អាជ្ញាធរជាន់ខ្ពស់​ការពារដែន​កោះ​តៃវ៉ាន់ លោក Wellington Koo បានប្រាប់​ឱ្យដឹង​នៅ​ថ្ងៃអង្គារ (ទី​១០ ខែវិច្ឆិកា ឆ្នាំ២០២៦) នេះថា ប្រទេសចិនកំពុងធ្វើសមយុទ្ធ «រារាំងមិន​ឱ្យ​ចូលតំបន់» នៅតំបន់ប៉ាស៊ីហ្វិកខាងលិច ដោយមានការចូលរួមពីនាវាផ្ទុកយន្តហោះ ១គ្រឿង រួមជាមួយកងនាវាផ្សេងទៀត ដោយ​ការលើកឡើងនេះកើតឡើង​បន្ទាប់ពីមានសេចក្តីរាយការណ៍ អំពីការកើនឡើងនៃសកម្មភាពរបស់ចិន។

ប្រទេសចិន ដែលចាត់ទុកកោះ​ស្វ័យ​គ្រប់គ្រងតាមបែបប្រជាធិបតេយ្យ គឺតៃវ៉ាន់​ថា ជាទឹកដីរបស់ខ្លួននោះ តែងតែបញ្ជូនយន្តហោះចម្បាំង និងនាវាចម្បាំងចូលទៅក្នុងដែនអាកាស និងដែនទឹកជុំវិញកោះនេះជាប្រចាំ។

កាលពីសប្តាហ៍មុន លោក Joseph Wu អគ្គលេខាធិការក្រុមប្រឹក្សាសន្តិសុខកោះ​តៃវ៉ាន់ បានបង្ហោះព័ត៌មានលម្អិតនៅលើគណនីបណ្ដាញ​សង្គម​ X របស់លោក អំពីការដាក់ពង្រាយនាវាចិនជាង ១០០​គ្រឿង ក្នុង​នោះ​រួមទាំងនាវាកងទ័ពជើងទឹក និងនាវាឆ្មាំល្បាត​ឆ្នេរ ដែលកំពុងប្រតិបត្តិការនៅក្បែរកោះ​តៃវ៉ាន់ ក្នុងសមុទ្រចិនខាងត្បូង និងចូលទៅក្នុងមហាសមុទ្រប៉ាស៊ីហ្វិក។

ស្ថាប័នការពារដែន​កោះ​តៃវ៉ាន់ ក៏បានរាយការណ៍កាលពីសប្តាហ៍មុនផងដែរ អំពីការកើនឡើងយ៉ាងខ្លាំងនូវ​ចំនួនយន្តហោះរបស់កងទ័ពអាកាសចិន នៅជុំវិញកោះ​តៃវ៉ាន់ ទោះបីជាចិនមិនបានប្រកាសជាផ្លូវការ អំពីការធ្វើសមយុទ្ធណាមួយក៏ដោយ។ នៅ​ឯស្ថាប័ន​អង្គនីតិបញ្ញត្តិ លោក Koo បានប្រាប់អ្នកសារព័ត៌មានថា៖ «ប្រទេសចិនពិតជាបានធ្វើសមយុទ្ធរារាំងមិន​ឱ្យចូលទៅកាន់តំបន់ នៅប៉ាស៊ីហ្វិកខាងលិច ដោយមានក្រុមនាវាផ្ទុកយន្តហោះ Liaoning និងកងនាវាហ្វឹកហ្វឺនផ្សេងទៀតចូលរួម»។

យុទ្ធសាស្ត្រ «រារាំងមិន​ឱ្យចូលទៅកាន់តំបន់» ឬ A2AD សំដៅលើការទប់ស្កាត់កម្លាំងពីខាងក្រៅមិនឱ្យចូលមកជ្រៀតជ្រែក ក្នុងជម្លោះ ដែល​ក្នុងបរិបទរបស់​កោះ​តៃវ៉ាន់ មានន័យថា ជាការរារាំងកងកម្លាំងរបស់​សហរដ្ឋអាមេរិក ឬសម្ព័ន្ធមិត្តផ្សេងទៀត មិនឱ្យចូលជួយទីក្រុង​តៃប៉ិ ក្នុងករណីដែលទីក្រុងប៉េកាំងបើកការវាយប្រហារ។ ក្រសួងការពារជាតិចិន មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ ពាក់ព័ន្ធនឹង​ការលើក​ឡើង​នេះ៕