ប្រជាពលរដ្ឋខ្មែរ បានត្រឡប់ពីតាមបណ្តាស្រុកកំណើតនានា ក្នុងឱកាសភ្ជុំបិណ្ឌនេះ ចូលមករាជធានីភ្នំពេញវិញដោយទឹកមុខសប្បាយរីករាយ ដោយការប្រើប្រាស់សេវារថយន្តក្រុងឥតគិតប្រាក់។
ប្រជាពលរដ្ឋ ដែលបានមកដល់រាជធានីភ្នំពេញ បានប្រាប់BTVថា ពេលបានទៅលេងស្រុកកំណើតជួបជុំក្រុមគ្រួសារ និងបានទៅវត្តវ៉ាជាមួយសាច់ញាតិពិតជាសប្បាយរីករាយ ដោយសង្កេតឃើញថា នៅតាមបណ្តាស្រុកកំណើតនីមួយៗរីករាយគ្រប់ៗគ្នា ពិសេសនៅតាមបណ្តាវត្តអារាមសុទ្ធតែមានប្រជាពលរដ្ឋនាំគ្នាទៅធ្វើបុណ្យទានក្នុងឱកាសភ្ជុំបិណ្ឌយ៉ាងច្រើនកុះករ។
ប្រជាពលរដ្ឋ បានប្រាប់បន្តថា អ្វីដែលធ្វើឱ្យពួកគេ កាន់តែរីករាយថែមទៀតនោះ គឺបានជិះរថយន្តក្រុងទំាងទៅស្រុក និងត្រឡប់មកភ្នំពេញវិញ ដោយមិនអស់ថវិកាសោះឡើយ ក្រៅពីនេះថែមទំាងទទួលបានទឹកសុទ្ធ និងភេសជ្ជៈទទួលទានដោយមិនអស់ថវិកាផងដែរ ដូចនេះពួកគេនាំគ្នាថ្លែងអំណរគុណដល់រាជរដ្ឋាភិបាល ដែលបានផ្តល់រថយន្តក្រុងជូនប្រជាពលរដ្ឋជិះទៅលេងស្រុក និងត្រឡប់មកភ្នំពេញវិញដោយមិនអស់ថវិកា ពិតជាសប្បាយរីករាយណាស់។
ចំណែកអ្នកបើកបររថយន្តក្រុង បានប្រាប់ដែរថា នៅពេលបានជូនប្រជាពលរដ្ឋទៅលេងស្រុកកំណើត និងបានដឹកមកភ្នំពេញវិញ គឺពួកគាត់ពេញចិត្ត ដោយសង្កេតឃើញប្រជាពលរដ្ឋសប្បាយរីករាយសើចសប្បាយ ហើយពលរដ្ឋបាននាំគ្នាអរគុណដល់ថ្នាក់ដឹកនាំដែលបានផ្តល់រថយន្តក្រុងឱ្យពួកគេបានជិះដោយមិនអស់ថវិកាប្រកបដោយផាសុកភាព និងសុខសុវត្ថិភាព ។
សូមបញ្ជាក់ថា ក្នុងឱកាសពិធីបុណ្យភ្ជុំបិណ្ឌេយៈពេល៣ថ្ងៃ រាជរដ្ឋាភិបាល បានផ្តល់សេវារថយន្តក្រុងឱ្យប្រជាពលរដ្ឋជិះទៅលេងស្រុកកំណើត និងត្រឡប់មកកាន់រាជធានីភ្នំពេញវិញ រយៈពេល៥ថ្ងៃដោយចាប់ពីថ្ងៃទី៩ ខែតុលា រហូតដល់ថ្ងៃទី១៣ ខែតុលា ហើយក្នុងឱកាសបុណ្យភ្ជុំឆ្នាំនេះ នៅតាមបណ្តាវត្តអារាមទំាងនៅភ្នំពេញ និងនៅតាមបណ្តាខេត្តសុទ្ធតែមានភាពសប្បាយរីករាយ និងមានប្រជាពលរដ្ឋច្រើនកុះករ ហើយប្រជាពលរដ្ឋដែលបានជិះរថយន្តក្រុងមានរាប់ម៉ឺននាក់ក្នុងមួយរដូវកាលបុណ្យទានម្តងៗ និងអាចសន្សំសោហ៊ុយរាប់លានដុល្លារដែរ៕ អត្ថបទ៖ គង់ រ៉េន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
