ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានក្រាបបង្គំថ្វាយនូវកតញ្ញូតាធម៌ និងកតវេទិតាធម៌យ៉ាងជ្រាលជ្រៅបំផុត ថ្វាយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចំពោះព្រះថាមពលដ៏ខ្លាំងក្លា និងព្រះរាជបញ្ញាញាណដ៏ឈ្លាសវៃក្នុងការបំពេញនូវព្រះរាជកិច្ចដ៏វិសេសវិសាលថ្លៃថ្លា ប្រកបដោយទសពិធរាជធម៌មិនអាចកាត់ថ្លៃបាន និងព្រះព្រហ្មវិហារធម៌ដ៏ទូលំទូលាយក្នុងការលើកកម្ពស់កិត្យានុភាពជាតិលើឆាកអន្តរជាតិ។

សម្តេចធិបតី ហ៊ុន ម៉ាណែត បានក្រាបបង្គំថ្វាយបែបនេះ តាមរយៈសារលិខិតថ្វាយព្រះពរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅក្នុងព្រះរាជឱកាសខួបលើកទី២២ នៃព្រះរាជពិធីគ្រងព្រះបរមសិរីរាជសម្បត្តិ ត្រូវនឹងថ្ងៃទី២៩ ខែតុលា ឆ្នាំ២០២៦នេះ។

តាមរយៈសារលិខិតថ្វាយព្រះពរ សម្ដេចធិបតី និងភរិយា តាងនាមរាជរដ្ឋាភិបាលនៃព្រះរាជាណាចក្រកម្ពុជា មន្ត្រីរាជការទូទាំងប្រទេស កងកម្លាំងប្រដាប់អាវុធគ្រប់ប្រភេទព្រះបរមរាជានុញ្ញាតដ៏ខ្ពង់ខ្ពស់ សូមក្រាបអភិវន្ទ លំឱនកាយវាចាចិត្តថ្វាយនូវមនោសញ្ចេតនាដ៏រំភើបរីករាយឥតឧបមា និងសូមចូលរួមថ្វាយនូវព្រះសព្ទសាធុការពរជ័យ បវរសួស្តី សិរីមង្គល វិបុលសុខ មហាប្រសើរគ្រប់ប្រការ ថ្វាយចំពោះ ព្រះករុណាថ្លៃវិសេសជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់សមប្រកបដោយព្រះរាជបញ្ញាញាណភ្លឺថ្លាត្រចះត្រចង់ ព្រះកាយពលរឹងមាំខ្លាំងក្លា ព្រះរាជសុខភាពល្អបរិបូរណ៍ ព្រះជន្មាយុយឺនយូរជាងរយព្រះវស្សា ចាកផុតពីព្រះរោគា ព្យាធិនានា ដើម្បីព្រះអង្គទ្រង់គង់ប្រថាប់នៅក្នុងព្រះបរមសិរីរាជសម្បត្តិ បំពេញព្រះរាជតួនាទីដ៏ឧត្តុង្គឧត្តមថ្លៃថ្លា ជានិមិត្តរូបនៃឯកភាពជាតិ និងនិរន្តរភាពជាតិ ព្រមទាំងជាម្លប់ដ៏ត្រជាក់ត្រជំ និងសេចក្តីសុខក្សេមក្សាន្ត ចម្រុងចម្រើន រុងរឿងដល់ប្រជានុរាស្ត្ររបស់ព្រះអង្គ ជាអង្វែងតរៀងទៅ។

ក្នុងព្រះរាជឱកាសដ៏មហាសិរីមង្គលឧត្តុង្គឧត្តមថ្លៃថ្លានេះ សម្ដេចធិបតី ក៏សូមព្រះបរមរាជានុញ្ញាត ក្រាបបង្គំថ្វាយនូវកតញ្ញូតាធម៌ និងកតវេទិតាធម៌យ៉ាងជ្រាលជ្រៅបំផុត ថ្វាយព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ចំពោះព្រះថាមពលដ៏ខ្លាំងក្លា និងព្រះរាជបញ្ញាញាណដ៏ឈ្លាសវៃ ក្នុងការបំពេញនូវព្រះរាជកិច្ចដ៏វិសេសវិសាលថ្លៃថ្លាប្រកបដោយទសពិធរាជធម៌មិនអាចកាត់ថ្លៃបាន និងព្រះព្រហ្មវិហារធម៌ដ៏ទូលំទូលាយ ក្នុងការលើកកម្ពស់កិត្យានុភាពជាតិលើឆាកអន្តរជាតិ តាមរយៈការលើកកម្ពស់ និងពង្រឹងពង្រីកទំនាក់ទំនងការទូត វប្បធម៌ និងប្រជាជន ព្រមជាមួយនឹងការជំរុញកិច្ចអភិវឌ្ឍសង្គម សេដ្ឋកិច្ចឱ្យរឹតតែមានភាពរីកចម្រើន ជឿនលឿន ដោយព្រះអង្គទ្រង់គង់ជាព្រះប្រមុខរដ្ឋជាតំណាងនៃឯកភាពជាតិ ការបង្រួបបង្រួមជាតិ និរន្តរភាពជាតិ ស្ថិរភាព វឌ្ឍនភាព និងសុខសន្តិភាព ព្រមទាំងជាម្លប់ដ៏ត្រជាក់ត្រជំថ្កុំថ្កើងរុងរឿងរបស់មាតុភូមិ និងប្រជានុរាស្ត្ររបស់ព្រះអង្គ។

