នៅថ្ងៃទី១៣ ខែវិច្ឆិកានេះ ប្រតិភូជាន់ខ្ពស់នៃប្រទេសជាង៣០បន្ថែម នៅ​តាម​ទី្វប​នានា​ជុំវិញ​ពិភព​លោក ​បានបន្តនាំគ្នាអញ្ជើញមកដល់រាជធានីភ្នំពេញ ដើម្បីចូលរួមកិច្ចប្រជុំកំពូលហ្រ្វង់កូហ្វូនី លើក​ទី២០ ហើយប្រតិភូនានានោះ បានបង្ហាញក្តីរំពឹងថា កិច្ចប្រជុំ​នានា​នោះ​ទទួល​បាន​លទ្ធ​ផល​ល្អ​ ផ្តល់ផលប្រយោជន៍ជាសកល និងដំណោះស្រាយបញ្ហាវិបត្តិជាសកលផ្សេងៗទៀត។

សម្រាប់ទិដ្ឋភាពមកដល់ព្រឹកថ្ងៃទី១៣ ខែវិច្ឆិកានេះ នៅអាកាសយានដ្ឋានអន្តរជាតិតេជោ TIA ច្រកVVIPថ្មី គេឃើញមានគណៈប្រតិភូជាន់ខ្ពស់ជាច្រើនរូប ដែលមានសមាសភាពថ្នាក់អនុប្រធានធិបតី ឧបនាយករដ្ឋមន្ត្រី រដ្ឋមន្ត្រី អនុមន្ត្រី ឧត្តមមន្ត្រីជំនាញ ឯកអគ្គរដ្ឋទូត អ្នកវិនិយោគទុន អង្គការអន្តរជាតិ និងប្រតិភូអមដំណើរនានាទៀត មកតាមប្រទេសជាង៣០ ក្នុ្ងងនោះសម្រាប់ពេលព្រឹក រួមមាន៖ ប្រទេស Andorre, Sarre , Geogie , Liban, Gambie, Benin,កូឌីវ័រ, កូសូវូ, Ammenie , ថៃ , បារាំង, Bulgarie, និងប្រទេសឡាវជាដើម ដោយឡែកពេលល្ងាចវិញ មានដូចជាប្រទេស អៀកឡង់ ហុងគ្រី មូរីតានី ម៉ុងតេណេក្រូ អង់ហ្គូឡា អេហ្ស៊ីប ទុយណេស្ស៊ី និងកាមារ៉ូនជាដើម។

ឯកឧត្តម ឡុង យ៉េស អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានថ្លែងថានៅរយៈពេល៣ថ្ងៃមកនេះ គឺមានថ្នាក់ដឹកនាំប្រតិភូប្រមាណ៥០ប្រទេសរួចហើយបានអញ្ជើញមកដល់កម្ពុជា ហើយអំឡុងពេលមកដល់អាកាសយានដ្ឋានTIA បណ្តាថ្នាក់ដឹកនាំប្រតិភូតាមប្រទេសនានា បានបង្ហាញការចាប់អារម្មណ៍ពេញចិត្តខ្លាំងចំពោះកម្ពុជា ធ្វើជាម្ចាស់ផ្ទះរៀបចំកិច្ចប្រជុំដ៏ធំ និងមានសារសំខាន់ខ្លាំងសម្រាប់ប្រទេសនិយាយភាសាបារាំង។

សម្រាប់រដ្ឋមន្ត្រីការបរទេសសេណេហ្គាល ឯកឧត្តម Cheikh NIANG នៅដំណើរអញ្ជើញមកដល់កម្ពុជា បានសម្តែងក្តីរីករាយខ្លាំង និងអបអរសាទររាជរដ្ឋាភិបាលកម្ពុជាធ្វើជាម្ចាស់ផ្ទះនៃកិច្ចប្រជុំកំពូល Francophonie ហើយ ឯកឧត្តម ជឿជាក់ថា កិច្ចប្រជុំកំពូលនឹងទទួលបានជោគជ័យយ៉ាងធំធេង ក្នុងកិច្ចការបង្រួបបង្រួម ការលើកស្ទួយភាពចំរុះផ្នែកវប្បធម៌ ការកាត់បន្ថយគន្លាត បង្ខិតប្រជាជននៅក្នុងពិភពលោក ឲ្យខិតនៅជិតគ្នា ហើយកិច្ចប្រជុំនេះនឹងរួមគ្នាជំរុញការដោះស្រាយវិបត្តិជាសកល និងការផ្តល់ផលប្រយោជន៍ជាសកល ជាដើម។

សូមបញ្ជាក់ថា កិច្ចប្រជុំកំពូលហ្រ្វង់កូហ្វូនីលើកទី២០ ដែលកម្ពុជាធ្វើម្ចាស់ផ្ទះរៀបចំ គឺបានប្រារព្វក្រោមប្រធានបទ៖ រួមគ្នាបន្តកសាងសន្តិភាព ដើម្បីវិបុលភាពរួម និងស្ថិរភាពយូរអង្វែង ហើយប្រធានបទនេះចង់បង្ហាញថា ពីគុណតម្លៃ សន្តិភាព វិបុលភាព និង ស្ថិរភាព និងចង់បង្ហាញពីបទពិសោធន៍ភាពខ្មៅងងិតកម្ពុជាជាង៣០ឆ្នាំ ជាពិសេសចុងក្រោយ គឺការប៉ះទង្វិចដោយអាវុធរវាងកម្ពុជា ថៃ ហើយគោលជំហរកម្ពុជាគឺចង់មានសន្តិភាព គោរពកិច្ចព្រមព្រៀងបទឈប់បាញ់ គោរពច្បាប់អន្តរជាតិ និងមានស្ថិរភាព ហើយទាំងអស់នេះ ស្របតាមគោលដៅអង្គការហ្វ្រង់កូហ្វូនីចង់បាន៕ អត្ថបទ៖ ស៊ុម សុខជា