មន្ត្រីរាជការ និងនិស្សិត បាន​សម្តែង​នូវ​ការ​ដឹង​គុណ​យ៉ាង​ជ្រាល​ជ្រៅ​មិន​អាច​កាត់​ថ្លៃ​បា​ន​ពី​ព្រះរាជ​បេសក​កម្ម ដើម្បីជាតិមាតុភូមិ និងប្រជារាស្ត្រខ្មែររបស់ព្រះករុណាព្រះបាទសម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និង​ព្រះ​បញ្ញា​ញាណយ៉ាងក្លៀវក្លាបំផុត ធ្វើការតស៊ូក្នុងក្របខ័ណ្ឌនៃព្រះរាជបូជនីយកិច្ច ដើម្បីទាមទារ​ឯករាជ្យ​ដ៏​ពិត​ប្រាកដជូនកម្ពុជា។

នៅថ្ងៃទី៩ ខែវិច្ឆិកា ឆ្នាំ២០២៦ នេះ គឺជា​ថ្ងៃ​ដែល​ប្រទេស​កម្ពុជា​ត្រូវ​ប្រារព្ធ​ខួប​អនុស្សាវរីយ៍​លើក​ទី​៧៣ នៃទិវាបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣-៩ វិច្ឆិកា ២០២៦) ដែល​កម្ពុជា​ទទួល​បាន​ឯករាជ្យ ពីអាណានិគមនិយមបារាំង។

មន្ត្រីរាជការ និស្សិត ប្រជាពលរដ្ឋបានថ្លែងថា ទិវាឯករាជ្យជាតិលើកទី៧៣ គឺជា​ការ​រំលឹក​ឡើង​វិញ​នៅ​ព្រះរាជ្យ​បូជនីយកិច្ចរបស់ព្រះករុណាព្រះបាទសម្ដេចព្រះ នរោត្តម សីហនុ ព្រះបរម​រតន​កោដ្ឋ​ដែល​ព្រះអង្គ​បានទាមទារឯករាជ្យជូនប្រទេសជាតិ។ គុណូបការៈរបស់ព្រះអង្គមិនអាចកាត់ថ្លៃបានឡើយពីព្រោះព្រះអង្គបានបូជាកម្លាំងកាយចិត្តធ្វើការ​តស៊ូ​ទាមទារទម្រាំតែទទួលបានឯករាជ្យពេញលេញ។ ចំពោះវីរ​ភាព​ដ៏គំរូ​នេះ​កូន​ខ្មែរ​គ្រប់​រូប​ចង​ចាំជានិច្ច​មិន​អាចបំភ្លេច​បាន​និង​នាំ​គ្នា​រក្សា​ឲ្យ​បាន​គង់​វង្ស​ពី​ព្រោះ​ទម្រាំ​តែទទួល​បាន​ឯករាជ្យ​គឺ​មាន​ការ​លំបក់​ខ្លាំងណាស់។ ៩ វិច្ឆិកា ពិតជាមានគុណតម្លៃ​សម្រាប់​យុវជន​ជំនាន់​ក្រោយ​ដែល​ទទួល​បាន​សមិទ្ធផល​ដល់​ឧត្តុង្គ​ឧត្តម​ក្រោម​ការ​ដឹកនាំ​រប​ស់​ព្រះករុណា​ព្រះបាទ​សម្ដេច​ព្រះនរោត្តម សីហនុ ដែលបានទាមទារឯករាជ្យពីបារាំង រហូតដល់ក្លាយជា​ប្រទេស​ដែល​មាន​ឯករា​ជ្យ​ពេញ​លេញមានកេរ្តិ៍ឈ្មោះលើឆាកអន្តរជាតិ ដែលជាកេរ្តិ៍ដំណែល​ដ៏​មាន​តម្លៃ​សម្រា​ប់​ប្រទេស​ជាតិ​។

សូមជម្រាបថា បារាំងបានដាក់អាណានិគមលើកម្ពុជា អស់រយៈពេលជិតមួយសតវត្ស (១១ សីហា ១៨៦៣ – ៩ វិច្ឆិកា ១៩៥៣)។ នៅថ្ងៃទី៩ ខែវិច្ឆិកា ឆ្នាំ១៩៥៣ ដោយស្នា​ព្រះហស្ដ​ដ៏​ឧត្តុង្គ​ឧត្តមរបស់ព្រះបរមរតនកោដ្ឋ កម្ពុជាបានទទួលឯករាជ្យទាំងស្រុងពីបារាំង។ ប្រជា​រាស្ត្រ​កម្ពុជា​ទូទាំង​ប្រទេស បានថ្វាយព្រះកិត្តិនាមព្រះអង្គជា «ព្រះមហាវីរបុរសជាតិ ព្រះបិតា​ឯករាជ្យ​ជាតិ​»៕ អត្ថបទ៖ វង្ស សុភាព