ភ្នំពេញ៖ ដើម្បីធានានិរន្តរភាព នៃការបើកដំណើរការសង្គម-សេដ្ឋកិច្ច តាមគន្លងប្រក្រតីភាពថ្មី ហើយជាពិសេសវិស័យអប់រំនោះ មន្រ្តីជំនាញនៃក្រសួងអប់រំ យុវជន និងកីឡា បានក្រើនរម្លឹកដល់បុគ្គលិកអប់រំ និង អ្នកសិក្សារួសរាន់ចាក់វ៉ាក់សាំងដូសជំរុញ។ ការចាក់វ៉ាក់សាំងកូវីដ ត្រូវបានរាជរដ្ឋាភិបាលកម្ពុជា ចាត់ទុកជា យុទ្ធសាស្រ្តចម្បងមួយ ដើម្បីទប់ស្កាត់ការរីករាលដាលជំងឺកូវីដ-១៩។

មានប្រសាសន៍ប្រាប់BTV នៅថ្ងៃទី១៧ ខែឧសភានេះ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បន្តជំរុញដល់បុគ្គលិកអប់រំ អ្នកសិក្សា មាតាបិតា គ្រប់ភាគីពាក់ព័ន្ធ រួមទាំង​ប្រជាពលរដ្ឋ នៅទូទាំងប្រទេស បន្តចាក់វ៉ាក់សាំងបង្ការជំងឺកូវីដ-១៩ ដូសជំរុញឱ្យ​បានគ្រប់ៗគ្នា និង​បន្តអនុវត្តវិធានការ ៣កុំ ៣ការពារ ស្របតាមវិធានសុខាភិបាល និងការណែនាំរបស់រាជរដ្ឋាភិបាល ដើម្បីនិរន្តរភាព នៃការបើក ដំណើរការសង្គម-សេដ្ឋកិច្ច តាមគន្លងប្រក្រតីភាពថ្មី។

លោក បានបន្តថា ការចាក់វ៉ាក់សាំង គឺជាមូលដ្ឋានដ៏សំខាន់ ដែលនាំឱ្យមានការបើកដំណើរការ សង្គម-សេដ្ឋកិច្ចឡើងវិញ ​និយាយជារួម និងនិយាយដោយឡែក​ ការបើកដំណើរការវិស័យអប់រំ។

ផ្អែកតាមរបាយការណ៍របស់មន្ទីរអប់រំ យុវជន និងកីឡា រាជធានីខេត្ត ​លោកគ្រូ អ្នកគ្រូ និងសិស្សា នុសិស្សភាគច្រើន ​បានចាក់វ៉ាក់សាំងការពារជំងឺកូវីដ-១៩ យ៉ាង​ហោចណាស់​ក្នុងម្នាក់បី​ដូសរួចរាល់។

បច្ចុប្បន្នប្រទេសកម្ពុជា ​បើកដំណើរការសេដ្ឋកិច្ចធម្មតា​ ជាមួយវត្តមានជំងឺកូវីដ-១៩ ​ខណៈការ ចាក់វ៉ាក់​សាំងកូវីដ ស្រោចលើប្រជាពលរដ្ឋ ​ត្រូវបានរាជរដ្ឋាភិបាល ចាត់ទុកជាយុទ្ធសាស្រ្តចម្បង​មួយ ដើម្បីទប់ស្កាត់ការរីករាលដាលជំងឺកូវីដ-១៩ ​និងធានានិរន្តរភាព ​សង្គម-សេដ្ឋកិច្ច និងការរស់នៅធម្មតាតាម បែបគន្លងថ្មី៕អត្ថបទ៖ ទូច សោភ័ណ