ក្រុមជម្រើសជាតិព័រទុយហ្កាល់បានចាប់ផ្ដើមហ្វឹកហាត់នៅទីក្រុង Oeiras កាលពីថ្ងៃអង្គារ ដោយ​គ្មាន​វត្ត​មាន​របស់ខ្សែប្រយុទ្ធដ៏មានឥទ្ធិពល Cristiano Ronaldo បន្ទាប់ពីរូបគេ​បាន​សម្រេច​ចិត្ត​ចូល​និវត្តន៍​ពី​ក្រុមជម្រើសជាតិកាលពីដើមខែនេះ។

Ronaldo ដែលធ្លាប់បង្ហាញខ្លួនឱ្យព័រទុយហ្កាល់ចំនួន ២៣៤ ប្រកួត និងស៊ុតបញ្ចូលទីបាន ១៤៦ គ្រាប់ បានប្រកាសថា ដល់ពេលដែលរូបគេត្រូវប្រគល់អាវលេខ៧ ទៅ​ឱ្យ​កីឡាករ​ជំនាន់​ក្រោយ​ហើយ ​បន្ទាប់ពីបានចំណាយពេលអាជីពដ៏អស្ចារ្យជាមួយក្រុមជម្រើសជាតិ។

ក្នុងនាមជាប្រធានក្រុម Ronaldo បានដឹក​នាំ​ព័រ​ទុយ​ហ្កាល់​ឱ្យ​ឈ្នះ​ពាន​រង្វាន់​ធំ​ជា​លើក​ដំបូង​ក្នុង​ប្រវត្តិ​សាស្ត្រ គឺពានរង្វាន់ជើងឯកទ្វីបអឺរ៉ុប Euro 2016 ព្រមទាំងជួយក្រុមឈ្នះពាន UEFA Nations League ក្នុងឆ្នាំ២០១៩ និង២០២៥ ផងដែរ។

ក្នុងវ័យ ៤១ ឆ្នាំ Ronaldo បានបញ្ចប់អាជីពជាមួយក្រុមជម្រើសជាតិ ក្នុងនាមជាកីឡាករ​ដែល​ទទួល​បាន​កិត្តិយសផ្ទាល់ខ្លួន និងសមិទ្ធផលជាក្រុម​ច្រើន​បំផុត​មួយ​រូប​ក្នុង​ប្រវត្តិ​សាស្ត្រ​បាល់​ទាត់​ព័រ​ទុយហ្កាល់។ រូបគេក៏បានក្លាយជានិមិត្តរូបដ៏សំខាន់មួយរបស់ប្រទេសនេះនៅលើឆាកអន្តរជាតិផងដែរ។

នៅពេលគ្មានវត្តមានរបស់ Ronaldo លោក Jorge Jesus គ្រូបង្វឹកព័រទុយហ្កាល់ អាចនឹងរំពឹងលើ Joao Felix និង Goncalo Ramos ដើម្បីជួយបំពេញតួនាទីក្នុងតំបន់ប្រយុទ្ធ និងផ្ដល់កម្លាំងវាយសម្រុកដល់ក្រុម ជំនួសតំណែងដែល Ronaldo ធ្លាប់បំពេញអស់រយៈពេលជាច្រើនឆ្នាំ។

បច្ចុប្បន្ន ព័រទុយហ្កាល់កំពុងត្រៀមខ្លួនសម្រាប់ការប្រកួត UEFA Nations League ចំនួនពីរប្រកួត ដោយត្រូវបើកទ្វារផ្ទះទទួលដាណឺម៉ាក នៅទីក្រុង Braga នាថ្ងៃទី១៤ ខែវិច្ឆិកា មុនពេលធ្វើដំណើរទៅកាន់ទីក្រុង Cardiff ដើម្បីជួបវែល នៅថ្ងៃទី១៧ ខែវិច្ឆិកា។

ព័រទុយហ្កាល់កំពុងឈរនៅកំពូលតារាងពូល D ដោយមាន ១២ ពិន្ទុ នាំមុខដាណឺម៉ាកចំនួន ៦ ពិន្ទុ៕ អត្ថបទ៖នាង សុភាវុធ