ក្រុមកីឡាអុកអន្ដរជាតិកម្ពុជា ដឹកនាំដោយលោក ឯល រ៉ូហ្សាក់ ប្រតិភូដឹកនាំ និង​ជា​គ្រូ​បង្វឹក​នៃ​សហព័ន្ធ​កីឡាអុ​កកម្ពុជា បានធ្វើដំណើរមកដល់មាតុភូមិវិញហើយ នៅល្ងាចថ្ងៃទី២៩ ខែកញ្ញា ក្រោយបញ្ចប់បេសកកម្មដោយជោគជ័យ ក្នុងព្រឹត្តិការណ៍ប្រកួតអុកអន្ដរជាតិកម្រិតពិភពលោក FIDE Chess Olympiad លើកទី៤៦ ឆ្នាំ២០២៦ នៅប្រទេសអ៊ូបេគីស្ថាន ដែលក្រុមកីឡាការិនីកម្ពុជា ដណ្ដើមបានមេដាយសំរឹទ្ធ ១គ្រឿង កាលពីថ្មីៗ។

ជាមួយដំណើរត្រឡប់មកមាតុភូមិដោយមោទនភាពនេះ ទាំងគ្រូបង្វឹក និងកីឡាករ-កីឡាការិនី សុទ្ធតែរីករាយជាខ្លាំង សម្រាប់បេសកកម្មតំណាងជាតិចូលរួមព្រឹត្តិការណ៍ដ៏ធំ ដែលមានអត្តពលិកជាង ២០០ប្រទេសចូលរួម ហើយថែមទាំងដណ្ដើមបានមេដាយជូនជាតិថែមទៀត ។ ទាំងគ្រូបង្វឹក និងកីឡាការិនី បានចាត់ទុកការឈ្នះមេដាយសំរឹទ្ធលើកដំបូងនេះ គឺជាសមិទ្ធផលលើសការរំពឹង ហើយក៏ជាកម្លាំងចលករដ៏សំខាន់ក្នុងការជំរុញការអភិវឌ្ឍវិស័យកីឡាអុកអន្ដរជាតិនៅកម្ពុជាឲ្យកាន់តែរីកចម្រើនផងដែរ។

លោក ឯល រ៉ូហ្សាក់ បានកោតសរសើរ ចំពោះលះបង់របស់កូនក្រុម ក្រោមស្មារតីប្រយុទ្ធពេញ ២សប្ដាហ៍ ដើម្បីសម្រេចបានលទ្ធផលលើសការរំពឹងជូនជាតិ។ ក្នុងនាមជាគ្រូបង្វឹក ធ្លាប់មានបទពិសោធន៍ចូលរួមការប្រកួតអន្ដរជាតិច្រើន លោកពិតជារីករាយនូវផ្លែផ្កា កើចេញពីការខិតខំការអភិវឌ្ឍធនធានបន្ដវេន ស្របតាមចក្ខុវិស័យរបស់ថ្នាក់ដឹកនាំសហព័ន្ធ ហើយថ្ងៃអនាគត លោកថា ការចូលរួម និងដណ្ដើមមេដាយជូនជាតិ គឺជារឿងមួយ តែសំខាន់ជាងនេះ លោកចង់ឃើញព្រឹត្តិការណ៍ដ៏ធំនេះត្រូវបានរៀបចំនៅកម្ពុជា ដើម្បីផ្ដល់ឱកាសដល់កីឡាករកាន់តែច្រើនបានចូលរួម ព្រមទាំងជួយលើកស្ទួយដល់ទេសចរណ៍ និងសេដ្ឋកិច្ចថែមទៀត។

ទន្ទឹមជាមួយគ្នា កីឡាការិនី ផុន សុពណ៌បតី និង ជា សុផារី តំណាងឲ្យក្រុមសុទ្ធតែមានមោទនភាពខ្លាំង ដែលក្រុមខ្លួនអាចដណ្ដើមមេដាយជូនជាតិ។ ទោះបីចាប់ផ្ដើមពីកម្រិតទី៥ នៃព្រឹត្តិការណ៍ តែពួកគេបានចាត់ទុកនេះគឺជាផ្លែផ្កាដ៏ល្អ ដើម្បីជំរុញទឹកចិត្តខិតខំប្រឹងប្រែងហ្វឹកហាត់បន្ថែមដល់ពួកគេ ក្នុងការអភិវឌ្ឍន៍សមត្ថភាពត្រៀមចូលរួមការប្រកួតកម្រិតខ្ពស់ទៅថ្ងៃអនាគត បន្ទាប់ពីក្រុមកីឡាការិនីអុកអន្ដរជាតិកម្ពុជា បានបង្ហាញវត្តមានលើកដំបូងក្នុងព្រឹត្តិការណ៍ FIDE Chess Olympiad ឆ្នាំនេះ។

ដោយឡែកកីឡាករ ម៉ែន សីហា ដែលទទួលបាន Title Candidate Master ពីសហព័ន្ធអន្ដរជាតិ បានលើកឡើងថា ទោះបីក្រុមបុរស ពុំទទួលបានមេដាយ តែការបញ្ចប់នៅចំណាត់ថ្នាក់លេខ៧ ក្នុងចំណោមបណ្ដាប្រទេសជាច្រើន គឺជាលទ្ធផលដ៏គាប់ប្រសើរមួយ ដែលបង្ហាញពីភាពរីកចម្រើននៃវិស័យកីឡាអុកអន្ដរជាតិនៅកម្ពុជា ហើយពួកគេនឹងព្យាយាមខិតខំបន្ថែមទៀត ដើម្បីមានឱកាសឈានទៅប្រកួតមេដាយជូនជាតិនាឱកាសក្រោយ។

គួរដឹងថា ព្រឹត្តិការណ៍ FIDE Chess Olympiad 2026 ដែលអ៊ូសបេគីស្ថាន ទទួលធ្វើម្ចាស់ផ្ទះឆ្នាំនេះ បានប្រព្រឹត្តទៅពីថ្ងៃទី១៥ ដល់ថ្ងៃទី២៧ ខែកញ្ញា ដោយមានអត្តពលិកប្រមាណ ២ពាន់នាក់ចូលរួម ក្នុងនោះមានអត្តពលិកផ្នែកបុរសមកពី ២០៨ប្រទេសចូលរួម ខណៈផ្នែកនារី មានអត្តពលិកប្រមាណ ១៩២ប្រទេសចូលរួម។ ជាលទ្ធផលសម្រាប់អត្តពលិកកម្ពុជា ក្រៅពីការប្រជែងមេដាយជូនជាតិ ក៏បានកើតចំណាត់ថ្នាក់ពិភពលោកផងដែរ ជាក់ស្ដែងក្រុមនារី ដែលចាប់ផ្ដើមជាមួយលេខរៀងទី១៧៥ តែបានបញ្ចប់ដោយឡើងមកឈរលេខរៀងទី១៣៧ ខណៈផ្នែកបុរស បានចាប់ផ្ដើមពីលេខរៀងទី១៩៥ និងបញ្ចប់ដោយឡើងមកឈរលេខរៀងទី១៦៣៕ អត្ថបទ លី ឈុនឡា