ទូលព្រះបង្គំជាខ្ញុំទាំងអស់គ្នា ព្រមទាំងប្រជាពលរដ្ឋខ្មែរទូទាំងប្រទេស សូមក្រាបបង្គំថ្វាយនូវកតញ្ញូតាធម៌ ដ៏ជ្រាលជ្រៅបំផុត និងចងចាំជានិច្ចនូវព្រះមហាករុណាទិគុណ ព្រមទាំងព្រះរាជហឫទ័យដ៏វិសេសវិសាលឧត្តុង្គ ឧត្តមរបស់ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គជានិច្ចកាល តែងយកព្រះទ័យទុកដាក់ ព្រួយបារម្ភ គិតគូរ និងនៅរួមសុខរួមទុក្ខជាមួយប្រជាពលរដ្ឋ វីរកងទ័ពជួរមុខ និង វីរនគរបាលក្នុងគ្រប់កាលៈទេសៈ ព្រមទាំងព្រះទ័យជ្រះថ្លាបរិសុទ្ធប្រោសព្រះរាជទាននូវព្រះរាជទ្រព្យយ៉ាងច្រើនជា បន្តបន្ទាប់ ក្នុងព្រះរាជសកម្មភាពមនុស្សធម៌ទំនុកបម្រុងជាច្រើន តាមរយៈការជំរុញការអភិវឌ្ឍប្រទេសជាតិលើគ្រប់ វិស័យ ការលើកកម្ពស់វិស័យធម្មការនិងសាសនា អប់រំសិក្សាធិការ វប្បធម៌ សុខុមាលភាព សង្គមកិច្ច យុទ្ធនាការ បោសសម្អាតមីននៅកម្ពុជា ការជួយសម្រាលទុក្ខលំបាករបស់ប្រជាពលរដ្ឋពីគ្រោះធម្មជាតិ ព្រមទាំងការកសាង សមិទ្ធផលសង្គមជាច្រើន ដែលបានលើកកម្ពស់ជីវភាពរស់នៅរបស់ប្រជានុរាស្ត្រនៅទូទាំងព្រះរាជាណាចក្រកម្ពុ ប្រកបដោយសេចក្តីសុខក្សេមក្សាន្ត ចម្រុងចម្រើន និងរុងរឿង។

ជាថ្មីម្តងទៀត សម្ដេចធិបតី និងមន្រ្ដីរាជការនៃរាជរដ្ឋាភិបាលនីតិកាលទី៧នេះទាំងអស់គ្នា សូមព្រះបរមរាជានុញ្ញាតដ៏ខ្ពង់ខ្ពស់សូមលើកហត្ថប្រណម្យ បួងសួងដល់គុណបុណ្យព្រះរតនត្រ័យ គុណកែវទាំងបី វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាព្រះមហា ស្វេតច្ឆត្រ បុណ្យបារមីនៃដួងព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ ជាពិសេស បុណ្យបារមីនៃដួងព្រះវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ និងទេវតា ថែរក្សាឆ្នាំមមី អដ្ឋស័ក ព្រះនាម រាក្យសាទេវី សូមតាមជួយថែរក្សា ការពារ អភិបាល ប្រោះព្រំនូវព្រះសព្ទសាធុការ ពរជ័យគ្រប់ប្រការ និងសូមព្រះករុណាថ្លៃវិសេស ព្រះអង្គទ្រង់បានសមប្រកបដោយព្រះពុទ្ធពរដ៏ឧត្តុង្គឧត្តមថ្លៃថ្លា ទាំងបួនប្រការគឺ អាយុ វណ្ណៈ សុខៈ និងពលៈ ជាភិយ្យោភាពតរៀងទៅ៕