នាល្ងាចថ្ងៃទី១១ ខែវិច្ឆិកា ឆ្នាំ២០២៦ នៅសាលសន្និសីទចតុម្មុខ, លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ រួមជាមួយឯកឧត្តម មូហាំម៉េដ មេឌី បែនសៃដ៍ (Mohammed Mehdi Bensaid) រដ្ឋមន្រ្តីក្រសួងយុវជន វប្បធម៌ និងកីឡា នៃ​ព្រះរា​ជា​ណា​ចក្រ​ម៉ារ៉ុក និងឯកឧត្តម អាប់ឌែររ៉ាហ៊ីម រ៉ាហ៍ហាលី (Abderrahim RAHHALY) ឯក​អគ្គ​រាជ​ទូត​វិសាមញ្ញ និងពេញសមត្ថភាព នៃព្រះរាជាណាចក្រម៉ារ៉ុក ប្រចាំព្រះរាជាណាចក្រកម្ពុជា បាន​អញ្ជើញ​ជាអធិបតីក្នុងពិធីបើកព្រឹត្តិការណ៍ “ទិវាវប្បធម៌ម៉ារ៉ុកនៅកម្ពុជាឆ្នាំ២០២៦” ដើម្បី​អបអរ​សាទរ​ខួបអនុស្សាវរីយ៍លើកទី៣០ នៃទំនាក់ទំនងការទូតរវាងប្រទេសទាំងពីរ។

លោក​ជំទាវបណ្ឌិតសភាចារ្យ ភឿង សកុណា បានថ្លែងថា ថ្វីដ្បិតកម្ពុជា និងម៉ារ៉ុក ស្ថិត​នៅ​ឆ្ងាយ​ពី​គ្នា​ក៏​ពិត​មែន ប៉ុន្តែចំណងមិត្តភាពរវាងប្រទេសទាំងពីរ បានបន្តចាក់ឫសយ៉ាងជ្រៅអស់រយៈពេល ៣​ទសវត្សរ៍​មក​ហើយ ហើយកាលពីថ្ងៃទី២១ ខែតុលា ឆ្នាំ២០២៥ ថ្នាក់ដឹកនាំការទូត​នៃ​ប្រទេស​ទាំង​ពីរ​ បានធ្វើការចុះហត្ថលេខាលើសេចក្តីថ្លែងការណ៍រួម ដែលជាផែន​ទី​បង្ហាញ​ផ្លូវ​ឆ្ពោះ​ទៅរ​ក​កិច្ច​សហប្រតិបត្តិការពហុវិស័យ។ ឆ្នាំ២០២៦ គឺជាខួបអនុស្សាវរីយ៍លើកទី៣០ នៃការបង្កើត​ទំនាក់​ទំនង​ការទូតរវាងប្រទេសកម្ពុជា និងម៉ារ៉ុក។ កម្មវិធីនៅរសៀលនេះ ឆ្លុះបញ្ចាំងពី​ព្រឹត្តិការណ៍​ដ៏​សំខាន់​ថ្មីមួយនៅក្នុងភាពជាដៃគូផ្នែកវប្បធម៌របស់យើង។ នាពេលបន្តិចទៀតនេះ ភ្ញៀវ​កិត្តិយស​ទាំង​អស់​នឹងបានទស្សនាការសម្តែងសិល្បៈ ដែលធ្វើអោយយើង​កាន់​តែ​ស្គាល់​ច្បាស់​អំពី​សិល្បៈ​វប្បធម៌​ ដ៏វិសេសវិសាលនៃប្រទេសយើងទាំងពីរ ដែលសិល្បៈវប្បធម៌​នេះ​គឺ​ជាស្ពាន​ដ៏​រឹង​មាំ​ចូល​រួម​តភ្ជាប់​មិត្តភាព និងសាមគ្គីភាពរបស់ប្រជាជនយើង។

