អ៊ុយក្រែន៖ ការតាំងពិព័រណ៍រថក្រោះ និងរថពាសដែកផ្សេងទៀតដែលឆេះរបស់រុស្ស៊ី ត្រូវបានបង្កើតឡើងនៅទីលានកណ្ដាលទីក្រុង Kyiv ក្នុងបំណងបង្ហាញអ្នករស់នៅក្នុងទីក្រុង នូវចក្ខុវិស័យនៃសង្គ្រាមនៅក្នុងតំបន់ផ្សេងទៀតរបស់ប្រទេស។
អ្នកមកទស្សនាពិព័រណ៍ម្នាក់លោក Oleksandr បាននិយាយថា ការតាំងពិព័រណ៍បែបនេះត្រូវតែកើតមាន ដូច្នេះគ្រប់គ្នាអាចត្រូវបានគេបង្ហាញ។ លោក Serhiy Polishchuk ទាហានអ៊ុយក្រែននិយាយថា វាត្រូវតែបង្ហាញថា យើងកំពុងបំផ្លាញសត្រូវ ហើយយើងនឹងរំដោះអ៊ុយក្រែនពីការលុកលុយរបស់សត្រូវ។ រដ្ឋាភិបាលអ៊ុយក្រែនបានប្រកាសថា នឹងបញ្ចេញមូលនិធិពិសេសដើម្បីជួយប្រជាជន ក្នុងការស្ដារទ្រព្យសម្បត្តិផ្នែកលំនៅឋានដែលរងការខូចខាត ឬបំផ្លាញនៅក្នុងជម្លោះប្រដាប់អាវុធដែលកំពុងបន្តជាមួយសហព័ន្ធរុស្ស៊ី។
ចំនួនអគារលំនៅឋានដែលរងការខូចខាតនៅតែបន្តកើនឡើង ហើយមានពាក្យស្នើសុំជាង 25,000ច្បាប់សម្រាប់សំណងការខូចខាតលំនៅឋាន។ អ្នកដាក់ពាក្យសុំមូលនិធិជាច្រើននៅតែត្រូវស្វែងរកកន្លែងរស់នៅដោយខ្លួនឯង ហើយជួសជុលលំនៅឋានដោយប្រាក់សន្សំផ្ទាល់ខ្លួន។ នៅភូមិ Moshchun ជាភូមិមួយនៅជនបទនៃទីក្រុង Kiev ស្ទើរតែពាក់កណ្តាលនៃលំនៅឋានទាំងអស់ត្រូវបានបំផ្លាញនៅក្នុងជម្លោះយោធា៕
អត្ថបទ៖ ប៊ុនថន