តបតាមការអញ្ជើញរបស់អគ្គព្រះរាជអាជ្ញានៃប្រទេសព្រុយណេ នៅព្រឹកថ្ងៃទី១៩ ខែតុលា ឆ្នាំ២០២៦ លោកជំទាវ ជា លាង អគ្គព្រះរាជអាជ្ញានៃ​មហាអយ្យការ​អមតុ​លាការ​កំពូល​នៃ​ព្រះរា​ជា​ណា​ចក្រ​កម្ពុជា បានដឹកនាំគណៈប្រតិភូជាន់ខ្ពស់នៃស្ថាប័នអយ្យការ ទៅចូលរួមកិច្ច​ប្រជុំ​អគ្គ​ព្រះរា​ជ​អាជ្ញា​/អគ្គរដ្ឋអាជ្ញាអាស៊ាន លើកទី១ និងសន្និសីទអគ្គព្រះរាជអាជ្ញា/អគ្គរដ្ឋអាជ្ញាអាស៊ាន-ចិន លើកទី១៦” ដែលប្រព្រឹត្តទៅចាប់ពីថ្ងៃទី១៩ ដល់ថ្ងៃទី២៣ ខែតុលា ឆ្នាំ២០២៦ នៅរាជធានី បា​ន​ដាស៊េរីបេហ្កាវ៉ាន់ ប្រទេសព្រុយណេ។

នៅក្នុងឱកាសអញ្ជើញចូលរួមកិច្ចប្រជុំនេះ លោកជំទាវអគ្គព្រះរាជអាជ្ញានឹងជួបពិភាក្សា ទ្វេ​ភាគី​ជាមួយឯកឧត្តម យ៉ីង យ៉ុង អគ្គរដ្ឋអាជ្ញានៃសាធារណរដ្ឋប្រជាមានិតចិន, ជំនួប​ទ្វេភាគី​ជាមួយ​អគ្គ​រដ្ឋ​អាជ្ញា​សិង្ហបុរី និងជួបទ្វេភាគីជាមួយអគ្គរដ្ឋអាជ្ញានៃសាធារណរដ្ឋសង្គមនិយមវៀតណាម។

ជំនួបទ្វេភាគីដែលគ្រោងរៀបចំឡើងនេះនឹងពិភាក្សាអំពីការពង្រឹង និង​ពង្រីក​កិច្ច​សហ​ប្រតិបត្តិ​ការ​រវាង​ស្ថាប័នអយ្យការក្នុងក្របខណ្ឌនៃការចែករំលែកព័ត៌មាន ឧត្តមានុវត្តន៍ការងារ បទពិសោធន៍ ចំណេះ​ដឹង បញ្ហាប្រឈម និងការសម្រេចបានរបស់កម្ពុជា ក្នុងការបន្តប្រយុទ្ធ​ប្រឆាំង​បង្ក្រាប​ឧក្រិដ្ឋកម្ម​ឆ្លងដែន ជាពិសេសការឆបោកតាមប្រព័ន្ធបច្ចេកវិទ្យា(Online Scams)ជាដើម៕