ឆ្លៀតឱកាសនៃពិធីនាពេលនេះ លោក​ជំទាវ​បណ្ឌិត​សភាចារ្យ បន្ថែមថា ការអភិរក្ស ការលើកស្ទួយបេតិកភណ្ឌវប្បធម៌ ព្រមទាំង​កិច្ច​ពង្រឹង​កិច្ច​សហការ​អន្តរជាតិ គឺជាចំណុចស្នូលមួយនៃគោលនយោបាយជាតិរបស់កម្ពុជា។ កម្ពុជា ប្តេជ្ញាមិន​ត្រឹម​តែ​ការពារប្រាសាទ បុរាណដ្ឋាន និងតំបន់បុរាណវិទ្យាប៉ុណ្ណោះទេ ប៉ុន្តែថែមទាំង​ការពារ​បេតិក​ភណ្ឌ​វប្បធម៌អរូបីរបស់យើង រួមមាន របាំបុរាណ ប្រពៃណី សិល្បៈសម្តែង សិប្បកម្ម ភាសា ចំណេះ​ដឹងប្រពៃណី និងជាពិសេសសហគមន៍ដែលបានថែរក្សា និងបន្ត​បេតិកភណ្ឌ​វប្បធម៌​អរូបី​ទាំង​នេះ​ពី​ជំនាន់មួយទៅជំនាន់មួយ។

ឯកឧត្តម អាប់ឌែររ៉ាហ៊ីម រ៉ាហ៍ហាលី បានលើកឡើងថា រយៈពេល ៣០ ឆ្នាំនៃចំណងមិត្តភាព និង​កិច្ចសហប្រតិបត្តិការ បាននាំឱ្យព្រះរាជាណាចក្រទាំងពីរកាន់តែខិតជិតគ្នា ទោះបី​ជា​មា​ន​ចម្ងាយ​ភូមិ​សាស្ត្រ​ឆ្ងាយពីគ្នាក៏ដោយ។ នៅថ្ងៃនេះ យើងប្រើប្រាស់ «វប្បធម៌» ជាស្ពានផ្សា​ភ្ជាប់​ទំនាក់​ទំនង​រវាង​ប្រជាជន និងប្រជាជន ដើម្បីស្វែងយល់ពីគ្នាឱ្យកាន់តែច្បាស់។ តាមរយៈតន្ត្រីម៉ារ៉ុក របាំប្រពៃណីខ្មែរ អក្សរផ្ចង់ សិល្បៈគូរហិនណា (Henna) និងសិល្បៈឆុងតែ យើងរួមគ្នាអបអរសាទរបេតិកភណ្ឌដ៏សម្បូរបែប ដែលឆ្លុះបញ្ចាំងពីប្រវត្តិសាស្ត្រ អត្តសញ្ញាណ និងជីវភាពរស់នៅរបស់ប្រទេសទាំងពីរ។

ជាទីបញ្ចប់ ឯកឧត្តម មូហាំម៉េដ មេឌី បែនសៃដ៍ បានបញ្ជាក់ថា ទិវាវប្បធម៌ម៉ារ៉ុកនៅភ្នំពេញ គឺជាសក្ខីភាពជាក់ស្តែងនៃការប្តេជ្ញាចិត្តរួមគ្នាលើកិច្ចសហប្រតិបត្តិការ។ «តាមរយៈការតាំងពិព័រណ៍រូបថតនៅថ្ងៃនេះ យើងចង់បង្ហាញពីភាពសម្បូរបែបនៃបេតិកភណ្ឌម៉ារ៉ុក ដូចជា សិល្បៈក្បាច់សេរ៉ាមិច ម្ហូបប្រពៃណី សម្លៀកបំពាក់ អក្សរផ្ចង់ តម្បាញ គ្រឿងស្មូន សិប្បកម្មស្បែក និងការឆ្លាក់លោហៈ ដែលជាមរតកបន្តពីមួយជំនាន់ទៅមួយជំនាន់ និងឆ្លុះបញ្ចាំងពីភាពច្នៃប្រតិដ្ឋរបស់យើង»៕ អត្ថបទ រដ្ឋា