ភ្នំពេញ៖ ឯកឧត្ដម ឃួ ង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធាន​គណៈកម្មាធិការគណបក្សរាជធានីភ្នំពេញ និងជាប្រធាន​ក្រុម​ការ​ងារ​ចុះ​មូល​ដ្ឋាន​ខណ្ឌ​ព្រែក​ព្នៅ បានណែនាំឱ្យអាជ្ញាធរសង្កាត់ទាំង៥ក្នុងខណ្ឌព្រែកព្នៅ ពង្រឹងធ្វើយ៉ាង​ណា​អនុវត្ត​ឱ្យ​បាន​នូវ​គោលនយោបាយភូមិសង្កាត់មានសុវត្ថិភាព ថែរក្សាផ្លូវ លូ និងបន្តផ្តល់​សេវា​ជូន​ប្រជា​ពលរដ្ឋ​ឱ្យ​កាន់​តែ​ល្អប្រសើរបន្ថែមទៀត ដើម្បីឱ្យប្រជាពលរដ្ឋមានជឿទុកចិត្ត និ​ង​បោះឆ្នោត​ជូន​គណបក្ស​ប្រជាជនកម្ពុជានៅក្នុងការបោះឆ្នោត២០២៧ និង២០២៨ខាងមុខនេះ។

ការណែនាំរបស់ឯកឧត្ដម ឃួង ស្រេង បានធ្វើឡើងនាព្រឹកថ្ងៃអាទិត្យទី៨ ខែវិច្ឆិកា ឆ្នាំ២០២៦ ក្នុងកិច្ចប្រជុំប្រចាំខែក្រុមការងារចុះជួយខណ្ឌ-សង្កាត់ និងពិធីសំណេះសំណាលជាមួយសមាជិកគណបក្សសង្កាត់ទាំង៥ ក្នុងខណ្ឌព្រែកព្នៅ នៅទីស្នាក់ការគណបក្សប្រជាជនកម្ពុជាខណ្ឌព្រែកព្នៅ។

ឯកឧត្ដម ឃួង ស្រេង បានមានប្រសាសន៍ថា អាជ្ញាធរសង្កាត់ទាំង៥ ត្រូវអនុវត្តឱ្យបានគោលនយោបាយភូមិ សង្កាត់មានសុវត្ថិភាព ពិសេសគឺការបង្ក្រាបក្មេងទំនើង ជាមួយនិងការជួយថែរក្សាសមិទ្ធផលនានានៅក្នុងមូលដ្ឋាន ដូចជាថែរក្សាផ្លូវ លូជាដើម ពោលគឺកុំឱ្យរថយន្តដឹកធ្ងន់លើសការកំណត់ និងទប់ស្កាត់ការដឹកខ្សាច់ នាំឱ្យហូរចូលលូ។ ត្រូវបន្តផ្តល់សេវាសាធារណៈជូនប្រជាពលរដ្ឋឱ្យកាន់តែល្អបន្ថែមទៀត។ ត្រូវទទួលរាល់សំណើរនិងសំណូមពរពីប្រជាពលរដ្ឋ បើពលរដ្ឋមានការខ្វះខាតអ្វី ត្រូវជួយគាត់ភ្លាម ក្នុងនាមជាអាណាព្យាបាលប្រជាពលរដ្ឋ។

ឯកឧត្តមបានបន្តថា សមាជិក សមាជិកាបក្ស ជាឃោសនិកដ៏ឧត្ថុងឧត្ដមរបស់គណបក្សប្រជាជនកម្ពុជា ដូច្នេះត្រូវយកគោលនយោបាយរបស់បក្ស និងអំពើល្អៗរបស់មេដឹកនាំគណបក្សទៅផ្សព្វផ្សាយឱ្យប្រជាពលរដ្ឋបានយល់ជ្រោតជ្រាបកាន់តែច្បាស់ ត្រូវស៊ូមតិឱ្យបានខ្លាំងក្លាជាមួយបក្សប្រឆាំង និងសូមឱ្យសមាជិក សមាជិកាគណបក្សប្រជាជនកម្ពុជាម្នាក់ ក្លាយជាសន្លឹកឆ្នោតមួយសន្លឹកនៅថ្ងៃបោះឆ្នោត។

ឯកឧត្ដម ឃួង ស្រេង បានបន្តទៀតថា យើងជឿទុកចិត្តលើការដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្ដេចធិបតី ហ៊ុន ម៉ាណែត នាយករដ្ឋមន្ត្រី សម្តេចទាំងទ្វេបានប្តេជ្ញាចិត្តយ៉ាងដាច់ខាតក្នុងកិច្ចការពារបូរណៈភាពទឹកដី មិនឱ្យបាត់បង់ទាំងព្រំដែនទឹក និងគោក។ ដូច្នេះយើងត្រូវយកអ្វីៗទាំងនេះទៅផ្សព្វផ្សាយឱ្យប្រជាពលរដ្ឋបានយល់ជ្រោតជ្រាបកាន់តែច្បាស់ ពេញចិត្តពេញថ្លើម បន្តគាំទ្រគណបក្សប្រជាជនកម្ពុជាកាន់តែច្រើនថែមទៀត ដើម្បីឈានឆ្ពោះទៅយកជ័យជំនៈក្នុងការឈ្នះឆ្នោតនៅឆ្នាំ២០២៧ និងឆ្នាំ២០២៨។

លោក ធឹម សំអាន សមាជិកគណៈកម្មាធិការគណបក្ស រាជធានីភ្នំពេញ និងជាប្រធានគណៈកម្មាធិការគណបក្សខណ្ឌព្រែកព្នៅ បានរាយការណ៍ពីការងារបំរើសេវាជូនប្រជាពលរដ្ឋតាមរយៈច្រកចេញចូលតែមួយ ការងារការពារសន្តិសុខ សណ្តាប់ធ្នាប់ និងការកសាងហេដ្ឋារចនាសម្ព័ន្ធនៅក្នុងមូលដ្ឋាន រហូតធ្វើឱ្យប្រជាពលរដ្ឋមានជំនឿទុកចិត្ត។ ចំពោះទិសដៅបន្ត គឺថែរក្សាគោលនយោបាយភូមិ សង្កាត់មានសុវត្ថិភាព បំរើសេវាជូនប្រជាពលរដ្ឋឱ្យកាន់តែល្អប្រសើរ ដណ្តើមយកជ័យជំនៈឱ្យបាននៅពេលបោះឆ្នោតឆ្នាំ២០២៧ និង២០២៨ខាងមុខនេះ។

ក្នុងឱកាសនោះដែរ សង្កាត់ទាំង៥ បានលើកឡើងពីសមិទ្ធផលការងារបស់គណបក្សក្នុងមូលដ្ឋានសម្រេចបាន ជាមួយនិងការលើកឡើងពីផែនការសកម្មភាព ដែលបាននិងកំពុងអនុវត្តដូចជា ការខិតខំកសាងសមាជិកបក្ស ពិសេសគឺការប្តេជ្ញាចិត្តក្នុងការកែប្រែសមាជិកម្នាក់ ក្លាយជាសន្លឹកឆ្នោត១សន្លឹកជូនគណបក្សប្រជាជនកម្ពុជា នៅពេលបោះឆ្នោត២០២៧-២០២៨ខាងមុខនេះ។ បន្ថែមពីនេះ ចៅសង្កាត់នីមួយៗ ក៏បានស្នើសុំការកសាងហេដ្ឋារចនាសម្ព័ន្ធមួយចំនួននៅក្នុងមូលដ្ឋានផងដែរ៕ អត្ថបទ៖ ប្រាក់ វ៉ាន់ដា