ក្រុមបាល់ទាត់ ឡាយហ្វខេត្តព្រះសីហនុ បានយកឈ្នះក្រុមកងយោធពលខេមរភូមិន្ទ ដោយលទ្ធផល ៤-០ ឡើងឈរលេខរៀងទី៥ បណ្ដោះអាសន្ន ក្នុងលីគកំពូលកម្ពុជា ឆ្នាំ២០២៦/២៧ សប្ដាហ៍ទី៦ ស្របពេលក្រុមបឹងកេត បានស្គាល់ជ័យជម្នះលើកដំបូង បន្ទាប់ពីយកឈ្នះក្រុមម្ចាស់ផ្ទះអង្គរថាយហ្គឺរ ១-០។

សម្រាប់ជំនួបជើងទី១ រវាង ឡាយហ្វខេត្តព្រះសីហនុ និងកងយោធពលខេមរភូមិន្ទ នៅកីឡដ្ឋានស្ដាតចាស់ បានបន្សល់នូវការវែកញែកយ៉ាងផុសផុលលើបណ្ដាញសង្គម ក្រោយមានការសម្រេចពិន័យកាតក្រហម លើអ្នកចាំទីក្រុមម្ចាស់ផ្ទះ ម៉ាត់ ឡានី នៅចុងវគ្គទី១ តែធ្វើឲ្យក្រុមភ្ញៀវមានប្រៀប និងឱកាសរកបាន ៤គ្រាប់ជាបន្ដបន្ទាប់ ដោយកីឡាករ Bruno ២គ្រាប់ នៅនាទី៤៥ និងនាទី៧៦ និងកីឡាករ Kanta Asami ២គ្រាប់ នៅនាទី៥២ និងនាទី៥៨។

ជាមួយរកបាន ៣ពិន្ទុពេញនេះ បានធ្វើឲ្យក្រុមឡាយហ្វខេត្តព្រះសីហនុ ហក់ពីលេខរៀងទី៨ ទៅឈរលេខរៀងទី៥ បណ្ដោះអាសន្ន ក្រោយឆ្លងកាត់ ៥ប្រកួតឈ្នះ២ ស្មើ១ និងចាញ់២ ក្រោមក្រុមអង្គរថាយហ្គឺរ ដែលឈរលេខ៤ មាន ៨ពិន្ទុ តែបើធៀបក្រុមកំពូលតារាង វិសាខា គឺចាញ់ប្រៀបរហូតដល់ ៩ពិន្ទុឯណោះ។ រីឯក្រុមកងយោធពលខេមរភូមិន្ទ បានបន្ដឈរបាតតារាង មិនទាន់មានពិន្ទុរាប់ឡើយ ក្រោយរងបរាជ័យ ៦ប្រកួតជាប់ៗគ្នា។

ដោយឡែកក្រុមបឹងកេតវិញ បានយក ៣ពិន្ទុពីក្រុមម្ចាស់ផ្ទះអង្គរថាយហ្គឺរ ទាំងលំបាក ក្រោយយកឈ្នះ ១-០ លើក្រុមមានមូលដ្ឋាននៅខេត្តសៀមរាបនេះ កាលពីចុងសប្ដាហ៍កន្លងទៅ ។ ១គ្រាប់ ដែលជួយឲ្យបឹងកេត ស្គាល់ជ័យជម្នះលើកដំបូងនេះ រកបានដោយកីឡាករ Balde Romario នៅនាទី៧៤ ហើយបានរំកិលពីលេខ១០ ទៅឈរលេខរៀងទី៩ បណ្ដោះអាសន្ន ដោយរកបាន ៤ពិន្ទុក្នុងដៃ បន្ទាប់ពីឆ្លងកាត់ ៥ប្រកួតឈ្នះ១ ស្មើ១ និងចាញ់ ៣ប្រកួត៕

អត្ថបទ លី ឈុនឡា