ក្រុមជម្រើសជាតិយុវជនអាយុក្រោម ១៧ឆ្នាំកម្ពុជា បានរបូត ៣ពិន្ទុគួរឲ្យស្ដាយ បន្ទាប់ពីរងបរាជ័យទាំងប្រផិតប្រផើយ ទល់នឹងក្រុមជម្រើសជាតិយុវជន U17 ហ្វីលីពីន ដោយលទ្ធផល ២-១ ក្នុងជំនួបបើកឆាកពូលA នៃវគ្គជម្រុះពានរង្វាន់យុវជនប្រចាំទ្វីបអាស៊ីអាយុក្រោម ១៧ឆ្នាំ AFC U17 Asian Cup 2027 កាលពីល្ងាចថ្ងៃទី៨ ខែវិច្ឆិកា ឆ្នាំ២០២៦ នៅប្រទេសមីយ៉ាន់ម៉ា។

ការប្រកួតដ៏ស្វិតស្វាញនេះ ក្រុមទាំងពីរ បានលេងដោយប្រុងប្រយ័ត្នរៀងខ្លួន មុនមានគ្រាប់បាល់កើតឡើង ដោយកីឡាករ Kai Fabian Tejok Muller ជាអ្នកស៊ុតគ្រាប់នាំមុខឲ្យក្រុមយុវជនហ្វីលីពីន ១គ្រាប់មុន នៅនាទី៣៩ មុនកីឡាករ ឡុង ប៊ិច រកបានគ្រាប់តាមស្មើឲ្យគោព្រៃជំទង់កម្ពុជា នៅនាទី៤៥+១។ យ៉ាងណាសោកស្ដាយវគ្គទី២ ក្រុមយុវជនកម្ពុជា ពុំមានឱកាសរកគ្រាប់បាល់បន្ថែម ស្របពេល Kai Fabian Tejok Muller រកបានគ្រាប់ទី២ នៅនាទី៦៩ ជួយឲ្យក្រុមយុវជន U17 ហ្វីលីពីន ទទួលបានជ័យជម្នះ ២-១ តែម្ដង។

គួរដឹងថា ការប្រកួតជម្រុះពានរង្វាន់យុវជនក្រោមអាយុ ១៧ឆ្នាំប្រចាំទ្វីបអាស៊ី ដែលក្រុមគោព្រៃជំទង់កម្ពុជា ចូលរួមក្នុងពូលA គឺមានបេក្ខភាពប្រកួតប្រជែង ៥ក្រុម ក្រៅពីកម្ពុជា គឺមានហ្វីលីពីន ឥណ្ឌូនេស៊ី អាហ្វហ្គានីស្ថាន និងម្ចាស់ផ្ទះមីយ៉ាន់ម៉ា។ បច្ចុប្បន្នក្រុមយុវជនអាហ្វហ្គានីស្ថាន កំពុងឈរកំពូលតារាង និងមាន ៣ពិន្ទុស្មើហ្វីលីពីន បន្ទាប់ពីពួកគេបានយកឈ្នះក្រុមជម្រើសជាតិយុវជន U17 មីយ៉ាន់ម៉ា ៤-១ នៅល្ងាចថ្ងៃជាមួយគ្នា។ សម្រាប់ប្រកួតបន្ទាប់វិញ កម្ពុជា នឹងត្រូវជួបអាហ្វហ្គានីស្ថាន នាថ្ងៃទី១១ ខែវិច្ឆិកាខាងមុខ៕ អត្ថបទ លី ឈុនឡា