អ្នកជំនាញផ្នែកសេដ្ឋកិច្ច យល់ឃើញថា ការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ របស់កម្ពុជា ត្រូវបានចាត់ទុកថាជាឱកាសដ៏សំខាន់ក្នុងការផ្សព្វផ្សាយសក្តានុពលសេដ្ឋកិច្ច បរិយាកាសវិនិយោគ និងគោលដៅទេសចរណ៍របស់កម្ពុជាទៅកាន់ឆាកអន្តរជាតិ តាមរយៈការចូលរួមរបស់ថ្នាក់ដឹកនាំ និងគណៈប្រតិភូពីបណ្តាប្រទេស និងរដ្ឋាភិបាលក្នុងសហគមន៍ហ្វ្រង់កូហ្វូនី។ ព្រឹត្តិការណ៍នេះក៏អាចបើកឱកាសឱ្យកម្ពុជាពង្រឹងទំនាក់ទំនងពាណិជ្ជកម្ម ទាក់ទាញដៃគូវិនិយោគថ្មីៗ និងពង្រីកទីផ្សារសម្រាប់ផលិតផលក្នុងស្រុកផងដែរ។

កិច្ចប្រជុំកំពូលហ្វ្រង់កូហ្វូនីលើកទី២០ នឹងប្រព្រឹត្តទៅនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៦ ដោយមានការចូលរួមពីថ្នាក់ដឹកនាំ និងគណៈប្រតិភូនៃប្រទេសជាសមាជិក ព្រមទាំងដៃគូពាក់ព័ន្ធ។ លោកបណ្ឌិត សួន ម៉ិ ប្រធានសមាគមសហគ្រិន វីម៉ូ កម្ពុជា (VMOVE Cambodia) បានមើលឃើញថា កិច្ចប្រជុំកំពូលហ្វ្រង់កូហ្វូនីលើកទី២០ គឺជាព្រឹត្តិការណ៍អន្តរជាតិដ៏មានសារៈសំខាន់មួយសម្រាប់កម្ពុជា ដោយសារសហគមន៍ហ្វ្រង់កូហ្វូនីមានប្រទេសជាសមាជិក និងដៃគូជាច្រើន ដែលអាចបង្កើតឱកាសថ្មីៗសម្រាប់ការវិនិយោគ ពាណិជ្ជកម្ម និងកិច្ចសហប្រតិបត្តិការសេដ្ឋកិច្ច។

លោកបណ្ឌិតបានបញ្ជាក់ថា ការធ្វើជាម្ចាស់ផ្ទះនៃកិច្ចប្រជុំកំពូលនេះ គឺជាឱកាសដ៏មានតម្លៃសម្រាប់កម្ពុជាក្នុងការបង្ហាញពីសក្តានុពលសេដ្ឋកិច្ច ការរីកចម្រើននៃហេដ្ឋារចនាសម្ព័ន្ធ និងបរិយាកាសវិនិយោគ ព្រមទាំងពង្រឹងទំនាក់ទំនងជាមួយដៃគូអន្តរជាតិ។ ជាពិសេស កម្ពុជាអាចប្រើប្រាស់វេទិកានេះដើម្បីផ្សព្វផ្សាយពីវិស័យដែលមានសក្តានុពលទាក់ទាញវិនិយោគិន ដូចជា កសិកម្ម និងកសិ-ឧស្សាហកម្ម ការកែច្នៃកសិផល ឧស្សាហកម្ម និង ទេសចរណ៍ និង បច្ចេកវិទ្យាឌីជីថល ដែលវិស័យទាំងនេះសុទ្ធតែជាផ្នែកដែលកម្ពុជាកំពុងផ្តល់អាទិភាពក្នុងការអភិវឌ្ឍ និងជំរុញការវិនិយោគ។

លោកបណ្ឌិតមើលឃើញទៀតថា ក្រៅពីការទាក់ទាញទុនវិនិយោគពីបរទេស កិច្ចប្រជុំកំពូលនេះក៏អាចផ្តល់អត្ថប្រយោជន៍ដល់សហគ្រាសធុនតូច និងមធ្យម (SMEs) របស់កម្ពុជា តាមរយៈការភ្ជាប់ទំនាក់ទំនងរវាងសហគ្រិន វិនិយោគិន និងដៃគូពាណិជ្ជកម្មអន្តរជាតិ ជាមួយសហគ្រាសក្នុងស្រុកអាចស្វែងរកអតិថិជនថ្មីៗ ពង្រីកទីផ្សារនាំចេញ ស្វែងរកប្រភពវត្ថុធាតុដើម និងបច្ចេកវិទ្យាទំនើប ព្រមទាំង សិក្សាពីបទពិសោធន៍ក្នុងការគ្រប់គ្រងអាជីវកម្ម ការកែលម្អគុណភាពផលិតផល និងការបង្កើនផលិតភាព។

លោកបណ្ឌិតបានសង្កត់ធ្ងន់ថា កិច្ចប្រជុំកំពូលហ្វ្រង់កូហ្វូនីលើកទី២០ មិនត្រឹមតែជាឱកាសសម្រាប់កម្ពុជាបង្ហាញមុខមាត់ប្រទេសនៅលើឆាកអន្តរជាតិប៉ុណ្ណោះទេ ប៉ុន្តែក៏ជាឱកាសសម្រាប់វិស័យឯកជន និងសហគ្រាសធុនតូច និងមធ្យមក្នុងស្រុក ចាប់យកផលប្រយោជន៍ពីកិច្ចសហប្រតិបត្តិការថ្មីៗ ដើម្បីពង្រឹងសមត្ថភាពប្រកួតប្រជែង បង្កើនផលិតភាព និងជំរុញកំណើនសេដ្ឋកិច្ចប្រកបដោយចីរភាពផងដែរ។

សូមបញ្ជាក់ថា អង្គការអន្តរជាតិហ្វ្រង់កូហ្វូនី (OIF) មានទំហំសេដ្ឋកិច្ចសរុប (GDP Nominal) ប្រមាណ ១៨,២៨ ទ្រីលានដុល្លារអាមេរិក ដែលស្មើនឹងប្រហែល ១៦% ទៅ ២៥% នៃផលិតផលក្នុងស្រុកសរុប (GDP) របស់ពិភពលោក។ ចំណែកឯ ទំហំទីផ្សារវិញ ក្រុមប្រទេសសមាជិកទាំងនេះមានប្រជាជនសរុបជាង ១,២ ពាន់លាននាក់ ក្នុងនោះមានអ្នកប្រើប្រាស់ភាសាបារាំងសកម្មប្រមាណ ៣៩៦ លាននាក់៕អត្ថបទ៖ ធូ វិរៈ