ក្រសួងមុខងារសាធារណៈ នៅព្រឹកថ្ងៃទី ២០ ខែតុលា ឆ្នាំ ២០២៦នេះ បាន​ចាប់​ផ្តើម​ដំណើរ​ការ​កំណែ ​សន្លឹកកិច្ចការប្រឡង គ្រូផ្អែកលើកិច្ចព្រមព្រៀងការងារ កម្រិតអនុវិទ្យាល័យ និង​វិទ្យាល័យ​។ ដំណើរការកំណែនៅថ្ងៃ នេះ អាចគ្រោងប្រកាសលទ្ធផលនៅចុងសប្តាហ៍ ដើម្បីអាច​ពង្រាយ​គ្រូ​ប​ង្រៀន នៅតាមទីតាំងសាលារៀនដែលខ្វះ គ្រូទាន់ពេលវេលា សម្រាប់​ការ​បើក​បវេសន​កាល​ឆ្នាំ​សិក្សា​ថ្មី នៅដើមខែវិច្ឆិកាខាងមុខ។

ការប្រឡងបានបិទបញ្ចប់ ការធ្វើកំណែបានចូលមកដល់។ ការប្រឡង ក៏ដូចជាការធ្វើកំណែ ធ្វើ​ឡើង​ក្រោម​នីតិវិធី កំណត់ច្បាស់លាស់ ដោយប្រកាន់ខ្ជាប់​គោល​ការណ៍​រើស​បេក្ខជន​ដែល​មាន​សមត្ថ​ភាព​ពិត​ប្រាកដ មិនផ្អែកលើខ្សែ បក្សពួក ឬសំណូកសូកប៉ាន់ជាដាច់ខាត។

ក្នុងការធ្វើកំណែនៅថ្ងៃនេះ ឯកឧត្តម សុខ សង្វារ រដ្ឋលេខាធិការ ក្រសួង​មុខងារ​សាធារណៈ​បញ្ជាក់​ថា ​ការធ្វើកំណែ ជាដំណាក់កាលសំខាន់ មិនអាចធ្វេសប្រហែសជាដាច់ខាត។ ការកែ ការ​បូកពិន្ទុ ការស្រង់ពិន្ទុ ការផ្ទៀងផ្ទាត់ ធ្វើ ឡើងជាច្រើនវគ្គច្រើនសារ ក្រោម​ការ​ពិនិត្យ​ពី​ផ្នែក​មួយ​ទៅ​ផ្នែក​មួយ​ ទើបឈានដល់ការប្រកាសលទ្ធផលជាផ្លូវការ។ ការទាមទារ អនុវត្តបែបនេះ គឺដើម្បី​ការ​ពារ​កំហុស​ឆ្គងណាមួយកើតឡើង។ ឯកឧត្តមបញ្ជាក់ថា ការបូកខុសត្រឹម ១ ពិន្ទុ អាចធ្វើ​ឱ្យ​បេក្ខជន បាត់បង់ឱកាស។

ភ្ជាប់ជាមួយនីតិច្បាស់លាស់ក្នុងដំណាក់កាលកំណែនេះ ក្រសួងមុខងារសាធារណៈ ក៏នៅ​តែ​ផ្តល់​ឱកាស​ដល់​បេក្ខជន អាចដាក់ពាក្យស្នើសុំពិនិត្យមើលលទ្ធផលរបស់ខ្លួនផងដែរ ក្រោយ​ប្រកាស​លទ្ធផល​។

ការប្រឡងនេះ គឺរើសគ្រូអនុវិទ្យាល័យចំនួន ១ ២០០នាក់ និងរើសគ្រូវិទ្យាល័យចំនួនវិទ្យាល័យ ១ ៨០០នាក់។ បេក្ខជនប្រឡងជាប់ ត្រូវចេញបង្រៀនភ្លាមៗ នៅបវេសនកាលឆ្នាំសិក្សាថ្មី ខែ​វិច្ឆិកា​ខាងមុខ។ ស្របគ្នានឹងការចេញបង្រៀនភ្លាមៗនេះ បេក្ខជនក៏ត្រូវសិក្សាគរុកោសល្យ នៅ​សាលា​គរុកោសល្យ ពីវិធីសាស្ត្របង្រៀន ក្រមសីលធម៌ និងភាព​ចាំបាច់​នានា​ក្នុង​នាម​ជា​គ្រូ​បង្រៀន៕ អត្ថបទ៖ គឹមហុក