ភ្នំពេញ៖ ក្រុមហ៊ុនអាកាសចរណ៍ជាតិ Air Cambodia កំពុងពង្រឹងការតភ្ជាប់ជើងហោះហើររវាងប្រទេសឥណ្ឌា និងកម្ពុជា ដោយបន្ថែមជើងហោះហើរត្រង់ទីបីក្នុងមួយសប្តាហ៍ពីទីក្រុង Delhi មកកាន់រាជធានីភ្នំពេញ ដែលនឹងចាប់ផ្តើមដំណើរការនៅថ្ងៃទី១៧ ខែធ្នូ ឆ្នាំ ២០២៦។

ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរណ៍ស៊ីវិល (SSCA) បានឱ្យដឹងថា ការតភ្ជាប់ដោយបន្ថែមជើងហោះហើរត្រង់ឡើងវិញនេះ នឹងផ្តល់នូវកម្លាំងចលករយ៉ាងសំខាន់ដល់វិស័យស្នូលៗ ដោយជួយបង្កលក្ខណៈងាយស្រួលដល់ភ្ញៀវទេសចរអន្តរជាតិ និងអ្នកធម្មយាត្រា ក្នុងការមកទស្សនារមណីយដ្ឋានអង្គរ ដែលល្បីល្បាញលើពិភពលោក ព្រមទាំងរឹតចំណងសាមគ្គីភាពឱ្យកាន់តែជិតស្និទ្ធរវាងសិស្ស-និស្សិត ធុរជន ក្រុមគ្រួសារ និងអ្នកស្រឡាញ់វប្បធម៌នៃប្រទេសទាំងពីរ។

 ឯកឧត្តម មានប្រសាសន៍ថា៖ «ជាមួយគ្នានេះ ការតភ្ជាប់នេះក៏នឹងបើកឱកាសសម្រាប់ការផ្សព្វផ្សាយទេសចរណ៍រួមគ្នា ការរៀបចំកញ្ចប់ទស្សនកិច្ចដែលមានភាពទាក់ទាញ និងការពង្រីកការតភ្ជាប់ឆ្លងកាត់ទីក្រុងដេលី។ និរន្តរភាពយូរអង្វែងនៃការតភ្ជាប់នេះ នឹងអាស្រ័យលើតម្រូវការទីផ្សារជាក់ស្តែង សេវាកម្មប្រកបដោយទំនុកចិត្ត និងការសហការផ្សព្វផ្សាយរួមគ្នាយ៉ាងសកម្ម។ ការស្តារឡើងវិញនូវច្រករបៀងអាកាសនេះ នឹងចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចប្រកបដោយចីរភាព»។

ការបន្ថែមជើងហោះហើរថ្មីនេះ ក្រុមហ៊ុនអាកាសចរណ៍ជាតិ Air Cambodia នឹងដំណើរកាបន្ថែមរជើងហោះហើរត្រង់ទីបីក្នុងមួយសប្តាហ៍រវាងទីក្រុង Delhi និងរាជធានីភ្នំពេញ គឺនៅរៀងរាល់ថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍ហើយ សេវាកម្មបន្ថែមនេះត្រូវបានរំពឹងថា នឹងជួយគាំទ្របន្ថែមទៀតដល់កំណើននៃការធ្វើដំណើរសម្រាប់គោលបំណងកម្សាន្ត អាជីវកម្ម និងទេសចរណ៍រវាងប្រទេសឥណ្ឌា និងកម្ពុជា ព្រមទាំង ផ្តល់ជូនអ្នកដំណើរជនជាតិឥណ្ឌានូវការតភ្ជាប់ដោយផ្ទាល់ និងងាយស្រួលមកកាន់រាជធានីរបស់កម្ពុជា និងលទ្ធភាពទទួលបានបទពិសោធន៍ទេសចរណ៍ដ៏សម្បូរបែបនៅក្នុងប្រទេសនេះ។ នេះបើយោងតាមការចុះផ្សាររបស់ Asian Aviation ដែលជាទស្សនាវដ្តីឯករាជ្យឈានមុខគេមួយផ្នែកអាកាសចរណ៍ស៊ីវិល ដែលបោះពុម្ពផ្សាយចេញពីប្រទេសសិង្ហបុរី។

ជើងហោះហើរទាំងនេះនឹងដំណើរការដោយយន្តហោះ Airbus A320 ដែលមានកៅអីសរុបចំនួន ១៧០ រួមមាន កៅអី Business Class ចំនួន ៨ និងកៅអី Economy Class ចំនួន ១៦២។ Air Cambodia បន្តពង្រឹងវត្តមានរបស់ខ្លួននៅក្នុងទីផ្សារប្រទេសឥណ្ឌា តាមរយៈការបន្ថែមជើងហោះហើរទីបីក្នុងមួយសប្តាហ៍នេះត្រូវបានរំពឹងថានឹងឆ្លើយតបទៅនឹងតម្រូវការដែលកំពុងកើនឡើងសម្រាប់ការតភ្ជាប់ជើងហោះហើរត្រង់រវាងប្រទេសឥណ្ឌា និងកម្ពុជា៕

អត្ថបទ៖ ធូ វិរៈ