អ្នករៀបចំព្រឹត្តិការណ៍ប្រណាំងម៉ូតូត្រៃ ជើងឯក ENEOSវគ្គទី២ ឆ្នាំ២០២៦ លោក ពេជ្រ សុខា បានបង្ហាញពីភាពរីកចម្រើនគួរឱ្យកត់សម្គាល់ បើប្រៀបធៀបនឹងការប្រកួតជុំវគ្គទី១ ជាពិសេសការកែលម្អទីលានប្រកួត សម្ភារបរិក្ខារ សន្តិសុខ និងការសម្រួលដល់ការចូលរួមរបស់កីឡាករ កីឡាការិនី ជាមួយនិងសន្ទុះនៃការគាំទ្ររបស់ស្សនិកជន ។

ក្នុងបទសម្ភាសន៍កាលពីម្សិលមិញ នៅទីលានប្រណាំងវាលឥន្ទ្រី (ទួលពង្រ) ស្ថិតនៅក្នុងសង្កាត់ ចោមចៅ ខណ្ឌដង្កោ រាជធានីភ្នំពេញ លោក ពេជ្រ សុខា បានបញ្ជាក់ថា សម្រាប់ការប្រកួតវគ្គទី២នេះ ក្រុមការងារបានកែលម្អ និងរៀបចំទីលានប្រណាំងឱ្យកាន់តែធំទូលាយ មានស្តង់ដារសមស្រប មិនចាញ់ប្រទេសក្នុងតំបន់អាស៊ាន ដើម្បីផ្តល់ភាពងាយស្រួលដល់កីឡាករ។

អ្នករៀបចំបានបន្ថែមថា អ្វីដែលគួរឱ្យរីករាយនោះ គឺការចូលរួមរបស់ទស្សនិកជនមានចំនួនច្រើន ខណៈកីឡាករ និងម្ចាស់ឧបត្ថម្ភក៏បានចូលរួមគាំទ្រយ៉ាងសកម្មផងដែរ។ ការគាំទ្រទាំងនេះ គឺជាកម្លាំងចិត្ត សំខាន់សម្រាប់ជំរុញឱ្យកម្មវិធីកាន់តែរីកចម្រើន និងរួមចំណែកលើកកម្ពស់វិស័យកីឡាយានយន្តនៅកម្ពុជា។

សូមជម្រាបថា ព្រឹត្តិការណ៍ប្រណាំងខាងលើនេះ គណៈកម្មការរៀបចំការប្រកួតបានកំណត់យក៧ វិញ្ញាសារដាក់ឱ្យប្រកួតប្រជែង ក្នុងនោះមានដូចជា៖វិញ្ញាប្រណាំងកម្រិតថ្នាក់ “A” ប្រភេទម៉ូតូកម្រិតជំនាញ -ថ្នាក់ “B” ប្រភេទម៉ូតូថ្នាក់ពាក់កណ្តាលជំនាញ -ថ្នាក់ “C” ប្រភេទម៉ូតូថ្នាក់ដំបូង -ថ្នាក់ “D” ប្រភេទម៉ូតូថ្នាក់នារី -ថ្នាក់ “E” ប្រភេទម៉ូតូថ្នាក់ក្មេង -ថ្នាក់ “F” យុវវ័យពាក់កណ្តាលជំនាញ និង-ថ្នាក់ “G” វ័យចំណាស់ពាក់កណ្តាលជំនាញ (អាយុ40ឆ្នាំឡើងទៅ)៕