នាព្រឹកថ្ងៃទី៧ ខែវិច្ឆិកា ឆ្នាំ២០២៦នេះ ក្នុងពិព័រណ៍ផលិតផលខ្មែរ ឆ្នាំ២០២៦ តំណាងក្រុមហ៊ុន និង​​ស្ថាប័ន​នានា​បាន​ជួប​ពិភាក្សា​ដោយផ្ទាល់ ដើម្បីណែនាំផលិតផល បង្ហាញតម្រូវការ និង​ស្វែង​រក​ដៃ​គូ​ដែល​មានសមត្ថភាពឆ្លើយតបនឹងតម្រូវការអាជីវកម្មរបស់ខ្លួន។

វេទិកានេះផ្ដល់ឱកាសឱ្យអ្នកផលិតបានស្គាល់អ្នកទិញ និងអ្នកចែកចាយ ខណៈ​ភាគី​ដែល​ត្រូវ​ការ​ប្រភព​ផ្គត់​ផ្គង់អាចស្វែងយល់ពីផលិតផល និងលទ្ធភាពរបស់អ្នកផលិតក្នុងស្រុក។ ការ​យល់​ច្បាស់​ពី​តម្រូវការ និងសមត្ថភាពរបស់គ្នា ជាមូលដ្ឋានសម្រាប់កសាងទំនុកចិត្ត ឈានទៅ​រក​ការ​បញ្ជា​ទិញ និងពង្រីកបណ្ដាញចែកចាយ។

តម្លៃនៃជំនួបនេះស្ថិតនៅលើការបន្តទំនាក់ទំនងទៅជាកិច្ចសហការជាក់ស្ដែង។ នៅពេល​អ្នក​ផលិត​ទទួល​បានការបញ្ជាទិញជាបន្តបន្ទាប់ ពួកគាត់មានមូលដ្ឋានសម្រាប់រៀបចំផែនការផលិត កែ​លម្អគុណភាព និងពង្រីកអាជីវកម្ម។ នេះជាឱកាសដែលអាចបន្តផ្ដល់ផលដល់ផលិតផលខ្មែរ លើស​ពី​រយៈពេលបីថ្ងៃនៃពិព័រណ៍។