នេះមិនមែនជាលើកទីមួយនោះទេ ដែលសេវាដឹកជញ្ជូនសាធារណៈឥតគិតថ្លៃត្រូវបានដាក់ចេញ ពោល​គឺ​រដ្ឋបាលរាជធានីភ្នំពេញ តែងតែបន្តផ្តល់ជូនជារៀងរាល់ឆ្នាំក្នុងឱកាសបុណ្យទានធំៗ ដើម្បី​ឆ្លើយ​តប​ទៅនឹងតម្រូវការជាក់ស្តែង និងជួយសម្រាលបន្ទុកចំណាយជូនប្រជាពលរដ្ឋ។

គិតក្នុងថ្ងៃទី១ នៃការដាក់ឱ្យដំណើរការរថយន្ដក្រុងសាធារណ:របស់រដ្ឋបាលរាជធានីភ្នំពេញ ដើម្បី​ជួយ​សម្រួលដល់ការចំណាយជូនប្រជាពលរដ្ឋក្នុងការ​ធ្វើ​ដំណើរ​ទៅ​លេង​ស្រុក​កំណើត​ជួប​ជុំ​ក្រុម​គ្រួសារ ​ក្នុងឱកាសពិធីបុណ្យភ្ជុំបិណ្ឌ នៅព្រឹកថ្ងៃទី៩ ខែតុលានេះ សង្កេតឃើញ​មាន​វត្តមាន​រថយន្ត​ក្រុង​សាធារណៈដ៏ច្រើនសន្ធឹកសន្ធាប់ ត្រូវបានដាក់ពង្រាយ និងកំពុងដំណើរ​ការ​យ៉ាង​សកម្ម​ក្នុង​ការដឹកជញ្ជូនអ្នកដំណើរឆ្ពោះទៅកាន់បណ្តាខេត្តផ្សេងៗគ្នា។ ជាក់ស្តែង ទិដ្ឋភាព​ស្ថិត​នៅ​ទីតាំង​ផ្លូវ២០០៤ ម្តុំទ័ពអាកាសនេះមានភាពមមាញឹក និងកុះករយ៉ាងខ្លាំង ដោយមាន​ប្រជា​ពលរដ្ឋ និងកម្មករនិយោជិតយ៉ាងច្រើនសម្រុកមកទទួលសេវារថយន្តក្រុងឥតគិតថ្លៃនេះ។

ជួប​សម្ភាសន៍ជាមួយប្រជាពលរដ្ឋ ដែលកំពុងរង់ចាំចេញដំណើរទៅកាន់គោលផ្សេងៗគ្នា បាន​សម្តែង​នូវ​ក្តីរំភើប និងពេញចិត្តយ៉ាងខ្លាំងចំពោះការបន្តផ្តល់ជូននូវសេវាកម្មដ៏មានតម្លៃនេះ។ ក្រុម​ប្រជា​ពលរដ្ឋបានចែករំលែកបទពិសោធន៍ធ្វើដំណើរប្រកបដោយភាពរលូន និងបានបញ្ជាក់​ដូច​ៗ​គ្នាទៀ​ត​ថា ការផ្តល់សេវាឥតគិតថ្លៃនេះ ពិតជាបានជួយសម្រាលបន្ទុក និងកាត់បន្ថយការ​ចំណាយ​ក្នុង​គ្រួសារបានមួយចំណែកធំ ខណៈដែលតម្រូវការចំណាយ​ក្នុង​រដូវ​​បុណ្យ​ទាន​មាន​ការ​កើន​ឡើង​។ ហើយថវិកាដែលសន្សំបានពីថ្លៃធ្វើដំណើរនេះ ពួកគាត់នឹងយក​ទៅ​ប្រើប្រាស់​លើ​ការ​ធ្វើ​បុណ្យ​ទាន និងចំណាយផ្សេងទៀតជាដើម។        

ការដាក់ឱ្យប្រើ​សេវាដឹកជញ្ជូនសាធារណៈដោយមិនគិតថ្លៃនេះ រាជរដ្ឋាភិបាលកម្ពុជា តាមរយៈ​រដ្ឋបាល​រាជ​ធានីភ្នំពេញ បានរៀបចំរថយន្តក្រុងសរុបចំនួន ៦០០គ្រឿង រយៈពេល ៥ថ្ងៃ គិត​ចាប់​ពី​ថ្ងៃ​ទី៩ ដល់ថ្ងៃទី១៣ ខែតុលា ឆ្នាំ២០២៦ ដើម្បីជួយសម្រួល​ដល់​ការ​ចំណាយ​របស់​ប្រជា​ពលរដ្ឋ​ទាំង​អស់ ក្នុងការធ្វើដំណើរ​ទៅ​លេង​ស្រុក​កំណើត​ជួប​ជុំ​ក្រុម​គ្រួសារ​ក្នុង​ឱកាស​ពិធី​បុណ្យ​ភ្ជុំ​បិណ្ឌ​ប្រពៃណី​ជាតិខ្មែរ។

សូមបញ្ជាក់ទៀតថា ការផ្តល់ និងទទួលសេវាខាងលើនេះ មិនតម្រូវឱ្យប្រជា​ពលរ​ដ្ឋ​មាន​ការ​ចុះ​ឈ្មោះជា​មុ​ន ឬបង្ហាញអត្តសញ្ញាណប័ណ្ណ និងឯកសារផ្សេងៗឡើយ ពោលគឺ ប្រជាពលរដ្ឋ​អាច​អញ្ជើញ​មក​ជិះដើម្បីធ្វើដំណើរទៅស្រុកកំណើតប្រកបដោយសុវត្ថិភាព៕ អត្ថបទ៖ ឈិត បូរ៉ាវី