ក្រសួងសុខាភិបាល ណែនាំសមាគមវេជ្ជសាស្ត្រដំណេកនៃកម្ពុជា CASM បង្កើន​សកម្មភាព​ខ្លួន​ពង្រីក​ការ​ផ្សព្វផ្សាយ និងបង្កើនការផ្តល់សេវាសុខាភិបាលឲ្យក្រុមពេទ្យ និងពលរដ្ឋ​ទូទៅ​យល់​ដឹង​ពី​ដំណេក​ឲ្យបានច្រើន ខណៈវិបត្តិបត្តិដំណេក បង្កបញ្ហាប្រឈមច្រើន ជាពិសេស​បញ្ហា​ប្រឈម​ជំងឺ​មិន​ឆ្លង​នានា។

នៅក្នុងសន្និសីទប្រចាំឆ្នាំលើកទី១ វេជ្ជសាស្ត្រដំណេក ក្រោមប្រធានបទ «ដំណេកប្រសើរ ជីវិត​ស្រស់​បំព្រង​» នៅសណ្ឋាគាសុខា ថ្ងៃទី៧ ខែវិច្ឆិកានេះ ឯកឧត្តម សាស្ត្រាចារ្យ កុយ វ៉ាន់នី រដ្ឋ​លេខា​ធិការ​ក្រសួងសុខាភិបាល ថ្លែងថា សន្និសិទ ដែលមានវេជ្ជបណ្ឌិត អ្នកជំនាញជាតិ អន្តរជាតិ បក​ស្រាយ​រួម​គ្នាអំពីបញ្ហាដំណេកថ្ងៃនេះ គឺពិតជាមានសារៈសំខាន់ រួមចំណែក​ផ្សព្វ​ផ្សាយ​យល់​ដឹង​អំពី​មូលហេតុ និងដំណោះស្រាយផ្នែកវិជ្ជសាស្ត្រនានា លើបញ្ហាដំណេកមិនល្អ។

ឯកឧត្តម សាស្ត្រាចារ្យ កុយ វ៉ាន់នី រំពឹងថា គ្រប់សិក្ខាកាមដែលចូលរួមថ្ងៃនេះ នឹង​យក​ចំណេះ​ដឹង​ដំណេក​នេះ​ទៅ​ផ្សព្វផ្សាយបន្ត និងរួមគ្នាផ្តល់សេវាសុខាភិបាលឲ្យមានគុណភាព ប្រសិទ្ធភាព មាន​ភាព​ជោគជ័យទំាំងអស់គ្នា និងទាក់ទាញ​ប្រជាជ​ន​មាន​ជំនឿ​ទុក​ចិត្ត​ខ្ពស់​មក​លើវិ​ស័យសុ​ខាភិបាលក​ម្ពុជាកាន់តែខ្លាំងថែមទៀត។

លោក សាស្ត្រាចារ្យ ចាន់ សារិន ប្រធានសមាគមវេជ្ជសាស្ត្រដំណេកនៃកម្ពុជា ថ្លែងថា អនាគតសមាគមមានបំណងបន្តពង្រឹងការយល់ដឹងអំពីសុខភាពវេជ្ជសាស្ត្រដំណេក បង្កើនការបណ្តុះបណ្តាលអ្នកជំនាញរយៈពេលខ្លី ដើម្បីពង្រីកសមត្ថភាពក្នុងការធ្វើរោគវិនិច្ឆ័យ និងជំរុញការស្រាវជ្រាវ តាមបរិបទសុខាភិបាលរបស់កម្ពុជា។

លោកបន្តថា រោគសញ្ញាសំគាល់ជំងឺវេជ្ជសាស្ត្រមានដូចជា៖ ងងុយដេកពេលថ្ងៃ អស់កម្លាំង ស្រមុក​ខ្លាំងៗ ឬឈប់ដកដង្ហើមពេលគេង និងការថយចុះសមត្ថភាពប្រចាំថ្ងៃជាដើម បង្ក​ជា​បញ្ហា​ប្រឈម​ច្រើនដូចជា បញ្ហាគ្រោះថ្នាក់ចរាចរណ៍ និងបង្កកើតជំងឺមិនឆ្លងនានាទៀត ដែល​ត្រូវ​ធ្វើ​ការ​រួម​គ្នា ដើម្បីធានាថាអ្នកជំងឺទទួលបានការវាយតម្លៃជាក់លាក់ ការធ្វើរោគវិនិច្ឆ័យ និង​ការ​ព្យាបាល​ដែល​មាន​ប្រសិទ្ធភាព និងគ្រប់ជ្រុងជ្រោយ។

លោក បញ្ជាក់ថា វិបត្តិដំណេកនេះ លើបញ្ហាការពិបាកសម្រាន្ត បច្ចុប្បន្នបាននិងកំពុងកើតច្រើន ខណៈការសម្រាន្តគ្រប់គ្រាន់ អ្នកខ្លះត្រូវការសម្រាន្តតែចំនួន៥ម៉ោង អ្នកខ្លះទៀត ពី៦ទៅ៧ម៉ោង ដោយឡែកសម្រាប់បញ្ហាជំងឺដេកស្រម៉ុកស្ទះដង្ហើមវិញ គឺមានចំនួនអ្នកកើតប្រមាណ៥% សម្រាប់ពលរដ្ឋទូទៅវ័យចាប់ពីក្មេងដល់វ័យចាស់ៗ៕ អត្ថបទ៖ ​ស៊ុម សុខជា