ភ្នំពេញ៖ ប្រជាពលរដ្ឋចំនួន ៥៣៨គ្រួសារ ដែលមានសិទ្ធិទទួលដីឡូតិ៍ និងលំនៅឋានក្នុងគម្រោងទី១ នៃកម្មវិធី «ផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព» នឹងចាប់ផ្តើមចូលរស់នៅក្នុងលំនៅឋានថ្មីរបស់ខ្លួននៅខេត្តស្ទឹងត្រែង ចាប់ពីថ្ងៃទី២៦ ដល់ថ្ងៃទី៣០ ខែតុលា ឆ្នាំ២០២៦ បន្ទាប់ពីការរៀបចំហេដ្ឋារចនាសម្ព័ន្ធ សាងសង់ផ្ទះ និងបង្គន់អនាម័យត្រូវបានបញ្ចប់រួចរាល់។

សេចក្តីជូនដំណឹងរបស់លេខាធិការដ្ឋាននៃគណៈកម្មាធិការជាតិដឹកនាំអនុវត្តកម្មវិធីផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព (ផ.ក.អ) បានបញ្ជាក់ថា បន្ទាប់ពីលេខាធិការដ្ឋានបានរៀបចំ​ពិធី​ចាប់ឆ្នោតយកលេខដីឡូតិ៍​និងផ្ទះជូនបុគ្គលមានសិទ្ធិទទួល​បាន​ដីឡូតិ៍​និងផ្ទះចំនួន ៥៣៨គ្រួសារ ក្នុងគម្រោងទី១រួចមក និងបន្ទាប់ពីបានរៀបចំហេដ្ឋារចនាសម្ព័ន្ធរូបវ័ន្ត​និងសាងសង់ផ្ទះនិងបង្គន់អនាម័យបានរួចរាល់ លេខាធិការដ្ឋាន​និងរដ្ឋបាលខេត្តស្ទឹងត្រែងនឹងរៀបចំ​ក្រុមការងាររង់ចាំទទួលស្វាគមន៍ និងជូនទៅដល់ទីតាំង ដីឡូតិ៍និងផ្ទះ ចាប់ពីថ្ងៃទី២៦ ដល់ថ្ងៃទី៣០ ខែតុលា ឆ្នាំ២០២៦ ។

ដោយកំណត់តាមរាជធានី ខេត្តដូចខាងក្រោម៖

១).ថ្ងៃទី២៦ ខែតុលា ឆ្នាំ២០២៦ សរុប ១៥១គ្រួសារ រួមមាន៖ ខេត្តបាត់ដំបង (៥៦គ្រួសារ) ខេត្តស្ទឹងត្រែង (៦០គ្រួសារ) ខេត្តព្រះវិហារ (១៨គ្រួសារ) ខេត្តបន្ទាយមានជ័យ (១២គ្រួសារ) និងខេត្តកោះកុង (៥គ្រួសារ)។

២).ថ្ងៃទី២៧ ខែតុលា ឆ្នាំ២០២៦ សរុប ១១៩គ្រួសារ រួមមាន៖ ខេត្តកំពង់ចាម (៦៣គ្រួសារ) ខេត្តរតនគិរី (២៥គ្រួសារ) ខេត្តតាកែវ (១៦គ្រួសារ) ខេត្តកំពង់ធំ (១០គ្រួសារ) និងខេត្តឧត្តរមានជ័យ (៥គ្រួសារ)។

៣).ថ្ងៃទី២៨ ខែតុលា ឆ្នាំ២០២៦ សរុប ៩៨គ្រួសារ រួមមាន៖ ខេត្តត្បូងឃ្មុំ (៤៥គ្រួសារ) ខេត្តព្រៃវែង (២៣គ្រួសារ) ខេត្តសៀមរាប (១៣គ្រួសារ) ខេត្តកំពត (១២គ្រួសារ) និងខេត្តព្រះសីហនុ​ (៥គ្រួសារ)។

៤).ថ្ងៃទី២៩ ខែតុលា ឆ្នាំ២០២៦ សរុប ៩៣គ្រួសារ រួមមាន៖ ខេត្តក្រចេះ (៤៥គ្រួសារ) រាជធានីភ្នំពេញ​​ (២២គ្រួសារ) ខេត្តកំពង់ស្ពឺ (១២គ្រួសារ) ខេត្តស្វាយរៀង (១០គ្រួសារ) និងខេត្តប៉ៃលិន​ (៤គ្រួសារ)។

៥).ថ្ងៃទី៣០ ខែតុលា ឆ្នាំ២០២៦ សរុប ៧៧គ្រួសារ រួមមាន៖ ខេត្តកែប (១គ្រួសារ) ខេត្តកណ្តាល (៣៦គ្រួសារ) ខេត្តពោធិ៍សាត់ (១៩គ្រួសារ) ខេត្តមណ្ឌលគិរី (១៣គ្រួសារ) និងខេត្តកំពង់ឆ្នាំង (៨គ្រួសារ)៕