ក្លិបព្រះខ័នរាជស្វាយរៀង របស់កម្ពុជា នឹងត្រូវជួបក្រុមផ្ទះ Tampines Rovers FC របស់សិង្ហបុរី នាវេលាម៉ោង ៥ល្ងាចថ្ងៃទី២៩ ខែតុលា ឆ្នាំ២០២៦ ត្រូវនឹងពេលវេលានៅកម្ពុជា ក្នុងជំនួបជើងទី១ នៃការប្រកួតបាល់ទាត់ដណ្ដើមពានរង្វាន់កម្រិតទី២ ទ្វីបអាស៊ី AFC Champions League Two ឆ្នាំ២០២៦/២៧ ពូលG នៅកីឡដ្ឋាន Jalan Besar។

ថ្លែងក្នុងសន្និសីទសារព័ត៌មានមុនការប្រកួតលោក Matthew McConkey គ្រូបង្វឹកក្រុមព្រះខ័នរាជស្វាយរៀង នៅតែរក្សាជំហរដដែល ពោលគឺមិនខុសពីការប្រកួតកន្លងមកទល់ក្រុមប៉ុន Machida Zelvia ក៏ដូចជាក្រុម Shanghai Shenhua របស់ចិនឡើយ ពោលគឺក្រុមព្យាយាមធ្វើ និងលេងតាមការរៀបចំឲ្យបានខ្លាំងបំផុត ពិសេសគឺការព្យាយាមគ្រប់គញរងការប្រកួត តាមរយៈការគ្រប់គ្រងបាល់ ក៏ដូចជាការព្យាយាមបង្កើតឱកាសឲ្យបានច្រើនតាមដែលអាចធ្វើបាន។

យ៉ាងណាលោកចាត់ទុកជំនួបទល់ក្រុម Tampines Rovers FC នៅតែជាជំនួបដ៏លំបាក ដ្បិតក្រុមខ្លាំងរបស់សិង្ហបុរីមួយនេះ គឺជាក្រុមពិបាកស្មានអំពីយុទ្ធសាស្ដ្រនៃការរៀបចំ ហើយពួកគេក៏អាចធ្វើរឿងភ្ញាក់ផ្អើលជាច្រើនដែរ គ្រាន់តែអ្វីដែលជាចំណុចដូចគ្នា គឺក្រុមទាំងពីរ ពុំមានពេលច្រើនដើម្បីរៀបចំក្រុមដូចគ្នា។ ដូច្នេះព្រះខ័នរាជស្វាយរៀង នឹងព្យាយាមរៀបចំគ្រប់យ៉ាងជាមួយកីឡាករ បន្ទាប់ពីអាជ្ញាកណ្ដាលផ្លុំកញ្ចែ ដើម្បីប្រជែង ៣ពិន្ទុ ព្រោះជាពិន្ទុដ៏សំខាន់ និងជាក្ដីសង្ឃឹមដើម្បីបន្ដដំណើរទៅមុខ។

ដោយឡែកកីឡាករ Rui Pires ខ្សែប្រយុទ្ធព្រះខ័នរាជស្វាយរៀង បានលើកឡើងស្រដៀងគ្នានឹងគ្រូបង្វឹក ទោះបីត្រូវប្រឈមក្រុមដែលពិបាកស្មាន តែអ្វីដែលសំខាន់ គឺការដឹងពីយុទ្ធសាស្ដ្រដែលក្រុមត្រូវប្រើ ជាមួយការត្រៀមខ្លួនរួចរាល់ ដើម្បីដណ្ដើម ៣ពិន្ទុ ព្រោះនេះគឺជាការប្រកួតដ៏សំខាន់របស់ក្រុម ហើយក៏សង្ឃឹមថា អ្នកគាំទ្រវិស័យកីឡាបាល់ទាត់កម្ពុជា នឹងគាំទ្រការប្រកួតនេះ ទោះបីមិនបានចូលរួមទស្សនាផ្ទាល់ គ្រាដែលក្រុមនឹងព្យាយាមដើម្បីដណ្ដើម ៣ពិន្ទុត្រឡប់មកកម្ពុជាវិញ។

គួរដឹងថា ១សប្ដាហ៍ក្រោយជំនួជំនួបជុំទី១ នេះ ក្លិបព្រះខ័នរាជស្វាយរៀង នឹងត្រូវបើកទ្វារពហុកីឡដ្ឋានជាតិមរតកតេជោ ស្វាគមន៍ក្រុម Tampines Rovers FC វិញម្ដង នាថ្ងៃទី៥ ខែវិច្ឆិកា មុនបន្ដទទួលស្វាគមន៍ក្រុមខ្លាំងជប៉ុន Machida Zelvia នាថ្ងៃទី២៦ ខែវិច្ឆិកា និងចុងក្រោយព្រះខ័នរាជស្វាយរៀង ត្រូវធ្វើដំណើរទៅជួបក្រុមម្ចាស់ផ្ទះ Shanghai Shenhua នាថ្ងៃទី៣ ខែធ្នូ ឆ្នាំ២០២៦ ខាងមុខ ដើម្បីស្វែងរកក្រុមលេខ១ និងលេខ២ ក្នុងពូលឡើងទៅវគ្គបន្ដ៕ អត្ថបទ លី ឈុនឡា