នេះជាប្រសាសន៍ ឯកឧត្តម ហ៊ុន ម៉ានី អគ្គលេខាធិការនៃអគ្គធិការដ្ឋានគណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា ថ្លែងក្នុងបាឋកថាជាស៊េរី «កេរដំណែលរស់៖ គុណតម្លៃ ៧មករា» ក្រោមប្រធានបទ «ការចូលរួមក្នុងការងារមហាជន ដើម្បីបុព្វហេតុជាតិ និងប្រជាជនក្រោមការដឹកនាំរបស់សម្តេចតេជោ អគ្គមគ្គុទេសក៍ជាតិដ៏ឆ្នើម» របស់ឯកឧត្តមបណ្ឌិត អ៊ិត សំហេង នៅសាលប្រជុំ នៃវិមាន ៧ មករា។

ផ្សាភ្ជាប់នឹងការលើកឡើងខាងលើនេះ ឯកឧត្តម ហ៊ុន ម៉ានី បានបន្ថែមថា ក្នុងគោលបំណងចូលរួមពង្រឹងទស្សនៈឯកភាព ក្នុងការដឹកនាំបក្ស និងរដ្ឋ មេរៀនដែលឧទ្ទេសនាមដោយឥស្សរជនជាវាគ្មិន នឹងត្រូវបានចងក្រង និងរក្សាទុកជាឯកសារ សម្រាប់ការសិក្សា ស្រាវជ្រាវបណ្តុះបណ្តាល បំផុសគំនិត និងផ្ទេរបន្តទៅអ្នកបន្តវេនជំនាន់ក្រោយតទៅមុខរបស់គណបក្ស។

ឯកឧត្តមបានគូសបញ្ជាក់ថា បទពិសោធន៍ និងពុទ្ធិចែករំលែកដោយថ្នាក់ដឹកនាំ ជាចាស់ទុំ និងជាសាក្សីរស់ នៃប្រវត្តិសាស្រ្ត ដែលធ្លាប់បានឆ្លងកាត់មេរៀនជីវិត និងដំណើរតស៊ូក្នុងជីវិតការងារក្នុងរយៈពេលជាច្រើនទសវត្សរ៍ នៃការបំពេញភារកិច្ចបម្រើជាតិ មាតុភូមិ និងប្រជាជន គឺជាកញ្ចក់ឆ្លុះបញ្ចាំង និងជាត្រីវិស័យតម្រង់ទិសសម្រាប់ការអនុវត្តការងារតទៅមុខរបស់អ្នកជំនាន់ក្រោយ។