ក្លិបបាល់ទាត់ព្រះខ័នរាជស្វាយរៀង ត្រូវការពិន្ទុចាំបាច់ពីក្រុមម្ចាស់ផ្ទះ Tampines Rovers FC របស់សិង្ហបុរី ដើម្បីបន្តក្តីសង្ឃឹម និងរក្សាឱកាសប្រជែងកៅអីវគ្គបន្តនៃពានរង្វាន់កម្រិតទី២ អាស៊ី AFC Champions League Two ឆ្នាំ២០២៦/២៧។

នេះបើតាមការលើកឡើងរបស់ Matthew McConkey គ្រូបង្វឹកក្រុមព្រះខ័នរាជស្វាយរៀង មុនក្រុមជើងឯកលីគកំពូលកម្ពុជា បានធ្វើដំណើរឆ្ពោះទៅប្រទេសសិង្ហបុរី កាលពីថ្ងៃអង្គារ ដើម្បីត្រៀមជួបក្រុម Tampines Rovers នាល្ងាចថ្ងៃទី២៩ ខែតុលាស្អែក នៅកីឡដ្ឋាន Jalan Besar។

នេះគឺជាការប្រកួតដ៏សំខាន់សម្រាប់ក្រុមទាំងពីរ ដែលពុំទាន់ស្គាល់ជ័យជម្នះក្នុងពូល G នៃពានរង្វាន់កម្រិតទី២ ប្រចាំទ្វីបអាស៊ីនេះ ពិសេសព្រះខ័នរាជស្វាយរៀង ក្រោយឆ្លងកាត់ ២ប្រកួតទើបរកបាន ១ពិន្ទុ តាមពីក្រោយក្រុម Machida Zelvia របស់ជប៉ុន ដែលរកបាន ៦ពិន្ទុពេញ និងក្រុម Shanghai Shenhua របស់ចិន ឈរលេខ២ មាន ៤ពិន្ទុ តែឈរលើក្រុម Tampines Rovers ដែលមិនទាន់មានពិន្ទុឡើយ ក្រោយបរាជ័យ ២ប្រកួតជាប់គ្នា។

បែបនេះក្ដីលោក Matthew McConkey បានចាត់ទុក Tampines Rovers គឺជាគូប្រជែងដ៏ពិបាកស្មាន ដោយពេលខ្លះពួកគេអាចលេងដាក់សម្ពាធ ហើយពេលខ្លះពួកគេអាចលេងការពារ ដែលអាចផ្ដល់នូវការលំបាកសម្រាប់ព្រះខ័នរាជស្វាយរៀង តែយ៉ាងណាលោកនឹងព្យាយាមស្វែងរកពិន្ទុឲ្យបានដើម្បីរក្សាឱកាសឆ្លងទៅវគ្គបន្ដ ហើយក្រុមក៏បានត្រៀមខ្លួនរួចរាល់ សម្រាប់ជំនួបដ៏សំខាន់នេះ ដើម្បីទទួលបានលទ្ធផលល្អ និងធ្វើឲ្យអ្នកគាំទ្រមានមោទនភាពផងដែរ។

គួរដឹងថា នេះគឺជាជំនួបបញ្ចប់ជុំទី១ ក្នុងយុទ្ធនាការប្រកួតប្រកួតពានរង្វាន់ប្រចាំទ្វីបអាស៊ីមួយនេះ មុនបន្ដការប្រកួតជុំទី២ ដោយព្រះខ័នរាជស្វាយរៀង នឹងត្រូវបើកទ្វារពហុកីឡដ្ឋានជាតិមរតកតេជោ ស្វាគមន៍ក្រុមTampines Rovers វិញម្ដង នាថ្ងៃទី៥ ខែវិច្ឆិកា និងបន្ដទទួលក្រុមខ្លាំងជប៉ុន Machida Zelvia នាថ្ងៃទី២៦ ខែវិច្ឆិកា និងចុងក្រោយព្រះខ័នរាជស្វាយរៀង ត្រូវធ្វើដំណើរទៅជួបក្រុមម្ចាស់ផ្ទះ Shanghai Shenhua នាថ្ងៃទី៣ ខែធ្នូ ឆ្នាំ២០២៦ ខាងមុខ ហើយក្រុមឈរលេខ១ និងលេខ២ នឹងត្រូវឡើងទៅវគ្គបន្ដ៕ អត្ថបទ លី ឈុនឡា