អ្នកនាំពាក្យរាជរដ្ឋាភិបាលបានថ្លែងឱ្យដឹងនៅថ្ងៃនេះថា លទ្ធផលស្ដីពីដំណោះស្រាយលើតំបន់ សមុទ្រត្រួតគ្នារវាងកម្ពុជា និងថៃ តាមយន្តការ UNCLOS នឹងត្រូវប្រកាសឱ្យដឹងនៅពេលឆាប់ៗខាងមុខនេះ។

លទ្ធផលស្ដីពីដំណោះស្រាយលើតំបន់សមុទ្រត្រួតគ្នារវាងកម្ពុជា និងថៃ តាមយន្តការ UNCLOS នឹងត្រូវប្រកាសឱ្យដឹងនៅពេលឆាប់ៗខាងមុខនេះ។ នេះបើតាមឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលថ្លែងឱ្យដឹងនៅថ្ងៃទី១៧ ខែតុលា ឆ្នាំ២០២៦។

អ្នកនាំពាក្យរូបនេះបញ្ជាក់បន្ថែមថា គោលបំណងរបស់កម្ពុជា​ ដែលនាំករណីវិវាទនៅតំបន់សមុទ្រនៃប្រទេសទាំងពីរទៅដោះស្រាយតាមយន្តការផ្សះផ្សាដោយបង្ខំតាមនីតិវិធីរបស់អង្គការសហប្រជាជាតិ គឺជាដំណោះស្រាយស្របតាមច្បាប់អន្តរជាតិ ដើម្បីប្រយោជន៍ប្រជាជននៃប្រទេសទាំងពីរ និងដើម្បីសន្តិភាព និងវិបុលភាពក្នុងតំបន់។

ឯកឧត្ដមបញ្ជាក់បន្ថែមថា ការចុះសន្ធិសញ្ញាជាមួយថៃ ដើម្បីកំណត់ដែនសមុទ្រតែមួយ ដែលគ្របដណ្ដប់លើគ្រប់គោលបំណងនៃប្រទេសទាំងពីរ គឺក្នុងគោលបំណងបែងចែកផលប្រយោជន៍ប្រកប ដោយសមធម៌ដល់ប្រទេសទាំងពីរ។

ឯកឧត្ដមក្រើនរម្លឹកថា ក្នុងករណីដែលមិនអាចសម្រេចបានតាមគោលបំណងនេះ កម្ពុជានឹងស្នើសុំគណៈកម្មការផ្សះផ្សា រៀបចំអនុសាសន៍ដែលអាចប្រើជាមូលដ្ឋានសម្រាប់ការចរចានាពេលអនាគតស្របតាមកាតព្វកិច្ចរបស់ប្រទេសទាំងពីរក្រោមនីតិវិធីរបស់ UNCLOS។

អ្នកនាំពាក្យរូបនេះរំលេចបន្ថែមថា កម្ពុជាសូមបញ្ជាក់ជាថ្មីនូវជំនឿទុកចិត្ត និងការគាំទ្រពេញទំហឹងចំពោះដំណើរការផ្សះផ្សានេះ ព្រមទាំងមានជំនឿយ៉ាងមុតមាំថា ច្បាប់អន្តរជាតិនឹងផ្ដល់ជាមូលដ្ឋានគ្រឹះសម្រាប់ដោះស្រាយវិវាទរវាងរដ្ឋ និងរដ្ឋតាមសន្តិវិធី។

លទ្ធផលនៃកិច្ចប្រជុំតាមយន្តការ UNCLOS ដើម្បីដោះស្រាយបញ្ហាដែនសមុទ្រត្រួតគ្នារវាងកម្ពុជា និងថៃ នឹងត្រូវគណៈកម្មការប្រកាសនៅពេលឆាប់ៗខាងមុខនេះ៕ ដោយ៖ គង់ ឌិន