​ពិនិត្យ​ស្ថាន​ភាព​ទឹក​ជំនន់​ដែល​ប៉ះពា​ល់ជាងគេក្នុងខេត្តបាត់ដំបង បន្ទាយមានជ័យ និងសៀមរាប ហើយ​រដ្ឋបាល​ខេត្ត ​មានភាពម្ចាស់ការក្នុងការដោះស្រាយ និងជម្លៀសប្រជាពលរដ្ឋពីតំបន់ដែលរងគ្រោះ។

របាយការណ៍ដដែលបានបញ្ជាក់ថា ផលប៉ះពាល់លើប្រជាពលរដ្ឋកើនឡើងប្រមាណ ១៩,៣២៨ គ្រួសារ ធៀបនឹងថ្ងៃម្សិលម៉ិញ កើនភាគច្រើនក្នុងខេត្តបាត់ដំបង បន្ទាយមានជ័យ និងសៀមរាប។ ចំពោះ​ស្ថានភាពកម្ពស់ទឹកទន្លេមេគង្គនៅតាមស្ថានីយសំខាន់ៗ ភាគច្រើននៅ​ក្រោម​កម្រិត​ប្រុង​ប្រយ័ត្ន ​និងមាននិន្នាការស្រកចុះ៕ អត្ថបទ ៖ ប្រាក់ វ៉ាន់ដា