សមាគមសហគ្រិនស្ត្រីកម្ពុជា ជំរុញឱ្យសហគ្រិនស្រ្តីចូលរួមប្រកួតប្រកួតប្រជែងលើផ្នែកបច្ចេកវិទ្យា ក្នុងភូមិហ្វ្រង់កូហ្វូនី និងការចូល រួមពិព័រណ៍ផលិតផលសក្តានុពលមាន លើគ្រឿងតម្បាញ់ និងសូត្រ ដើម្បីរំលេចនូវវប្បធម៌ខ្មែរ និងវិស័យម្អូបអាហារ ជាពិសេសនំខ្មែរ ដើម្បីចូលរួមទាក់ទាញឱ្យបានខ្លាំងក្លា ពីគណៈប្រតិភូ អ្នកធុរកិច្ច និងទេសចរណ៍មកពីបណ្តាប្រទេសនានា។

លោកជំទាវ ចាន់ ភារី ប្រធានសមាគមសហគ្រិនស្រ្តីកម្ពុជា (CWEA) លើកឡើងក្នុងកិច្ចសម្ភាសន៍ជាមួយ BTV ស្តីពីការ ប្រកួតប្រជែង និងការចូលរួមពិព័រណ៍ផលិតផលសក្តានុពលមានរបស់សហគ្រិនស្រ្តី នៅក្នុងកិច្ចប្រជុំកំពូលហ្វ្រង់កូហ្វូនី នេះថា ទាក់ ទិនកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាបានធ្វើជាម្ចាស់ផ្ទះ នេះគឺជាឱកាសកម្រលើកទី១ នៅក្នុងប្រវត្តិសាស្រ្តរបស់ ប្រទេសកម្ពុជា ដែលតាមរយៈនេះ ក្នុងនាមវិស័យឯកជន និងក្នុងនាមសមាគមសហគ្រិនស្ត្រីកម្ពុជា, លោកជំទាវនឹងជំរុញសហគ្រិន ស្រ្តីឱ្យមានការឱ្យបានច្រើនកុះករ ដើម្បីរួមគ្នាលើកកម្ពស់មុខមាត់របស់ប្រទេសជាតិយើង។

លោកជំទាវ បន្តថា ទាក់ទិនសហគ្រិនស្រ្តី, សមាគមសហគ្រិនស្ត្រីកម្ពុជា មានបេសកកម្មគាំទ្រការចាប់ផ្តើមការរីកចម្រើន និង ភាពជោគជ័យរបស់អាជីវកម្មដែលមានស្ត្រីជាម្ចាស់ និងដឹកនាំដោយស្ត្រី ដើម្បីរួមចំណែកក្នុងការជំរុញសេដ្ឋកិច្ចជាតិ។ ដូច្នេះតាមរយៈ ព្រឹត្តិការណ៍ខាងលើនេះ សមាគមនឹងជំរុញសហគ្រិនស្រ្តីដែលមានជំនាញ ចូលរួមប្រកួតប្រជែងលើវិស័យបច្ចេកវិទ្យា ដើម្បីបង្ហាញអំពី ភាពអង់អាចរបស់ស្រ្តីនៅក្នុងអាជីវកម្ម។ ក្រៅពីនេះសមាគមនឹងលើកទឹកចិត្តដល់សហគ្រិនស្រ្តី ឱ្យចូលរួមពិព័រណ៍ផលិតផលដែល មានសក្តានុពលដូចជា ការតម្បាញ់ និងសូត្រខ្មែរ ដើម្បីបង្ហាញអំពីវប្បធម៌ដ៏ផូរផង់និងការរីកចម្រើន ដែលត្រូវបានរក្សាមកដល់ បច្ចុប្បន្ន និងការចូលរួមតាំងពិព័រណ៌លើវិស័យម្ហូបអាហារផងដែរ ដែលបច្ចុបន្នវិស័យត្រូវបានសហគ្រិនស្រ្តីយកចិត្តទុកដាក់យ៉ាងខ្លាំង ជាពិសេសការផលិតនិងវេចខ្ចប់នំខ្មែរ មានជាច្រើនរសជាតិ ដែលកំពុងទទួលបានការគាំទ្រ ឱ្យចូលរួមនៅក្នុងភូមិហ្វ្រង់កូហ្វូនី ដែលជា កន្លែងឱ្យបណ្តាសហគ្រាសឯកជន និងសហគ្រាសរដ្ឋរបស់កម្ពុជា អាចដាក់តាំងបង្ហាញនូវផលិតផលសំខាន់ៗរបស់ជាតិទៅកាន់ អន្តរជាតិ។

ជុំវិញកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះនេះ, អនុគណៈកម្មការជាតិរៀបចំកិច្ចប្រជុំកំពូលហ្វ្រង់កូហ្វូនី ក៏ បានអំពាវនាវដល់ម្ចាស់ក្រុមហ៊ុន សហគ្រាស ត្រៀមក្នុងការចូលរួមដាក់តាំងបង្ហាញផលិតផលនៅក្នុងភូមិវប្បធម៌ហ្វ្រង់កូហ្វូនី ដែលជា ឱកាសដ៏កម្រ និងជាប្រវត្តិសាស្រ្តរបស់កម្ពុជា ដើម្បីផ្សព្វផ្សាយផលិតផលរបស់ខ្លួនទៅកាន់ពិភពលោក។ នៅក្នុងព្រឹត្តិការណ៍នោះដែរ ក៏មានរៀបចំព្រឹត្តិការណ៍អម «ភូមិហ្រ្វង់កូហ្វូន» ដែលជាឱកាសសម្រាប់បង្ហាញនូវវប្បធម៌ និងទំនៀមទំលារបស់ប្រទេសជាសមាជិក ជាង ៩០ ជាពិសេសផលិតផលមានសក្តានុពល និងសេវាកម្មរបស់សហគ្រិនទាំងអស់ ជូនដល់ថ្នាក់ដឹកនាំជុំវិញពិភពលោក គណៈ ប្រតិភូពីគ្រប់ទ្វីប និងសាធារណជនជាតិ-អន្តរជាតិ និងអ្នកធ្វើធុរកិច្ចផ្សេងៗ ដែលព្រឹត្តិការណ៍នោះត្រូវបានរំពឹងថា នឹងមានអ្នកចូលរួម ទស្សនាជាង ១០ ម៉ឺននាក់ផងដែរ៕ អត្ថបទ៖ សុន រ៉ាឌី