កំពង់ស្ពឺ ៖ ឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាតំណាងរាស្រ្តមណ្ឌលកំពង់ស្ពឺ រួមដំណើដោយឯកឧត្តមអ្នកតំណាងរាស្រ្តមណ្ឌលកំពង់ស្ពឺចំនួន០៥ រូបទៀត បានអញ្ជើញសម្ពោធសមិទ្ធផលនានាក្នុងវត្តចំប៉ាចារ៍ នាព្រឹកថ្ងៃទី១៨ ខែឧសភា ឆ្នាំ២០២២នេះ។

​ក្នុងពិធីសម្ពោធនេះ ក៏មានការអញ្ជើញចូលរួមពីសំណាក់ឯកឧត្តម យឹម សុខុម ប្រធានក្រុមប្រឹក្សាខេត្តកំពង់ស្ពឺ ឯកឧត្តម ទិត វុទ្ធី អភិបាលរងខេត្តកំពង់ស្ពឺ អមដំណើរដោយឯកឧត្តម លោកជំទាវ លោក លោកស្រី សមាជិក សមាជិកា ក្រុមការងារថ្នាក់ជាតិ ក្រុមការងារចុះជួយខេត្ត ស្រុក ឃុំ និងប្រជាពលរដ្ឋជាច្រើនរូបផងដែរ។ 

ឯកឧត្តម ទិត វុទ្ធី បានឲ្យដឹងថា វត្តចំប៉ាចារ៍ ត្រូវបានចាប់ផ្ដើមកសាងឡើងតាំងពីឆ្នាំ១៨១០ ហើយបើគិតមកទល់ពេលបច្ចុប្បន្ន វត្តនេះមានអាយុកាលជាង២១២ឆ្នាំហើយ។ នៅក្នុងឆ្នាំ១៩៧៥ ដល់ឆ្នាំ១៩៧៩ វត្តនេះត្រូវបានរងការវាយប្រហារដោយរបបប្រល័យពូជសាសន៍ដែលធ្វើឱ្យទីវត្តអារាមមួយនេះត្រូវបានបោះបង់ចោលអស់រយៈកាលជាយូរ។ បើទោះបីជាវត្តនេះធ្លាប់បានឆ្លងកាត់នូវអតីតកាលដ៏ជូរចត់ ប៉ុន្តែបច្ចុប្បន្នវត្តនេះនៅតែទទួលបាននូវការគោរពជាទីសក្ការៈសម្រាប់ព្រះសង្ឃ និងពុទ្ធបរិស័ទគោរពបូជា។ ហើយលើសពីនោះថែមទៀត ក្រោមការខិតខំប្រឹងប្រែងរបស់ព្រះសង្ឃ និងពុទ្ធបរិស័ទចំណុះជើងវត្ត បានបន្តកសាងនូវសមិទ្ធផលនានាតាមរយៈការគៀរគរថវិការ និងការឧបត្ថម្ភផ្សេងៗពីសំណាក់សប្បុរសជនដែលមកពីទីជិតទីឆ្ងាយ ដើម្បីចូលរួមអភិវឌ្ឍ និងថែរក្សានូវវិស័យពុទ្ធសាសនាឱ្យកាន់តែរីកចំរើនរុងរឿងថែមទៀត។ 

ថ្លែងក្នុងពិធីដ៏មានសារៈសំខាន់នាព្រឹកនេះ ឯកឧត្តម ហ៊ុន ម៉ានី បានចូលរួមអបអរសាទរដល់ព្រះសង្ឃ និងពុកម៉ែ បងប្អូន ចំពោះការដាក់សម្ពោធជាផ្លូវការនូវសមិទ្ធផលថ្មីៗបន្ថែមទៀត ហើយសមិទ្ធផលទាំងអស់នេះ នឹងក្លាយទៅជាប្រយោជន៍សម្រាប់ទីសក្ការៈរបស់ព្រះសង្ឃ ពុទ្ធបរិស័ទជិតឆ្ងាយមកជួបជុំគ្នា ដើម្បីធ្វើទាន និងរក្សាទុកអោយកូនចៅជំនាន់ក្រោយបន្តអនុវត្តនិងប្រកាន់ខ្ជាប់នូវពុទ្ធសាសនារបស់កម្ពុជា។ ទន្ទឹមនឹងនោះឯកឧត្តមបានបន្ថែមថាសមិទ្ធផលទាំងនេះនឹងក្លាយជាផ្នែកមួយដែលបង្ហាញកាន់តែច្បាស់ពីជំនឿដ៏មុតមាំរបស់ពុទ្ធសាសនិក ក៏ដូចជាការបេ្តជ្ញាចិត្តប្រកបដោយសទ្ធារជ្រះថ្លារបស់ថ្នាក់ដឹកនាំក្នុងការលើកកម្ពស់វិស័យពុទ្ធសាសនា អោយកាន់តែរីកសុះសាយនិងឆ្ពោះទៅមុខ៕អត្ថបទ ៖ រដ្ឋា