ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាលបានអះអាងថា សុខភាពល្អ គឺ​ជា​ទ្រព្យ​សម្បត្តិ​ដ៏​មាន​តម្លៃបំផុតរបស់មនុស្ស និងគ្រួសារ។ ថ្ងៃនេះ យើងមិនត្រឹមតែផ្តល់​សេវា​ពិនិត្យ​ព្យាបាល​ និងវ៉ែនតាទេ ប៉ុន្តែយើងកំពុងផ្តល់ក្តីសង្ឃឹម ឱកាស និងភាពកក់ក្តៅជូនប្រជាពលរដ្ឋ។

ការថ្លែងរបស់ឯកឧត្តមសាស្រ្តាចារ្យ ឈាង រ៉ា យ៉ាងដូច្នេះ ក្នុងពិធីចុះពិនិត្យជំងឺទូទៅ សុខ​ភាព​ភ្នែក ​និងចែកវ៉ែនតា ជូនប្រជាពលរដ្ឋ ដែលរៀបចំឡើងនៅសាលាបឋមសិក្សាភ្នំពេញថ្មី ខណ្ឌ​សែន​សុខ រាជធានីភ្នំពេញ នាព្រឹកថ្ងៃសៅរ៍ ទី១៧ ខែតុលា ឆ្នាំ២០២៦។ ពិធីនេះមានការចូលរួមឯកឧត្តមសាស្ត្រាចារ្យ ម៉ម ប៊ុនហេង តំណាងរាស្រ្តមណ្ឌលរាជធានីភ្នំពេញ និង​ក្រុម​គ្រូពេទ្យស្ម័គ្រចិត្តសម្តេចអគ្គមហាសេនាបតីតេជោ ហ៊ុន សែន មកពីគ្រប់​បណ្តា​មន្ទីរ​ពេទ្យ​ជាតិ រដ្ឋបាលខណ្ឌសែនសុខ និងមូលនិធិ Fred Hollows ដែលបង្ហាញពីការចូលរួមយ៉ាងសកម្ម ក្នុង​ការលើកកម្ពស់សុខុមាលភាពប្រជាពលរដ្ឋ។

ឯកឧត្តម​សាស្រ្តា​ចារ្យរដ្ឋមន្រ្តី បានលើកឡើងទៀតថា ការនាំសេវាសុខាភិបាល​ទៅ​ជិត​ប្រជាពលរដ្ឋ គឺជាការប្រែក្លាយ​គោល​នយោបាយ​ទៅ​ជា​ផល​ប្រយោជន៍​ជាក់​ស្តែង​សម្រាប់​ប្រជា​ពលរដ្ឋ​។ ការជួយឱ្យមនុស្សម្នាក់មើលឃើញវិញ គឺជាការផ្តល់ឱកាសថ្មីដល់ជីវិតរបស់គាត់។ យើង​មិន​វាស់​សមិទ្ធផលត្រឹមចំនួនអ្នកបានពិនិត្យទេ ប៉ុន្តែវាស់តាមគុណភាពសេវា និងការផ្លាស់​ប្តូរ​ជីវិត​ប្រជា​ពលរដ្ឋ​។ សុខាភិបាលល្អ មិនមែនរង់ចាំតែអ្នកជំងឺមករកយើងទេ ប៉ុន្តែត្រូវខិតខំ​ទៅ​រក​អ្នក​ដែល​ត្រូវ​ការសេវា។ ការបង្ការជំងឺ និងការរកឃើញទាន់ពេល គឺជាការវិនិយោគលើសុខភាព គ្រួសារ និងអនាគតប្រទេសជាតិ។ការចុះពិនិត្យសុខភាពនាពេលនេះ ក្រោមការ​យក​ចិត្ត​ទុក​ដាក់រ​បស់​សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរបតី ហ៊ុន ម៉ាណែត នាយករដ្ឋមន្រ្តី នៃព្រះរាជា​ណា​ចក្រ​កម្ពុជា​ និងលោកជំទាវ ចំពោះសុខុមាលភាពរបស់ប្រជាពលរដ្ឋ។

ឯកឧត្តមសាស្រ្តាចារ្យរដ្ឋមន្រ្តី សូមលើកទឹកចិត្តប្រជាពលរដ្ឋ ក្នុងការលើកកម្ពស់សុខភាពទូទៅ និង​សុខភាពភ្នែកទទួលបានលទ្ធផលល្អប្រសើរ ដោយ៖ ១) ត្រូវយក​ចិត្ត​ទុក​ដាក់​ពិនិត្យ​សុខ​ភាព​ទូទៅ និងសុខភាពភ្នែក ជាពិសេសអ្នកមានជំងឺទឹកនោមផ្អែម និងលើសសម្ពាធឈាម។ ២) ត្រូវ​ថែ​រក្សា​សុខភាពទូទៅ តាមរយៈការរស់នៅប្រកបដោយអនាម័យ របបអាហារមានតុល្យភាព ហាត់​ប្រាណឱ្យ​បានទៀងទាត់ និងសម្រាកឱ្យបានគ្រប់គ្រាន់។ ៣) ការពារសុខភាពភ្នែក ដោយ​របប​អាហារ របៀបរស់នៅ អនាម័យភ្នែក និងត្រូវទទួលការពិនិត្យតាមដានបន្ត ប្រសិន​បើ​មាន​ការ​ប្រែប្រួល​គំហើញ។

សូមជម្រាបជូនថា ប្រជាពលរដ្ឋអញ្ជើញមកទទួលសេវាពិនិត្យសុខភាព សរុបចំនួន ៩២០៥​ករណី​ ក្នុងនោះមាន ផ្នែកសម្ភព, ផ្នែករោគស្រ្តី, ផ្នែកជំងឺទារក កុមារ, ផ្នែកត្រចៀក ច្រមុះ បំពង់ក និង​ចក្ខុ​រោគ, ផ្នែករូបភាពវេជ្ជសាស្រ្ត, ផ្នែកជំងឺបេះដូង, ផ្នែកជំងឺថ្លើម ក្រពះ ពោះវៀន, ផ្នែក​វះ​កាត់​ប្រព័ន្ធ​ប្រសាទ, ផ្នែកជំងឺទូទៅ, សុខភាពភ្នែក, ផ្នែករោគកុមារ, ផ្នែកសុខភាពមាត់ធ្មេញ, ផ្នែក​វះកាត់​តូច និងធំ ក្នុងករណីតម្រូវការវះកាត់ នឹងបញ្ជូនវះកាត់បន្តនៅមន្ទីរពេទ្យជាតិ៕ អត្ថបទ រដ្ឋា