ខ្សែប្រយុទ្ធឆ្នើមសញ្ជាតិអង់គ្លេស Harry Kane បានសម្រេចបន្តកិច្ចសន្យាថ្មីជាមួយក្លឹប Bayern Munich រហូតដល់ថ្ងៃទី៣០ ខែមិថុនា ឆ្នាំ២០២៩ ខណៈ​ក្លឹបយក្ស​អាល្លឺម៉ង់​បាន​ប្រកាស​ជា​ផ្លូវ​ការ​កាល​ពីថ្ងៃព្រហស្បតិ៍។

ប្រធាន​ក្រុមជម្រើសជាតិអង់គ្លេសរូបនេះ បានផ្លាស់ពី Tottenham Hotspur មកចូលរួមជាមួយ Bayern Munich កាលពីឆ្នាំ២០២៣ ហើយបានរួមចំណែកជួយក្លឹបឈ្នះជើងឯក Bundesliga ចំនួន​ពីរ​លើក ពានរង្វាន់ German Cup មួយលើក និង German Super Cup ចំនួនពីរលើក។

ក្នុង​វ័យ ៣៣ ឆ្នាំ Kane បានបង្ហាញទម្រង់លេងយ៉ាងលេចធ្លោ ដោយស៊ុតបញ្ចូលទីបាន ១៥៦ គ្រាប់ ក្នុងការបង្ហាញខ្លួន ១៦១ ប្រកួត គ្រប់កម្មវិធីប្រកួតឱ្យ Bayern Munich។ អ្វី​ដែល​កាន់​តែ​ពិសេស ​ខ្សែប្រយុទ្ធរូបនេះទើបតែឈ្នះពានរង្វាន់ Ballon d’Or កាលពីសប្តាហ៍មុន ដែល​ធ្វើ​ឱ្យ​គេ​ក្លាយ​ជា​កីឡាក​រអង់គ្លេសដំបូងគេ បន្ទាប់ពី Michael Owen ក្នុងឆ្នាំ២០០១ ដែល​ឈ្នះ​ពាន​រង្វាន់​ដ៏​មាន​កិត្យានុ​ភាព​នេះ។

កន្លងមក Kane តែងតែមានព័ត៌មានភ្ជាប់ជាមួយការវិលត្រឡប់ទៅកាន់ក្របខណ្ឌ Premier League វិញ ដោយរូបគេនៅតែខ្វះ ៤៧ គ្រាប់ទៀត ដើម្បីតាម​ស្មើ​កំណត់​ត្រា​ស៊ុត​បញ្ចូល​ទី​ច្រើន​បំផុត​របស់​ Alan Shearer ដែលមាន ២៦០ គ្រាប់ក្នុងប្រវត្តិសាស្ត្រលីគកំពូលអង់គ្លេស។

ទោះ​ជា​យ៉ាងណា ខ្សែប្រយុទ្ធរូបនេះធ្លាប់បានបញ្ជាក់កាលពីខែសីហាថា Premier League លែង​មាន​ភាព​ទាក់​ទាញ​ដូច​មុនសម្រាប់រូបគេទៀតហើយ ដោយបច្ចុប្បន្នរូបគេផ្តោត​សំខាន់​លើ​អាជីព​បាល់​ទាត់​នៅ​ប្រទេស​អាល្លឺម៉ង់។

ទាក់ទងនឹងកិច្ចសន្យាថ្មីនេះ Bayern Munich មិនបានបង្ហើបពីតម្លៃ​ហិរញ្ញវត្ថុ​នៃ​កិច្ច​ព្រម​ព្រៀង​ឡើយ​។ ​ប៉ុន្តែ សារព័ត៌មានអាល្លឺម៉ង់បានរាយការណ៍ថា កុងត្រាថ្មីនេះ​គឺ​ជា​កិច្ច​សន្យា​ដែល​មាន​តម្លៃ​ខ្ពស់​បំផុត​ក្នុង​ប្រវត្តិសាស្ត្រ​របស់ក្លឹប និងជាផ្នែកមួយនៃការប្តេជ្ញាចិត្តរយៈពេល​វែង​ចំពោះ​ប្រធាន​ក្រុម​ជម្រើស​ជាតិ​អង់គ្លេសរូបនេះ។

គួរឱ្យដឹងថា Kane បានបញ្ចប់ក្នុងនាមជាកីឡាករស៊ុតបញ្ចូលទីច្រើនជាងគេប្រចាំ Bundesliga នៅ​គ្រប់​រដូវកាលចាប់តាំងពីចូលរួមជាមួយ Bayern Munich ហើយថែម​ទាំង​ត្រូវ​បាន​ជ្រើស​រើស​ជា​កីឡាករ​ឆ្នើមប្រចាំឆ្នាំរបស់អាល្លឺម៉ង់ក្នុងឆ្នាំ២០២៦ ផងដែរ។

លើសពីនេះ រូបគេក៏ធ្លាប់ឈ្នះពានរង្វាន់ European Golden Shoe ចំនួនពីរលើក ដែល​ប្រគ​ល់​ជូន​កីឡាករ​ដែលស៊ុតបញ្ចូលទីបានច្រើនជាងគេក្នុងលីគកំពូលអឺរ៉ុប ខណៈក្នុងព្រឹត្តិការណ៍ World Cup ឆ្នាំនេះ Kane បានដឹកនាំក្រុមជម្រើសជាតិអង់គ្លេសបញ្ចប់ក្នុងចំណាត់ថ្នាក់លេខ៣ ផងដែរ​៕ អត្ថបទ៖នាង សុភាវុធ