ភ្នំពេញ៖ បន្ទាប់ពីទទួលបានសេចក្តីណែនាំពីរាជរដ្ឋាភិបាល និងមានការណែនាំបន្ថែមពីថ្នាក់ដឹកនាំខេត្តកណ្តាល នៅពេលនេះ បណ្តាអាជ្ញាធរមូលដ្ឋានសង្កាត់នៅខេត្តកណ្តាល បានចុះផ្សព្វផ្សាយនិងណែនាំដល់បណ្តាពលរដ្ឋ និងអាជីវករ ហាងមានលក់និងពិសារគ្រឿងស្រវឹងនានា សូមផ្អាកពិសារគ្រឿងស្រវឹង១ថ្ងៃ និងផ្អាកការលក់ដូរគ្រឿងស្រវឹង២ថ្ងៃ គឺថ្ងៃទី៤ និង ថ្ងៃទី៥ ខែមិថុនា ដែលថ្ងៃបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥។
បើតាម អាជ្ញាធរ និងកងកម្លាំងនគរបាលសង្កាត់ព្រែកឬស្សី ក្រុងតាខ្មៅ ខេត្តកណ្តាល បានថ្លែងប្រាប់BTV នៅថ្ងៃទី២៣ ខែឧសភានេះថា នៅពេលនេះ ក្រុមការងារសាលាសង្កាត់ព្រែកឬស្សី បាននិងកំពុងសហការជាមួយកម្លាំងនគរបាលក្នុងមូលដ្ឋានខ្លួន ចុះធ្វើការណែនាំបណ្តាអាជីករ និងម្ចាស់ហាងនានាដែលលក់គ្រឿងស្រវឹងទាំងអស់សូមអោយគាត់សហការផ្អាកការលក់ដូរគ្រឿងស្រវឹង២ថ្ងៃ ពោលនៅក្នុងមុនថ្ងៃបោះឆ្នោត១ថ្ងៃ និងថ្ងៃបោះឆ្នោត១ថ្ងៃទៀត ដើម្បីសម្រួលពលរដ្ឋផ្អាកការពិសារគ្រឿងស្រវឹងមុនថ្ងៃបោះឆ្នោតមួយថ្ងៃ អោយការបោះឆ្នោតជ្រើសរើសក្រុមប្រឹក្សាឃុំសង្កាត់ ប្រព្រឹត្តទៅដោយសេរី ត្រឹមត្រូវ យុត្តិធម៌ គ្មានអំពើហឹង្សា។
បើតាមបណ្តាអាជីករអ្នកលក់ស្រវឹងនានា បានថ្លែងថា បន្ទាប់ពីទទួលបានការណែនាំពីអាជ្ញាធរមូលដ្ឋាន នៅថ្ងៃមុនបោះឆ្នោត និងថ្ងៃបោះឆ្នោត នឹងផ្អាកការលក់ដូរគ្រឿងស្រវឹងនេះចំនួន២ថ្ងៃគឺនៅថ្ងៃទី៤ និង ថ្ងៃទី៥ ខែមិថុនា ដើម្បីជម្រុញពលរដ្ឋខ្មែរ ផ្អាកការពិសារគ្រឿង ១ថ្ងៃមុនថ្ងៃបោះ ហើយយើងក៏ត្រូវបិទហាងដើម្បីចូលរួមបោះឆ្នោតផងដែរ។
សូមបញ្ជាក់ថា តាមសេចក្តីណែនាំរាជរដ្ឋាភិបាលស្តីពី ការផ្អាកការលក់ដូរ និងពិសាគ្រឿងស្រវឹងមួយថ្ងៃមុនថ្ងៃបោះឆ្នោតនិងថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ បានណែនាំ៖ ១. ប្រជាពលរដ្ឋ និងជនបរទេសទាំងអស់ដែលរស់នៅក្នុងកម្ពុជា ត្រូវរួមសហការជាមួយរាជរដ្ឋាភិបាល កងកម្លាំងប្រដាប់អាវុធគ្រប់ប្រភេទ រដ្ឋបាលថ្នាក់ក្រោមជាតិគ្រប់លំដាប់ថ្នាក់ គណៈកម្មាធិការជាតិរៀបចំការបោះឆ្នោត គ.ជ.ប គ្រប់លំដាប់ថ្នាក់ ពាណិជ្ជករនិងអាជីវករ ដោយត្រូវផ្អាកការលក់ដូរ និងពិសាគ្រឿងស្រវឹងមួយថ្ងៃមុនថ្ងៃបោះឆ្នោត និងថ្ងៃបោះឆ្នោត គឺថ្ងៃទី៤ និងថ្ងៃទី៥ ខែមិថុនា ឆ្នាំ២០២២ ដើម្បីរួមចំណែកទប់ស្កាត់អំពើហិង្សា ការគំរាមកំហែង ការបំភិតបំភ័យគ្រោះថ្នាក់ចរាចរណ៍ គ្រោះថ្នាក់សង្គម និងបាតុភាពនានាដែលអាចបណ្តាលមកពីការពិសាគ្រឿងស្រវឹងគ្រប់ប្រភេទ។ ២. ក្រសួង ស្ថាប័ន កងរាជអាវុធហត្ថ កងនគរបាលជាតិ រួមជាមួយរដ្ឋបាលថ្នាក់ក្រោមជាតិគ្រប់លំដាប់ថ្នាក់ ត្រូវធ្វើការបំពាក់បំប៉នដល់មន្ត្រីរាជការក្រោមឱវាទ និងកងកម្លាំងប្រដាប់អាវុធគ្រប់ប្រភេទ និងផ្សព្វផ្សាយ អប់រំណែនាំប្រជាពលរដ្ឋខ្មែរ និងជនបរទេសទាំងអស់ក្នុងមូលដ្ឋានរបស់ខ្លួនឱ្យអនុវត្តការផ្អាកការលក់ដូរ និងពិសាគ្រឿងស្រវឹង ដើម្បីចូលរួមធ្វើឱ្យកិច្ចដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ នាថ្ងៃទី៥ ខែមិថុនា ឆ្នាំ២០២២ ខាងមុខនេះ ប្រព្រឹត្តទៅក្នុងបរិយាកាសនយោបាយល្អ សេរី ត្រឹមត្រូវ យុត្តិធម៌ និងគ្មានអំពើហិង្សា៕ អត្ថបទ៖ ស៊ុម សុខជា