អ៊ុយក្រែន៖ ទាហានអ៊ុយក្រែនបន្ថែមទៀតត្រូវបានជម្លៀសចេញពីរោងចក្រដែក Azovstal ក្នុងទីក្រុង Mariupol កាលពីថ្ងៃពុធ។ រថយន្តក្រុងជាច្រើនគ្រឿងដែលអមដោយរថយន្តយោធារុស្ស៊ី ត្រូវបានគេមើលឃើញថាបានចាកចេញពីរោងចក្រដែក។
អ្នកប្រយុទ្ធអ៊ុយក្រែនបានដើរចេញពីរោងចក្រដែក Azovstal ដែលត្រូវបានបំផ្លាញ បន្ទាប់ពីត្រូវបានបញ្ជាដោយយោធារបស់ពួកគេឱ្យបោះបង់ចោល ទីតាំងលាក់ខ្លួនចុងក្រោយនៃការតស៊ូនៅក្នុងទីក្រុងកំពង់ផែ ខណៈពេលនេះប្រឈមទៅនឹងជោគវាសនាមិនច្បាស់លាស់។ អ្នកប្រយុទ្ធមួយចំនួនត្រូវបានរុស្ស៊ីនាំយកទៅកាន់ទីតាំង ក្នុងទឹកដីគ្រប់គ្រងដោយក្រុមផ្តាច់ខ្លួនគាំទ្រដោយទីក្រុងមូស្គូ។ ខណៈអ៊ុយក្រែនបាននិយាយថា ខ្លួនសង្ឃឹមថានឹងទទួលបានទាហានមកវិញនៅក្នុងការដោះដូរអ្នកទោស ស្របពេលដែលរុស្ស៊ីបានគំរាមដាក់ទាហានមួយចំនួនថា នឹងការកាត់ទោសពីបទឧក្រិដ្ឋកម្មសង្គ្រាម។ អង្គការលើកលែងទោសអន្តរជាតិបាននិយាយថា កាកបាទក្រហមគួរតែត្រូវបានផ្តល់សិទ្ធិដើម្បីចូលធ្វើការភ្លាមៗសម្រាប់អ្នកប្រយុទ្ធទាំងនេះ។
វាមិនច្បាស់នោះទេថា តើមានអ្នកប្រយុទ្ធប៉ុន្មាននាក់ទៀតដែលនៅសេសសល់ នៅខាងក្នុងបន្ទប់រូងក្រោមដី និងលេណដ្ឋានរបស់រោងចក្រ ជាកន្លែងដែលមនុស្ស 2,000នាក់ត្រូវបានគេជឿថាត្រូវបានជាប់នៅក្នុងនោះ។ មេដឹកនាំផ្តាច់ខ្លួនក្នុងតំបន់បាននិយាយថា គ្មានមេបញ្ជាការកំពូលណាម្នាក់បានលេចចេញពីរោងចក្រដែកនោះទេ។ ក្រសួងការពារជាតិរុស្ស៊ីបាននិយាយកាលពីថ្ងៃពុធថា ទាហានអ៊ុយក្រែន 694នាក់នៅរោងចក្រដែក Azovstal បានប្រគល់ខ្លួនពួកគេទៅឱ្យទាហានរុស្ស៊ីក្នុងរយៈពេល 24ម៉ោង។ អ្នកនាំពាក្យក្រសួងការពារជាតិរុស្ស៊ីឧត្តមសេនីយឯក Igor Konashenkov បាននិយាយថា ចំនួននេះនាំឱ្យចំនួនទាហានអ៊ុយក្រែនសរុប ដែលបានយល់ព្រមប្រគល់ខ្លួនចាប់តាំងពីថ្ងៃចន្ទមានចំនួនដល់ 959នាក់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
