ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ថា អំឡុង៣ថ្ងៃនៃដំណើរការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់របស់គណបក្សនយោបាយដំណើរការដោយរលូន។
ថ្លែងប្រាប់ BTV News ឯកឧត្តម ហង្ស ពុទ្ធា បានឲ្យដឹងថា រយៈពេល៣ថ្ងៃនៃដំណើរការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ គណបក្សនយោបាយនានាបានធ្វើសកម្មភាពតាមរូបភាពផ្សេងៗគ្នា ដោយក្នុងចំណោមគណបក្សនយោបាយមួយចំនួនបានដង្ហែក្បួនទ្រង់ទ្រាយធំ និងគណបក្សនយោបាយមួយចំនួនទៀតបានរៀបចំចាក់ផ្សាយគោលនយោបាយរបស់ខ្លួនតាមរយៈឧគ្ឃោសនស័ព្ទតាមទីស្នាក់ការរបស់ខ្លួន ក៏ដូចជាចុះចែកខិត្តប័ណ្ណតាមខ្នងរបស់ប្រជាពលរដ្ឋ។ ឯកឧត្តម បន្តថា អំឡុងដំណើរការឃោសនា៣ថ្ងៃនេះមិនមានបញ្ហាអ្វីកើតឡើង ដូចជាការប៉ះទង្គិច ឬបណ្តឹងណាមួយនោះទេ។
ជុំវិញការរិះគន់រិតត្បិតគណបក្សនយោបាយដែលធ្វើសកម្មភាពឃោសនាបោះឆ្នោត អ្នកនាំពាក្យ គ.ជ.ប បានអះអាងថា អាជ្ញាធរមានតួនាទីរក្សាសន្តិសុខ សណ្តាប់ធ្នាប់សង្គម ដូចនេះមានសកម្មភាពខ្លះត្រូវបានអាជ្ញាធរសម្របសម្រួល ដើម្បីរក្សាសណ្តាប់ធ្នាប់សាធារណៈ និងធានាដល់ការរស់នៅប្រកបដោយសុវត្ថិភាពជូនប្រជាពលរដ្ឋ។
ក្នុងដំណើរការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ មានគណបក្សចំនួន១៧ បានធ្វើសកម្មភាពដង្ហែក្បួន និងចាក់ផ្សាយគោលនយោបាយរបស់ខ្លួនតាមទីតាំងដែលបានកំណត់អាជ្ញធរដោយការឃោសនាបោះឆ្នោតមានរយៈពេល២សប្តាហ៍ ចាប់ពីថ្ងៃទី២១ ខែឧសភា រហូតដល់ថ្ងៃទី៣ ខែមិថុនា ឆ្នាំ២០២២ ខណៈការបោតឆ្នោតនឹងប្រព្រឹត្តទៅនៅថ្ងៃទី៥ ខែមិថុនាខាងមុខ៕ អត្ថបទ៖ សេក ឧត្តម