នៅព្រឹកថ្ងៃទី១៩ ខែតុលា ឆ្នាំ២០២៦នេះ នៅវិមានសន្តិភាព សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានអញ្ជើញជួបពិភាក្សាជាមួយគណៈប្រតិភូចំនួនពីរក្រុមផ្សេងគ្នា ដើម្បីពង្រឹងទំនាក់ទំនងអន្តរជាតិ និងទាក់ទាញវិនិយោគបន្ថែមទៀតមកកាន់ប្រទេសកម្ពុជា។

ក្នុងជំនួបដំបូងនាព្រឹកនេះសម្ដេចធិបតី នាយករដ្ឋមន្រ្ដី បានអញ្ជើញជួបជាមួយ ឯកឧត្តម Gordan Grlic-Radman រដ្ឋមន្ត្រីក្រសួងការបរទេស និងកិច្ចការអឺរ៉ុប នៃសាធារណរដ្ឋក្រូអាស៊ី ក្នុងជំនួបសម្តែងការគួរសម និងពិភាក្សាការងារ។

សូមជម្រាបថា គិតត្រឹមខែតុលា ឆ្នាំ២០២៦នេះ ទំនាក់ទំនងទ្វេភាគីរវាង ព្រះរាជាណាចក្រកម្ពុជា និងសាធារណរដ្ឋក្រូអាស៊ី កំពុងមានភាពរីកចម្រើនយ៉ាងខ្លាំង និងឈានដល់របត់ប្រវត្តិសាស្ត្រថ្មីមួយ តាមរយៈការផ្លាស់ប្តូរទស្សនកិច្ចកម្រិតជាន់ខ្ពស់ និងការបង្កើនកិច្ចសហប្រតិបត្តិការជាក់ស្តែង។

ជាក់ស្ដែង ទស្សនកិច្ចផ្លូវការជាប្រវត្តិសាស្ត្រ របស់ឯកឧត្តមបណ្ឌិត Gordan Grlic-Radman រដ្ឋមន្ត្រីការបរទេស និងកិច្ចការអឺរ៉ុបនៃសាធារណរដ្ឋក្រូអាស៊ី បាននិងកំពុងអញ្ជើញមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី១៩ ដល់ថ្ងៃទី២០ ខែតុលា ឆ្នាំ២០២៦នេះ។ ក្នុងដំណើរទស្សនកិច្ចនេះ ឯកឧត្តមត្រូវបានអនុញ្ញាតឱ្យចូលក្រាបបង្គំគាល់ ព្រះមហាក្សត្រ នរោត្តម សីហមុនី និងចូលជួបសម្តែងការគួរសមជាមួយថ្នាក់ដឹកនាំកំពូលៗរបស់កម្ពុជា រួមមាន សម្តេចតេជោ ហ៊ុន សែន ប្រធានព្រឹទ្ធសភា សម្តេច ឃួន សុដារី ប្រធានរដ្ឋសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនាព្រឹកនេះ។

ជំបួបបន្ទាប់ សម្ដេចធិបតី នាយករដ្ឋមន្រ្ដី បានអញ្ជើញជួបជាមួយ លោកស្រី សិរីវឌ្ឍនា អ៊ីវ៉ា (Iwona Kmiecik) ស្ថាបនិក និងជាប្រធានក្រុមហ៊ុន IM Capital Holding ក្នុងជំនួបសម្តែងការគួរសម និងពិភាក្សាការងារ នៅវិមានសន្តិភាព។

ក្រុមហ៊ុន IM Capital Holding ជាក្រុមហ៊ុនវិនិយោគ និងអភិវឌ្ឍអចលនទ្រព្យ ដែលផ្តោតលើវិស័យបដិសណ្ឋារកិច្ច និងទេសចរណ៍ប្រណីតនៅកម្ពុជា ជាពិសេសនៅតំបន់កោះរ៉ុង ខេត្តព្រះសីហនុ។ សកម្មភាពសំខាន់ៗរបស់ក្រុមហ៊ុនរួមមាន ការវិនិយោគ និងអភិវឌ្ឍអចលនទ្រព្យ ការអភិវឌ្ឍគម្រោងសណ្ឋាគារ និងរមណីយដ្ឋាន ព្រមទាំងការគ្រប់គ្រងប្រតិបត្តិការអាជីវកម្មបដិសណ្ឋារកិច្ច៕