ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ ប្រាប់BTV ព័ត៌មាន នាព្រឹកថ្ងៃទី២០ ខែឧសភា ឆ្នាំ២០២២នេះថា បងប្អូនប្រជាពលរដ្ឋអាយុចាប់ពី១៨ឆ្នាំ ដែលរស់នៅក្នុងមូលដ្ឋានរាជធានីភ្នំពេញ គិតត្រឹមព្រឹកនេះ បានមកទទួលវ៉ាក់សាំងបង្ការជំងឺកូវីដ-១៩ ដូសជំរុញទី៣ បានចំនួន១០៤% និងដូសជំរុញទី៤ បានជាង៧០%។

ឯកឧត្តមវេជ្ជបណ្ឌិត ងី មានហេង បន្តទៀតថា សព្វថ្ងៃ លោកគ្រូពេទ្យ អ្នកគ្រូពេទ្យទាំងអស់នៅតាម​មណ្ឌលសុខភាព មនី្ទរពេទ្យបង្អែកនានាក្នុងមូលដ្ឋានរាជធានីភ្នំពេញ បន្តផ្តល់សេវាចាក់វ៉ាក់សាំង​បង្ការ​ជំងឺកូវីដ-១៩ ចាប់ពីដូសទី១ ដូសទី២ ដូសទី៣ និងដូសទី៤ ព្រមទាំង​សហការ​ជាមួយ​អាជ្ញាធរភូមិ សង្កាត់ គ្រប់ខណ្ឌ ចុះចាក់វ៉ាក់សាំងបង្ការជំងឺកូវីដ-១៩​ ជូនបងប្អូនប្រជាពលរដ្ឋ ដែលរស់​នៅក្នុងតំបន់មិនរៀបរយ ពីផ្ទះមួយ ទៅផ្ទះមួយ ​គោលដៅប្រជុំជននានា និងតំបន់រោងចក្រ ដើម្បីឲ្យប្រជាពលរដ្ឋទទួលបានវ៉ាក់សាំងគ្រប់ចំនួន។

ជាមួយគ្នានោះដែរ បងប្អូនប្រជាពលរដ្ឋ បានមកចាក់វ៉ាក់សាំងបង្ការជំងឺកូវីដ-១៩ ដូសជំរុញ ពី​ក្រុម​ការងារ​គ្រូពេទ្យ​នៃមនី្ទរពេទ្យបង្អែករាជធានីភ្នំពេញ ​បានបង្ហាញពីកី្តរំភើបរីករាយ ដោយបានមក​ចាក់វ៉ាក់សាំង​គ្រប់ចំនួន ​និងមានអារម្មណ៍ថា សុវតិ្ថភាព។

នាឱកាសនោះឯកឧត្តម វេជ្ជបណ្ឌិត ងី មានហេង​ បញ្ជាក់ទៀតថា ​បច្ចុប្បន្នកុមារអាយុ៥ឆ្នាំឡើង ដែល​បានទទួលវ៉ាក់សាំងរួច ​ទាំងដូសទី១ និងដូសទី២ គឺបានចំនួន១០០%។

ទន្ទឹមនឹងនោះដោយសារដូសទី៣ ​ទើបតែដល់​វេន​ត្រូវ​ចាក់វ៉ាក់សាំងបង្ការជំងឺកូវីដ-១៩នាចុង​ខែមេសានេះ ដូចនេះមាតា បិតា​ អាណាព្យាបាលសូមអញ្ជើញនាំកូនៗ​មកចាក់វ៉ាក់សាំង ព្រោះ​ក្នុងរយៈពេល២០ថ្ងៃកន្លងមកនេះ ​ទើបតែមានកុមារ​ មកចាក់វ៉ាក់សាំង​ បានចំនួន៥%ប៉ុណ្ណោះ។ ដូច្នេះសូមឲ្យមាតា ​បិតា មានកូនអាយុ៥ឆ្នាំឡើង ដែលមិនទាន់នាំកូនមកចាក់វ៉ាក់សាំង​ដូស​ជំរុញទី៣ សូមរូតរះយកកូនៗមកចាក់វ៉ាក់សាំងតាមកាលកំណត់៕ អត្ថបទ៖ រដ្ឋា