ភ្នំពេញ៖ ព្រឹត្តិការណ៍អម «ហ្វ្រង់កូតិច 2026 (FrancoTech2026) » ដែល​នឹង​ប្រព្រឹត្ត​ទៅ​ចាប់​ពី​ថ្ងៃទី១៤ ដល់ថ្ងៃទី១៦ ខែវិច្ឆិកា នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានី​ភ្នំពេញ ​ទទួលបានការចុះឈ្មោះចូលរួមសរុប ជាង ១៤,០០០នាក់ មកពីប្រមាណ ៨៨ ប្រទេស។ ព្រឹត្តិការណ៍នេះ នឹងផ្តោតលើការចែករំលែកចំណេះដឹង បទពិសោធ បច្ចេកវិទ្យាថ្មីៗ និង​ឧត្តមានុវត្តន៍ ព្រមទាំងជំរុញកិច្ចសហប្រតិបត្តិការផ្នែកសេដ្ឋកិច្ច បច្ចេកវិទ្យា និង​ការ​វិនិយោគ​រវាង​សហគម​ន៍ហ្វ្រង់កូហ្វូនី និងតំបន់អាស៊ាន។

លោកជំទាវ ទន សុគន្ធា អនុរដ្ឋលេខាធិការ និងជានាយិកាខុទ្ទកាល័យរដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានឱ្យដឹងថា ព្រឹត្តិការណ៍អម FrancoTech2026 ត្រូវបានរៀបចំឡើងក្រោមមូលបទ «សហគមន៍ហ្វ្រង់កូហ្វូនីតែមួយ អនាគតឌីជីថលតែមួយ» ក្នុងគោលបំណងផ្លាស់ប្តូរចំណេះដឹង បទពិសោធ និងបច្ចេកវិទ្យាឌីជីថលថ្មីៗ ដែលកំពុងវិវត្តនាពេលបច្ចុប្បន្ន។ ព្រឹត្តិការណ៍នេះក៏ផ្តោតសំខាន់លើកិច្ចសហប្រតិបត្តិការសេដ្ឋកិច្ច បច្ចេកវិទ្យា និងវិនិយោគ ព្រមទាំង បង្ហាញពីសក្តានុពលរបស់កម្ពុជា ក្នុងនាមជាមជ្ឈមណ្ឌលតភ្ជាប់ពាណិជ្ជកម្ម និងបច្ចេកវិទ្យា រវាងសហគមន៍ហ្វ្រង់កូហ្វូនី និងតំបន់អាស៊ាន។

លោកជំទាវ បញ្ជាក់ថា គិតមកដល់ថ្ងៃនេះ មានអ្នកចុះឈ្មោះចូលរួមសរុបជាង ១៤,០០០នាក់ មកពីប្រមាណ ៨៨ ប្រទេស។ តាមរយៈវេទិកាបច្ចេកវិទ្យាដ៏ធំនេះ កម្ពុជានឹងដើរតួនាទីយ៉ាងសំខាន់ជាស្ពានតភ្ជាប់ ដើម្បីជំរុញកិច្ចសហប្រតិបត្តិការធុរកិច្ច និងបង្កើនការវិនិយោគរវាងសហគមន៍ហ្វ្រង់កូហ្វូនី និងបណ្តាប្រទេសក្នុងតំបន់អាស៊ាន។

លោកជំទាវមានប្រសាសន៍ថា៖ »នៅសល់តែមួយថ្ងៃទៀតប៉ុណ្ណោះ ព្រឹត្តិការណ៍បច្ចេកវិទ្យាដ៏ធំ «ហ្វ្រង់កូតិច - FrancoTech» ដែលជាព្រឹត្តិការណ៍អមនៃកិច្ចប្រជុំកំពូលហ្វ្រង់កូហ្វូនី នឹងចាប់ផ្តើមជាផ្លូវការហើយ ក្រោមការធ្វើជាម្ចាស់ផ្ទះរបស់ប្រទេសកម្ពុជា។ មកទល់ពេលនេះ ការងាររៀបចំកម្មវិធីសម្រេចបានប្រមាណ ៩០ ភាគរយ ហើយ ដោយស្តង់ពិព័រណ៍ស្ទើរតែទាំងអស់ត្រូវបានតម្លើង និងរៀបចំរួចរាល់ជាស្ថាពរ»។

