សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា ជាតិក្នុងពេលដែលលំបាក, រាជរដ្ឋាភិបាលបានធ្វើកំណែទម្រង់ច្រើនណាស់ដើម្បីពង្រឹងខ្លួនឯង, ក្នុងនោះការវាយលុកបោសសម្អាតនូវបញ្ហាអសន្ដិសុខ ដើម្បីមុខមាត់ប្រទេស ដូចជាប្រតិបត្តិការបោសសម្អាតបទល្មើសឆបោកតាមប្រព័ន្ធបច្ចេកវិទ្យា និងការវិនិយោគ ដោះស្រាយបញ្ហាចំពោះមុខ លើការអប់រំ សុខាភិបាល ថាមពល និងវិស័យយោធាជាដើម។

សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ ក្នុងឱកាស អញ្ជើញប្រគល់សញ្ញាបត្រជូននិស្សិតសាកលវិទ្យាល័យគ្រប់គ្រង និងសេដ្ឋកិច្ច (UME) នៅខេត្តបាត់ដំបង ដែលបញ្ចប់ការសិក្សាចំនួន ២ ០០១នាក់ នារី ១ ២៥១នាក់។

សម្ដេចធិបតី នាយករដ្ឋមន្រ្ដីបានបន្តថា ចំពោះ វិស័យការពារជាតិត្រូវបានធ្វើកំណែទម្រង់ និងពង្រឹងយ៉ាងសកម្មដើម្បីបង្កើនសមត្ថភាពការពារជាតិឱ្យកាន់តែរឹងមាំ ប៉ុន្តែសម្តេចសុំមិនលម្អិតស៊ីជម្រៅលើកិច្ចការងារនេះឡើយ។

សម្ដេចធិបតីបន្ថែមថា ក្នុងដំណាក់កាលដ៏លំបាកនេះ កម្ពុជាទទួលបានមកវិញនូវការពង្រឹងសាមគ្គីភាព និងឯកភាពជាតិ ដោយប្រមូលផ្តុំប្រជាជនខ្មែរទាំងក្នុង និងក្រៅប្រទេស ដើម្បីរួមគ្នាក្នុងបុព្វហេតុការពារទឹកដី និងបន្តជំរុញកំណែទម្រង់ផ្ទៃក្នុង។

សម្ដេចធិបតីបញ្ជាក់ថា៖«ជាតិក្នុងពេលដែលលំបាកនេះ រាជរដ្ឋាភិបាលបានធ្វើកំណែទម្រង់ច្រើនណាស់ដើម្បីពង្រឹងខ្លួនឯង, ក្នុងនោះការវាយលុកបោសសម្អាតនូវបញ្ហាអសន្ដិសុខមួយចំនួនដើម្បីមុខមាត់ប្រទេស ដូចជាប្រតិបត្តិការបោសសម្អាតបទល្មើសឆបោកតាមប្រព័ន្ធបច្ចេកវិទ្យាបានអនុវត្តតាំងពីចុងអាណត្តិទី៧មកម្លេះ រហូតមកដល់អាណត្តិទី៧នេះ។ ក្រៅពីនេះរដ្ឋាភិបាលវិនិយោគ ដោះស្រាយបញ្ហាចំពោះមុខ លើការអប់រំ សុខាភិបាល និងវិស័យយោធាជាដើម»។

សម្តេចបានរំលឹកថា ការប្រើប្រាស់កម្លាំងមិនអាចបញ្ចប់បញ្ហាបានឡើយ ហើយការបន្តសាមគ្គីភាព និងការចរចាដោយសន្តិវិធី គឺជាវិធីសាស្ត្រដោះស្រាយដ៏មានប្រសិទ្ធភាពបំផុតសម្រាប់ជាតិ៕