សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មាន​ប្រសាសន៍​បញ្ជាក់ថា​ការ​រៀប​ចំ​ភូមិ​ហ្វ្រង់​កូហ្វូនី ​ស្ថិតនៅចំកណ្តាលបេះដូងនៃរាជធានីភ្នំពេញ នៅជិតតំបន់ចតុមុខ ដែល​ជា​ទី​ប្រសព្វ​រវាង​ទន្លេសាប និងទន្លេមេគង្គ។ តាំងពី​ដើម​រៀង​មក​រាជ​ធានី​ភ្នំពេញ​តែង​តែ​ជា​ទីកន្លែង​នៃ​ការ​ជួប​ជុំគ្នា​ ខណៈដែលទឹកទន្លេបានហូរមកប្រសព្វគ្នានៅទីនេះ ហើយប្រជាជន​របស់​យើង​ក៏​បាន​មក​ជួ​ប​ជុំ​គ្នា​នៅ​ទីនេះដូចគ្នាដែរ។

សម្តេចធិបតី នាយករដ្ឋមន្រ្ដី មានប្រសាន៍បញ្ជាក់បែបនេះក្នុងឱកាស អញ្ជើញ​ជា​អធិបតី​សម្ពោធ​ដាក់​ឱ្យ​ដំណើរការ «ភូមិហ្វ្រង់កូហ្វូនី» ស្ថិតនៅលើទីធ្លាសួនច្បារវត្តបទុមវតី ទំហំប្រមាណ ១ម៉ឺន​ម៉ែត្រ​ក្រឡា នៅព្រឹកថ្ងៃទី១៣ ខែវិច្ឆិកា ឆ្នាំ២០២៦នេះ។

ក្នុងឱកាសនោះ សម្តេចធិបតី បានថ្លែងថា កម្ពុជា និងហ្វ្រង់កូហ្វូនី មានប្រវត្តិរួម​គ្នា​យូរ​ល​ង់​ណាស់​មក​ហើយ។ ប្រទេសកម្ពុជាបានចូលជាសមាជិកសង្កេតការណ៍នៃអង្គការហ្វ្រង់កូហ្វូនី ក្នុង​ឆ្នាំ​១៩៩១​ មុននឹងក្លាយជាសមាជិកពេញសិទ្ធិក្នុងឆ្នាំ១៩៩៣។ សម្តេចបន្តថា ភាសាបារាំង គឺ​ជា​ភាសានៃ​ការចងចាំ ជាភាសាសម្រាប់ ការសិក្សា ចំណេះដឹង និងជាភាសាសម្រាប់មិត្តភាព។

សម្ដេចធិបតីថ្លែងថា មូលបទនៃ​កិ​ច្ច​ប្រជុំ​កំពូល​ហ្វ្រង់​កូហ្វូនី​លើក​ទី​២០​នេះ​មាន​អត្ថន័យ​យ៉ាង​ជ្រាល​ជ្រៅ​បំផុតចំពោះពួកយើងគឺ៖ «រួមគ្នាបន្តកសាងសន្តិភាព ដើម្បីវិបុលភាពរួម និង​ស្ថិរ​ភាព​យូរ​អង្វែង»។ ចំណែកឯប្រធានបទនៃភូមិហ្វ្រង់កូហ្វូនីរបស់យើង ក៏បានបង្ហាញពីស្មារតីនេះ ក្រោម​ពាក្យស្លោក៖ «ស្នាមញញឹមខ្មែរ នឹងក្លាយជាស្នាមញញឹមហ្វ្រង់កូហ្វូនី»។

សម្ដេចធិបតីបានថ្លែងថា នៅកម្ពុជា​ស្នាម​ញញឹម​មាន​អត្ថន័យ​លើស​ពី​ការ​ស្វាគមន៍​គ្នា​ទៅវិញ​ទៅ​មក​។ ស្នាមញញឹម តំណាងឱ្យភាពកក់ក្ដៅ សន្តិភាព និងក្តីសង្ឃឹម​ហើយ​នាថ្ងៃ​នេះ​ស្នាម​ញញឹម​របស់​យើង​កំពុង រួមបញ្ចូលគ្នាជាមួយស្នាមញញឹមហ្វ្រង់កូហ្វូនីទាំងមូល។

សូមបញ្ជាក់ថា «ភូមិហ្វ្រង់កូហ្វូនី-village de la Francophonie» ជាព្រឹត្តិការណ៍អម​ដែល​តែង​តែ​រៀប​ចំ ​ភ្ជាប់ជាមួយកិច្ចប្រជុំកំពូលហ្វ្រង់កូហ្វូនី ដែលរៀបចំឡើង​ក្នុង​គោល​បំណង​លើក​កម្ពស់​វប្បធម៌ ទេសចរណ៍ អប់រំ កិច្ចសហប្រតិបត្តិការ ការផ្សាភ្ជាប់រវាងមនុស្ស និងមនុស្ស (People-to-People Connectivity) និងភាពចម្រុះនៃបណ្ដាប្រទេសជាសមាជិកទាំងអស់។ ព្រឹត្តិការណ៍នេះគឺផ្សារភ្ជាប់នឹងក្របខណ្ឌយុទ្ធសាស្ត្រហ្វ្រង់កូហ្វូនី ឆ្នាំ២០២៣–២០៣០ និង​ក្រប​ខណ្ឌកម្មវិធីអង្គការអន្តរជាតិហ្វ្រង់កូហ្វូនី ឆ្នាំ២០២៤–២០២៧ ដោយផ្តោតលើ «ប្រជាជន» ដោយ​ដាក់​បុគ្គល និងសហគមន៍ជាស្នូលនៅចំកណ្តាលសកម្មភាព ព្រមទាំងធានា​ការ​ចូល​រួម​ងាយ​ស្រួល បរិយាបន្ន និងមានអត្ថន័យ សម្រាប់យុវជន ស្ត្រី និងសាធារណជនទូលំទូលាយ។

សម្រាប់​ឆ្នាំ២០២៦នេះ ក្រសួងកិច្ចការនារី និងក្រសួងទេសចរណ៍ ជាសហប្រធាន​ក្នុង​ការ​រៀបចំ​ព្រឹត្តិការណ៍​អម «ភូមិហ្វ្រង់កូហ្វូនី» ដែលនឹងប្រព្រឹត្តទៅរយៈពេល ៥ថ្ងៃ ចាប់ពីថ្ងៃទី១៣ ដល់ថ្ងៃទី ១៧ ខែវិច្ឆិកា ឆ្នាំ២០២៦ ក្រោមប្រធានបទ «ស្នាមញញឹមខ្មែរ ស្នាមញញឹមហ្វ្រង់កូហ្វូនី- Le sourire khmer, le sourire de la Francophonie» ដែលបង្ហាញលើវប្បធម៌ ទេសចរណ៍ ការ​អប់រំ​៕