នៅថ្ងៃទី១៣ ខែតុលានេះ គឺជាថ្ងៃចុងក្រោយហើយ ដែលរដ្ឋបាលរាជធានីភ្នំពេញ បានដាក់ពង្រាយរថយន្តក្រុងសាធារណៈ ដើម្បីដឹកជញ្ជូនប្រជាពលរដ្ឋទៅស្រុកកំណើត និងវិលត្រឡប់មកវិញដោយឥតគិតថ្លៃក្នុងឱកាសបុណ្យភ្ជុំបិណ្ឌ បន្ទាប់ពីបានដំណើរការយ៉ាងរលូនចាប់តាំងពីថ្ងៃទី៩ ខែតុលាមក។
តាមរយៈការសម្ភាសន៍ផ្ទាល់ជាមួយអ្នកដំណើរមកពីបណ្តាខេត្តនានា ប្រជាពលរដ្ឋភាគច្រើនបានសម្តែងនូវក្តីរំភើប និងការដឹងគុណយ៉ាងជ្រាលជ្រៅចំពោះរាជរដ្ឋាភិបាល ដែលបានផ្ដល់រថយន្តក្រុងដឹកជញ្ជូនទាំងទៅនិងមកដោយឥតគិតថ្លៃ ដែលនេះឆ្លុះបញ្ចាំងពីការគិតគូរខ្ពស់ពីសុខទុក្ខ និងជីវភាពរបស់ប្រជាពលរដ្ឋគ្រប់មជ្ឈដ្ឋាន។
ក្រុមប្រជាពលរដ្ឋបានប្រាប់ព័ត៍មាន ប៊ីធីវី ដោយស្នាមញញឹមថា ពួកគាត់ពិតជាមានភាពសប្បាយរីករាយយ៉ាងខ្លាំង។ ការធ្វើដំណើរតាមរថយន្តក្រុងរបស់រដ្ឋ មិនត្រឹមតែតែជួយសន្សំថវិកាបានមួយចំណែកធំសម្រាប់គ្រួសារប៉ុណ្ណោះទេ ប៉ុន្តែថែមទាំងមានសុវត្ថិភាព ផាសុកភាព និងមិនបារម្ភរឿងរថយន្តឈ្នួលឡើងថ្លៃហួសហេតុក្នុងថ្ងៃបុណ្យទាននោះឡើយ។
ក្រុមប្រជាពលរដ្ឋបានលើកឡើងស្រដៀងគ្នាថា ក្រោយធ្វើដំណើរមកដល់រាជធានីភ្នំពេញភ្លាម ពួកគាត់នឹងត្រៀមខ្លួនចូលធ្វើការងារវិញភ្លែត។ ជាមួយនេះ ពួកគា់ក៏មិនបានភ្លេចថ្លែងអំណរគុណដល់អ្នកបើកបរ និងក្រុមការងារទាំងអស់ ដែលបានលះបង់ពេលវេលាផ្ទាល់ខ្លួន ដើម្បីមកបម្រើ និងសម្រួលការធ្វើដំណើររបស់ប្រជាពលរដ្ឋពេញមួយឱកាសបុណ្យភ្ជុំបិណ្ឌនេះផងដែរ។
លោក ជុំ ចន្នី បុគ្គលិករដ្ឋាករស្វយ័ត្នដឹកជញ្ជូនសាធារណៈនៃសាលារាជធានីភ្នំពេញ បានលើកឡើងថា ក្នុងឱកាសពិធីបុណ្យភ្ជុំបិណ្ឌនេះ ទោះបីជាមិនបានឈប់សម្រាកប៉ុន្តែលោកមានការសប្បាយចិត្ត ដែលបានចូលរួមបំពេញការងារសង្គមមួយនេះជូនដល់ប្រជាពលរដ្ឋ។ លោកក៏បានថ្លែង អំណរគុណ ដល់ប្រមុខរាជរដ្ឋាភិបាល ដែលតែងតែគិតគូរដល់ប្រជាពលរដ្ឋ តាមរយៈ ការផ្ដល់ឱ្យពលរដ្ឋបានជិះរថយន្តក្រុងឥតគិតថ្លៃក្នុងឱកាសបុណ្យភ្ជុំបិណ្ឌ និងសម្តែងការជូនពរដល់ជនរួមជាតិទាំងអស់ធ្វើដំណើរត្រឡប់មកពីស្រុកកំណើតវិញប្រកបដោយសុខសុវត្ថិភាពគ្រប់ៗគ្នា។
ការដាក់ឱ្យប្រើសេវាដឹកជញ្ជូនសាធារណៈដោយមិនគិតថ្លៃរបស់រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ បានរៀបចំរថយន្តក្រុងសរុបចំនួន ៦០០គ្រឿង រយៈពេល ៥ថ្ងៃ គិតចាប់ពីថ្ងៃទី៩ ដល់ថ្ងៃទី១៣ ខែតុលា ឆ្នាំ២០២៦ ដើម្បីជួយសម្រួលដល់ការចំណាយរបស់ប្រជាពលរដ្ឋទាំងអស់ ក្នុងការធ្វើដំណើរទៅលេងស្រុកកំណើតជួបជុំក្រុមគ្រួសារក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
