កណ្ដាល៖ នៅព្រឹកថ្ងៃទី១៨ ខែឧសភានេះ បណ្តាក្រុមពេទ្យនៅតាមមន្ទីរបង្អែកក្រុងស្រុក និងតាមមណ្ឌលសុខភាពតាមឃុំសង្កាត់ នៅក្នុងខេត្តកណ្តាល បាននឹងកំពុងអនុវត្តយុទ្ធនាការ និងពង្រីកការចាក់វ៉ាក់សាំងដូសជំរុញនៅតាមសាលារៀន តាមសហគមន៍ តាមផ្សារទីប្រជុំ និងខ្នងផ្ទះនានារបស់ប្រជាពលរដ្ឋ។

បើតាមលោក ពាង សារុន ប្រធានមណ្ឌលសុខភាពស្អាងភ្នំ ឃុំស្អាងភ្នំ ស្រុកស្អាង ខេត្តកណ្តាល បានថ្លែងប្រាប់BTV នៅថ្ងៃទី១៨ ខែឧសភានេះថា នៅថ្ងៃនេះ ក្រុមពេទ្យធ្វើការចុះវ៉ាក់សាំង​ការពារកូវីដ១៩ដូសទី៣ ​និងដូសទី៤ជូនសិស្សានុសិស្ស ​នៅក្នុងសាលាឋមសិក្សា ​និងអនុវិទ្យាល័យ ហ៊ុន សែន ស្អាងភ្នំ ខណៈសិស្សានុសិស្ស ភាគច្រើន នៅក្នុងអំឡុងពេលនេះ គឺគេមានការ​មមាញឹក​ខ្លាំងក្នុងការសិក្សា។

លោក បន្តថា ​បន្ទាប់ពីការចុះចាក់តាមសាលារៀន ​ក្រុមពេទ្យ​នឹងបន្តចុះចាក់នៅតាមទីប្រជុំជន តាម​សហគមន៍ និងខ្នងផ្ទះនានាទៀត។

បើតាមបណ្តាសិស្សានុសិស្សនៃសាលារៀន ហ៊ុន សែន ស្អាងភ្នំ បាននិយាយថា សម្រាប់ការចាក់​វ៉ាក់សាំង​ដូសទី៣របស់ពួកគេ ​មានការ​យឺតយ៉ាវ​បន្តិច ​ដោយសារការភ្លេច​និងជាប់រវល់ការសិក្សា ហើយពួកគេ ​លើកឡើងថ្លែងអំណរគុណដល់ថ្នាក់ដឹកនាំសាលា ដែលបានសហការជាមួយ​ក្រុម​ពេទ្យ ចុះចាក់វ៉ាក់សាំងកូវីដ១៩ មកដល់សាលារៀនរបស់គេផ្ទាល់តែម្តង។

បើតាមវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល ​បានថ្លែងថា ការ​ចាក់វ៉ាក់សំាង​ការពារកូវីដ១៩ ជូនពលរដ្ឋដូសទី២ ​មកដល់ថ្ងៃនេះ​គឺខេត្តកណ្តាល សម្រេច​ចាក់​បានលើស១០០% លើសផែនការគ្រោងទុក ។ ​ប៉ុន្តែសម្រាប់ការចាក់ដូសទី៣​ សម្រាប់កុមារអាយុ៥ឆ្នាំ​គឺ​កំពុងដំណើរការចាក់បានប្រមាណ១៣% ​សម្រាប់ការចាក់ដូស​ទី៣​លើ​ក្មេងអាយុ ​៦ឆ្នាំដល់១២ឆ្នាំ ចាក់បានប្រមាណ៦៨% ​ការចាក់សម្រាប់អាយុពី១២ ​ឆ្នាំដល់១៨​ ឆ្នាំគឺបានជិត ៩០% ក្នុងនោះ​ការចាក់​ដូសទី៤ គឺបានប្រមាណ៥% ។ ដោយឡែកការចាក់ដូសទី៣ លើមនុស្សវ័យចាប់ពី១៨ឆ្នាំឡើង​ គឺចាក់បានជាង៦០% ក្នុងនោះ ការចាក់ដូសទី៤​ធ្វើ​បាន​ប្រមាណ១៣%៕ អត្ថបទ៖ ស៊ុម សុខជា