បាល់ទាត់៖ មកដល់ពេលនេះក្លិបបាល់ទាត់របស់សាកលវិទ្យាល័យអាស៊ីអឺរ៉ុប, អាស៊ីអឺរ៉ុបយូណាយធីតបានត្រៀមលក្ខណៈជិត ១០០% ហើយជួបជាមួយក្លិបកងយោធពលខេមរភូមិន្ទ សប្ដាហ៍ទី៣ ការប្រកួតលីគកំពូលកម្ពុជា រឺមិត្តហ្វូនខាំបូឌាលីគ ២០២១ រសៀលថ្ងៃទី២៤ ខែមិនា។
ការប្រកួតនេះធ្វើឡើងនៅទីលាន AEU Sport Park នៅស្វាយជ្រុំ ស្រុកខ្សាច់កណ្តាល ខេត្តកណ្តាល វេលាម៉ោង ៣និង៣០នាទីរសៀល ដោយមានការផ្សាយផ្ទាល់ពីផេកផ្លូវការកម្ពុជាថ្មី។ លោក សុខ វាសនា គ្រូបង្វឹកក្លិបអាស៊ីអឺរ៉ុប បានប្រាប់ឲ្យដឹងតាមប្រព័ន្ធតេឡេក្រាមថា ក្រោយចាញ់គីរីវង់សុខសែនជ័យ ក្លិបមានការកែប្រែមួយចំនួនក្នុងតំបន់ការពារ និងសម្រួចតំបន់ប្រយុទ្ធដើម្បីរកពិន្ទុសម្រាប់ការប្រកួតនេះ។ តែមានការសោកស្តាយដែលទើបលេងបានមួយប្រកួត យើងជួបបញ្ហាកូវីដ-១៩ ហើយមិនដឹងថា ក្រុមផ្សេងគេហ្វឹកហាត់ដល់ដែរនោះទេ។ អាស៊ីអឺរ៉ុបបើកយុទ្ធនាការប្រកួតលីគកំពូលកម្ពុជា ដោយចាញ់ក្លិបគីរីវង់សុខសែនជ័យ ២ទល់នឹង៤ នៅទឹកដីខេត្តតាកែវ។ លោក ហោ សុខហេង គ្រូបង្វឹកក្រុមកងយោធពលខេមរភូមិន្ទ បានប្រាប់ឲ្យដឹងនៅពេលថ្មីៗនេះថា ក្រុមរបស់លោកបានត្រៀម និងរៀបចំរួចរាល់សម្រាប់ការប្រកួតនេះហើយ។
លោកបន្តថា ក្រុមអាស៊ីអឺរ៉ុបជាក្រុមមិនអាចវាយតម្លៃបានទេ ទោះមានចំណាត់ថ្នាក់ទាបរដូវកាលមុនក៏ដោយ តែកីឡាកររៀបចំខ្លួន របៀបនៃការលេងទាំងការពារ និងប្រយុទ្ធគឺល្អ។ កងយោធពលខេមរភូមិន្ទ បើកការប្រកួតដំបូងរកបានតែ ១ពិន្ទុក្រោយពីស្មើ ០ទល់នឹង០ ជាមួយក្លិបវិសាខាកាលពីថ្ងៃទី៧ ខែមីនាកន្លងទៅនេះ។ ប្រកួតសប្តាហ៍ទី២ របស់ក្លិបទាំងពីរនេះ អាស៊ីអឺរ៉ុបជាមួយម្ចាស់ជើងឯកបឹងកេត និងទីហ្វីអាមីជាមួយណាហ្កាត្រូវលើកទៅលេងនៅថ្ងៃទី២០ ខែមេសាដូចគ្នា។ តាំងពីឆ្នាំ២០១៨ រហូតដល់២០២០ ក្រុមទាំងពីរជួបគ្នា ៦ដង ទាំងពានរង្វាន់សម្ដេចតេជោ និងលីគកំពូលកម្ពុជា ក្នុងនោះអាស៊ីអឺរ៉ុបឈ្នះតែម្តងគាត់ ហើយក៏មិនដែលស្មើ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