ចំណែក លោក Elliot តំណាងទីភ្នាក់ងារពាណិជ្ជកម្ម និងវិនិយោគបារាំង (Business France) បានណែនាំអំពី ពន្លាជាតិបារាំង (French Pavilion) ដែលមានទីតាំងស្ថិតនៅ សាល 2D (Hall 2D) ក្នុងព្រឹត្តិការណ៍ FrancoTech២០២៦ ដែលមានគ្រាសបារាំងជាង ១៩ ក្រុមហ៊ុននឹងដាក់តាំងបង្ហាញដំណោះស្រាយ និងបច្ចេកវិទ្យាទំនើបៗជាច្រើនប្រភេទ ព្រមទាំងចក្ខុវិស័យនៃការធ្វើធុរកិច្ច និងវិនិយោគនៅក្នុងប្រទេសកម្ពុជា។ ក្រៅពីវិស័យឯកជន ក៏មានវត្តមានរបស់ស្ថាប័នប្រតិបត្តិករបារាំងសំខាន់ៗ ដែលធ្វើការជាមួយស្ថានទូតបារាំងប្រចាំកម្ពុជា រួមមាន IRD, AFD និង CIRAD ផងដែរ។

លោកបញ្ជាក់ថា៖ «សាធារណជន និងដៃគូធុរកិច្ចទាំងអស់ សូមអញ្ជើញចូលទស្សនាពន្លាជាតិបារាំងនៅសាល 2D ដើម្បីស្វែងយល់បន្ថែមអំពីបច្ចេកវិទ្យារបស់ប្រទេសបារាំង និងជួបពិភាក្សាដោយផ្ទាល់ជាមួយក្រុមការងារ និងតំណាងក្រុមហ៊ុននានា។ ពន្លាជាតិបារាំងបើកស្វាគមន៍ភ្ញៀវចូលទស្សនារយៈពេល ៣ ថ្ងៃពេញ ចាប់ពីថ្ងៃទី១៤-១៦ ខែវិច្ឆិកា»។

ព្រឹត្តិការណ៍ FrancoTech 2026 នឹងមានសកម្មភាពសំខាន់ៗចំនួន ៥ រួមមាន៖ ទី១. វេទិកាពិភាក្សាលើប្រធានបទសំខាន់ៗ ដូចជា បញ្ញាសិប្បនិម្មិត (AI) រដ្ឋាភិបាលឌីជីថល បច្ចេកវិទ្យាហិរញ្ញវត្ថុ កសិកម្ម និងសន្តិសុខស្បៀង ធុរកិច្ចឌីជីថល ស្ត្រីនិងនវានុវត្តន៍ ព្រមទាំងបច្ចេកវិទ្យាសម្រាប់ទេសចរណ៍និងវប្បធម៌ ដោយមានវាគ្មិនជាថ្នាក់ដឹកនាំចំនួន ៦៤រូប មកពី ១៤ប្រទេស។

ទី២. ពិព័រណ៍បច្ចេកវិទ្យា និងនវានុវត្តន៍ ដែលមានពន្លាជាតិចំនួន ១៥ប្រទេស ក្រុមហ៊ុនបច្ចេកវិទ្យា ៩៧ក្រុមហ៊ុន ធុរកិច្ចឌីជីថលថ្មី (Startups) ៣៦ក្រុម និងតំបន់បទពិសោធចំនួន ១៦។ ទី៣. ការប្រកួតប្រជែងនវានុវត្តន៍ឌីជីថល ដែលមានក្រុមដាក់ពាក្យចំនួន ៣៨១ក្រុម មកពី ២៧ប្រទេស ហើយជ្រើសរើស ១៥ក្រុមចុងក្រោយ ក្នុងនោះមានក្រុមមកពីកម្ពុជាផងដែរ។ គណៈកម្មការវាយតម្លៃមកពី ៥ប្រទេស រួមមាន កម្ពុជា បារាំង កាណាដា វៀតណាម និងសេណេហ្គាល់ នឹងប្រកាសជ័យលាភីក្នុងពិធី Gala Dinner នៅថ្ងៃទី១៦ ខែវិច្ឆិកា ឆ្នាំ២០២៦។

ទី៤. វេទិកាវិនិយោគ ដែលសហការរៀបចំជាមួយក្រុមប្រឹក្សាអភិវឌ្ឍន៍កម្ពុជា (CDC) ធនាគារ BRED Bank ក្រុមហ៊ុន APF និង Confluences ដើម្បីផ្សព្វផ្សាយពីសក្តានុពលវិនិយោគនៅកម្ពុជា។ និងទី៥. កម្មវិធីផ្គូផ្គងធុរកិច្ច (B2B Matching) ដែលអនុញ្ញាតឱ្យអ្នកចូលរួមប្រើប្រាស់កម្មវិធី FrancoTech App ដើម្បីចុះឈ្មោះ ស្វែងរកព័ត៌មាន និងណាត់ជួបដៃគូធុរកិច្ចដោយផ្ទាល់នៅទីតាំងកម្មវិធី៕