តាកែវ៖ បច្ចុប្បន្ន ខេត្តតាកែវមានរោងចក្រ និងសហគ្រាសជាង ១ពាន់កន្លែង ដែល​កំពុង​ផ្តល់​ការ​ងារ​ជូន​ប្រជាពលរដ្ឋប្រមាណ ១៨ម៉ឺននាក់។ ទន្ទឹមនឹងនេះ ខេត្តនេះ ក៏កំពុង​មាន​តម្រូវ​ការ​កម្លាំង​ពលកម្ម​បន្ថែម​ជិត ១ម៉ឺននាក់ ដោយអាជ្ញាធរ​ខេត្ត​អំពាវ​នាវ​ដល់​ប្រជា​ពលរដ្ឋ​ដែល​កំពុង​ស្វែង​រក​ការ​ងារ​ធ្វើ ឱ្យចូលបម្រើការងារនៅតាមរោងចក្រ និងសហគ្រាសទាំងអស់នោះ។

ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានបញ្ជាក់ថា គិតមក​ដល់​ពេល​នេះ ​ខេត្តតាកែវមានរោងចក្រ និងសហគ្រាសសរុបជាង ១ ០០០ កន្លែង ដែល​មាន​កម្លាំង​ពលកម្ម​ប្រមាណ ​១៨ម៉ឺននាក់។ ក្នុងចំណោមនោះ រោងចក្រកាត់ដេរមានចំនួនច្រើនជាងគេ។ ឯកឧត្តម​​បាន​បន្ត​ថា បច្ចុប្បន្ន ខេត្តតាកែវកំពុងមានតម្រូវការកម្លាំងពលកម្មប្រមាណជិត ១ម៉ឺននាក់។ ដូច្នេះ ប្រជាពលរដ្ឋដែលកំពុងស្វែងរកការងារធ្វើ អាចដាក់​ពាក្យ​ស្នើ​សុំ​ចូល​បម្រើ​ការងារ​នៅ​តាម​រោង​ចក្រ​ និងសហគ្រាសនានាក្នុងខេត្តនេះ។

ជាមួយគ្នានេះ ឯកឧត្តម វ៉ី សំណាង ក៏បានអំពាវនាវ​ដល់​ប្រជាពលរដ្ឋ​ខ្មែរ​ដែល​ធ្លាប់​ទៅ​ធ្វើ​ការ​នៅ​ក្រៅ​ប្រទេស ឱ្យពិចារណាវិលត្រឡប់មកស្វែងរកការងារធ្វើក្នុងស្រុកវិញ ខណៈដែល​ការ​ងារ​ជា​ច្រើន​កំពុងរង់ចាំ។ ការអំពាវនាវនេះធ្វើឡើងក្នុងបរិបទដែលប្រជាពលរដ្ឋមួយចំនួនបានវិលត្រឡប់មកកម្ពុជាវិញ បន្ទាប់ពីមានសង្គ្រាមឈ្លានពានថៃមកលើទឹកដីកម្ពុជា។

ឯកឧត្តមមានប្រសាសន៍ថា៖ «នាពេលកន្លងមក នៅពេលដែលមានសង្គ្រាមឈ្លានពានរបស់សៀមមកលើទឹកដីនៃព្រះរាជាណាចក្រកម្ពុជា ប្រជាពលរដ្ឋមួយចំនួនធំបានវិលត្រឡប់មកកម្ពុជាវិញ។ ឆ្លៀតឱកាសនេះ ខ្ញុំសូមអំពាវនាវដោយទទូចដល់បងប្អូន កូនក្មួយដែលធ្លាប់ធ្វើការនៅប្រទេសគេ សូមវិលមករកការងារធ្វើក្នុងស្រុកយើងវិញ ព្រោះមានការងារច្រើនកំពុងរង់ចាំ»។

ជាមួយគ្នានេះ សម្រាប់ប្រជាពលរដ្ឋដែលមិនទាន់មានជំនាញវិជ្ជាជីវៈ ឯកឧត្តមបានណែនាំឱ្យចុះឈ្មោះចូលរៀនវគ្គបណ្តុះបណ្តាលជំនាញវិជ្ជាជីវៈដោយឥតគិតថ្លៃ នៅវិទ្យាស្ថានពហុបច្ចេកទេសភូមិភាគតេជោសែនតាកែវ។ កម្មវិធីបណ្តុះបណ្តាលនេះក៏ផ្តល់អាហារ និងកន្លែងស្នាក់នៅដល់សិក្ខាកាម ផងដែរ។ ឯកឧត្តមបានអំពាវនាវឱ្យប្រជាពលរដ្ឋដែលចាប់អារម្មណ៍ចង់ទទួលបានការងារ ឬចង់បង្កើនជំនាញវិជ្ជាជីវៈ អញ្ជើញទៅកាន់វិទ្យាស្ថាន ដើម្បីចុះឈ្មោះចូលរៀន និងត្រៀមខ្លួនចូលទីផ្សារការងារ។

របាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ចំនួនរោងចក្រ និងសហគ្រាសនៅកម្ពុជាបានកើនឡើងដល់ ៤៧.០២៩ កន្លែង កើនឡើង ៣៨០ កន្លែង បើធៀបនឹងឆ្នាំមុន ដែលមានចំនួន ៤៦.៦៤៩ កន្លែង។ ជាមួយគ្នានេះ ចំនួនការងារសរុបបានកើនឡើងដល់ ២.៣ លាននាក់ កើនឡើងប្រមាណ ១០០.០០០ នាក់ បើធៀបនឹងឆ្នាំមុន ដែលមានចំនួនជាង ២.២ លាននាក់៕